Mateo 24:1-51

  • CRISTOQ CHAYAMUSQAN TIEMPO SEÑALKUNAMANTA (1-51)

    • Guerrakuna, yarqaykuna, terremotokuna (7)

    • Allin willakuykunan willakunqa (14)

    • Manchay ñak’ariymi kanqa (21, 22)

    • Runaq Churinpa señalnin (30)

    • Higos sach’a (32-34)

    • Noepa p’unchayninkuna jinan kanqa (37-39)

    • Makillan kashana (42-44)

    • Junt’aq kamachi, millay kamachi ima (45-51)

24  Templomantan Jesusqa ripusharan, jinan discipulonkunaqa payman achhuykuranku chay templota qhawachinankupaq.  Jesustaq paykunata niran: “¿Rikushankichischu llapa kaykunata? Cheqaqtan niykichis: Kaypiqa manapunin juj rumillapas rumi patapi qhepanqachu, llapallanmi thunisqa kanqa”, nispa.  Olivos orqopi Jesús tiyashaqtinmi discipulonkunaqa sapaqllapi payman achhuykuspa tapuranku: “Niwayku, ¿jayk’aqmi chaykuna kanqa? ¿Ima señalmi kanqa chayamusqayki tiempoña* kashaqtin, kay tiempopas tukukapunanpaqña kashaqtin?”, nispa.  Jesustaq paykunata niran: “Cuidakuychis, paqtataq pipas pantachisunkichisman.  Askhan sutiywan sutichakuspa jamunqaku: ‘Noqan Cristoqa kani’, nispa, jinan askhata pantachinqaku.  Qankunaqa tukuyneqpi guerrakuna kasqanmantan uyarinkichis, ichaqa aman mancharikunkichischu; chaykunaqa kananpunin, chaywanpas manaraqmi tukukuychu.  ”Juj nacionmi juj nación contra jatarinqa, juj llaqtataq juj llaqta contra jatarinqa, kayneqpi chayneqpin kanqa yarqaypas terremotokunapas.  Tukuy chaykunaqa nanay* qallariyllaraqmi.  ”Runakunan entregasunkichis ñak’arichisqa kanaykichispaq, jinaspa wañuchisunkichis. Sutiyraykun lliu llaqtakuna cheqnikusunkichis. 10  Chaymantapas, askhan iñiyninkuta saqepunqaku, paykunapuran jap’ichinakunqaku cheqninakunqaku ima. 11  Llulla profetakunapas askhan rijurimunqa, jinaspa askha runakunata pantachipunqaku. 12  Mana allin kausay yapakusqanwantaq yaqa llapa runakunaq munakuynin chiriyapunqa. 13  Tukukuykama aguantaqmi ichaqa salvasqa kanqa. 14  Diospa gobiernonmanta allin willakuykunan pachantinpi willasqa kanqa llapa nacionkuna yachananpaq, jinan tukukuyqa chayamunqa. 15  ”Profeta Danielmi willaran ch’usaqyachiq millakunapaq kaqmanta (kayta leeqqa allin reparaqmi kanan entiendenanpaq), chayta juj ch’uya partepi kashaqta rikuqtiykichisqa 16  Judeapi kaqkuna orqokunaman ayqechunku. 17  Wasi patapi kaqpas amaña wasinman jaykuchunchu ima kaqnintapas orqomunanpaq, 18  chajrapi kaqpas amaña p’achanman kutichunñachu. 19  ¡Ay chay p’unchaykunapi onqoq warmikunamanta, ñuñuq wawayoq warmikunamantapas! 20  Diosmanta mañakushallaychis ayqenaykichis p’unchay ama chiri tiempopichu nitaq sábado p’unchaypichu kananpaq. 21  Chay tiempopiqa manchay ñak’ariymi kanqa, chay ñak’ariy jinaqa manan karanchu kay pachaq qallariyninmantapacha kunankamapas, nitaq qhepamanpas kanqachu. 22  Chay p’unchaykuna mana pisiyachisqachu kanman chayqa, manan pipas* salvasqachu kanman, ajllasqakunaraykun ichaqa chay p’unchaykuna pisiyachisqa kanqa. 23  ”Sichus pipas nisunkichisman: ‘¡Qhawariychis, kaypin Cristoqa kashan!’, otaq ‘¡jaqaypin kashan!’, nispa chayqa, aman creenkichischu. 