Mateo 28:1-20

  • Jesuspa kausarimpusqanmanta (1-10)

  • Llullakunankupaq soldadokunaman pagasqankumanta (11-15)

  • Jesuspa “yachachimuychis” nispa kamachisqanmanta (16-20)

28  Sábado p’unchay qhepatan semana qallariy* p’unchay illarimuyta María Magdalenawan juj kaq Mariapiwan sepultura qhawaq riranku.  Janaq pachamanta Jehová Diospa angelnin uraykamusqanraykun jatun terremoto kasqa, chay angelmi jamuspa rumita suchuchisqa, jinaspa chay patapi tiyasharan.  Chay angelqa llifllikiy jinan k’ancharan, p’achantaq rit’i jina yuraq karan.  Payta mancharikuspan sepulturata cuidaq runakunaqa khatatataranku, wañusqa jinaraqmi kapurankupas.  Angeltaq warmikunata niran: “Ama mancharikuychischu, yachanin k’aspipi wañuchisqa karan chay Jesusta maskhashasqaykichista;  payqa manan kaypiñachu, nisqanman jinan kausarichisqa kapun. Jamuychis, qhawaykuychis maypichus kasharan chayta.  Chhaynaqa usqhaylla rispa discipulonkunaman willamuychis wañusqamanta kausarichisqa kasqanta. Payqa ñauparinñan Galileaman, chaypin payta rikumunkichis. Chayta willaqmi jamurani”, nispa.  Jinan chay warmikunaqa sepulturamanta usqhaylla ripuspa, manchasqataq ancha kusisqataq phawaylla riranku Jesuspa discipulonkunaman willaq.  Rishaqtinkutaq Jesusqa paykunaman qonqaylla rijurispa napaykuran. Chaymi paykunaqa achhuykuspa chakinman k’umuykuranku. 10  Jinan Jesusqa niran: “¡Ama manchakuychischu! Phawaychis, wayqeykunaman willamuychis Galileaman rinankupaq, chaypin rikumuwanqaku”, nispa. 11  Chay warmikuna rishanankukaman sepulturata cuidaq wakin runakunaqa llaqtaman riranku, jinaspa umalli sacerdotekunaman willamuranku tukuy imachus pasasqanta. 12  Jinan umalli sacerdotekunaqa kuraq runakunapiwan juñunakuranku rimanakunankupaq, chay qhepamantaq soldadokunaman askha qolqeta qoranku. 13  Jinaspa niranku: “‘Puñushanaykukaman discipulonkuna tuta jamuspa cuerponta suwaruwasqaku’, nispan ninkichis. 14  Chaytachus kamachikuq yacharunqa chayqa, aman llakikunkichischu, noqaykuñan paywan rimasaqku”, nispa. 15  Jinan chay soldadokunaqa qolqeta chaskikuspa yachachisqa kasqankuman jina rimaranku, chaytan kunan p’unchaykama judío runakuna ukhupi rimakushan. 16  Chunka jujniyoq discipulonkunataq Galileata riranku maypichus Jesús paykunawan tupanan karan chay orqoman. 17  Jesusta rikuspankutaq payman k’umuykuranku, wakin discipulonkunan ichaqa iskayaranku. 18  Jinan Jesusqa discipulonkunaman achhuykuspa niran: “Diosmi tukuy atiyta qowan janaq pachapipas kay pachapipas. 19  Chayrayku, llapa nacionmanta runakunaman riychis, jinaspa yachachimuychis discipuloykuna kanankupaq, jinaspa Yayaq, Churiq, santo espirituq sutinpi paykunata bautizamuychis. 20  Qankunaman llapa kamachisqaykunata paykunaman yachachimuychis kasukunankupaq. Noqaqa sapa p’unchaymi qankunawan kashasaq kay tiempoq tukukapunankama”, nispa.

Uraypi willakuykuna

Chayqa karan domingo p’unchaymi, judío runakunapaqqa chaymi karan semana qallariy p’unchay.