Mateo 3:1-17

  • Bautizaq Juanpa predicasqanmanta (1-12)

  • Jesuspa bautizakusqanmanta (13-17)

3  Chay p’unchaykunapin bautizaq Juanqa Judea ch’inneqman jamuspa predicayta qallariran:  “Janaq pacha gobiernon qayllaykamunña, chayrayku juchaykichismanta pesapakuychis”, nispa.  Paymantan profeta Isaías niran: “Juj runan ch’inneqmanta wajakamushan: ‘Jehová Diospaq ñanta allichaychis limpiaychis ima’”, nispa.  Juanqa camelloq millmanmanta ruwasqa p’achawanmi p’achakuq, qara chumpiwantaq chumpikuq; saltamontekunata wanqoyroq misk’inta imataq mijuq.  Jerusalenmanta, llapan Judeamanta, Jordán mayuq llapan muyuriqninmanta iman runakunaqa payman jamuqku,  jinaspa Jordán mayupi bautizachikuqku,* juchankutapas sut’itan willakuqku.  Fariseokunata saduceokunatawan* bautizasqanman jamushaqta rikuspan Juanqa paykunata niran: “Yau mach’aqway miraykuna, ¿pin nirasunkichis: ‘Atiwaqchismi Diospa phiñakuynin p’unchaymanta ayqeyta’, nispa?  Chayrayku, ruwayniykichiswan rikuchiychis juchaykichismanta pesapakusqaykichista.  Chaytaq sonqoykichispi nishawaqchis: ‘Taytaykuqa Abrahanmi’, nispa. Niykichismi: Diosqa atiyniyoqmi kay rumikunamantapas Abrahanpaq wawakunata jatarichinanpaq. 10  Hachaqa listoñan kashan sach’akunata saphinmantapacha wit’unapaq, chaymi allin ruruta mana ruruq sach’aqa wit’usqa kaspa ninaman wijch’uykusqa kanqa. 11  Noqaqa unuwanmi bautizaykichis juchaykichismanta pesapakusqaykichisrayku, qhepayta jamuqmi ichaqa noqamanta aswan atiyniyoq, manataqmi noqaqa usut’allantapas ch’utinaypaq jinachu kani. Paymi bautizasunkichis santo espirituwan ninawan ima. 12  Wayrachinanqa makinpin kashan, eranan patata allintapuni pichaspan payqa trigonta taqena wasiman oqarinqa, q’opatataq mana jayk’aq wañuq ninapi kanapunqa”, nispa. 13  Chaymantataq Jesusqa Galileamanta Jordán mayuman jamuran Juanwan bautizachikunanpaq. 14  Juantaq ichaqa payta jark’ayta munaspa niran: “¿Noqata bautizawanayki kashaqtinchu noqaman jamuwashanki?”, nispa. 15  Jinan Jesusqa niran: “Ama jark’awaychu, jinatapunin ruwananchis tukuy allin kaqta junt’anapaqqa”, nispa. Chaymi Juanqa manaña jark’aranchu. 16  Jesús bautizakushaspa unumanta lloqsimuqtin jinataq cielo kicharikamuran, jinan Juanqa Diospa espiritunta rikuran paloma jina Jesús pataman uraykamushaqta. 17  Chaymantataq cielomanta juj kunka nimuran: “Kaymi Churiyqa, paytan munakuni, payqa sonqoypaq jinan”, nispa.

Uraypi willakuykuna

“Bautizay” simiqa “challpuy” otaq “unuman chinkaykachiy” ninantan nin.
Fariseokunawan saduceokunawanqa judío religionpi iskay t’aqa umallikunan karanku.