24  Llulla Cristokunan llulla profetakunan rijurimunqa, jinaspan jatun señalkunata, admiranapaq jina kaqkunatawan ruwanqaku, chaykunawanmi ajllasqakunatawanraq pantachiyta munanqaku. 25  Chaykunataqa ñaupaqmantañan willashaykichis. 26  Chayrayku, runakunachus nisunkichis: ‘¡Qhawariychis, ch’inneqpin kashan!’, nispa chayqa, aman lloqsinkichischu. Otaq: ‘¡Qhawariychis, wasi ukhupin kashan!’, nispa niqtinkupas, aman creenkichischu. 27  Imaynan llifllikiypas inti lloqsimuy ladomanta lloqsimuspa inti jaykuy ladokamaraq k’ancharin, chhaynallataqmi kanqa runaq Churin chayamusqan tiempopas.* 28  Maypichus wañusqa cuerpo kanqa, chaypin ankakunaqa juñukunqaku. 29  ”Chay ñak’ariy p’unchaykuna qhepallatan inti tutayanqa, killapas manaña k’anchanqachu, ch’askakunapas cielomanta urmaykamunqa, cielopi atiykunapas chhafchirisqa kanqa. 30  Chayllamanmi runaq Churinpa señalnin cielopi rijurinqa, jinan kay pachapi llapa ayllukuna llakikuymanta sonqonkuta takakunqaku, runaq Churintataq rikunqaku atiywan sinchi lliflli kaywan phuyupi* jamushaqta. 31  Paymi angelninkunata kachamunqa, paykunataq trompeta sinchita waqashaqtin llapa ajllasqakunata juñunqaku kay pachaq tawantin ladonmanta,* cieloq juj k’uchunmanta juj kaq k’uchunkama. 32  ”Qankunaqa higos sach’aq k’allmachankuna ch’ijchirimuqtin, raphinkunapas lloqsimuqtinmi yachankichis paray tiempoqa cercapiña kashasqanta ¿riki? 33  Chhaynallataq tukuy chaykunata rikuspaykichisqa yachaychis runaq Churin qayllaykamushasqanta, punkupiña kashasqanta. 34  Cheqaqtan niykichis: Manapunin kay tiempo runakunaqa wañunqakuchu llapa chaykuna junt’akunankama. 35  Cielopas kay pachapas tukukapunqan, imachus nisqaykunan ichaqa manapuni tukukunqachu. 36  ”Chay p’unchaymanta chay horamantawanmi ichaqa mana pipas yachanchu, ni janaq pachapi angelkunapas ni Churipas, aswanpas Yayallan yachan. 37  Imaynan Noepa p’unchayninkunapi karan chhaynallataqmi runaq Churinpa chayamusqan tiempopipas* kanqa. 38  Chay p’unchaykunapin manaraq jatun para chayamushaqtin runakuna mijusharanku, ujasharanku, qharikunapas warmikunapas casarakusharanku Noepa arcaman jaykusqan p’unchaykama, 39  manataq imatapas repararankuchu jatun para chayamuspa llapankuta millp’unankama, chhaynallataqmi runaq Churin chayamusqan tiempopas* kanqa. 40  Iskay runakunan chajrapi kashanqaku; jujninmi apasqa kanqa, jujnintaq saqerparisqa kanqa. 41  Iskay warmikunan molino rumipi kutashanqaku; jujninmi apasqa kanqa, jujnintaq saqerparisqa kanqa. 42  Chayrayku, makilla kashaychis, manan yachankichischu ima p’unchaytachus Señorniykichis jamunqa chayta. 43  Kayta yachaychis: Wasiyoq runachus yachanman karan tutapi ima horastachus suwa jamunanta chayqa, rijch’asqallan kashanman karan, chhaynapi wasinta mana jaykunankupaq. 44  Chayrayku, qankunapas listollapuni kashaychis, mana piensasqaykichis horatan runaq Churinqa jamunqa. 45  ”¿Pipunitaq kanman allin yuyayniyoq junt’aq kamachiri? Paytan patronninqa churanqa wasinpi kamachinkunata qhawarinanpaq, tiempollanpi mijunata qonanpaqwan. 46  Chay kamachiqa kusisqan kanqa patronnin kutimuspa chhayna ruwashaqta tariqtinqa. 47  Cheqaqtan niykichis: Paytan patronqa llapa kaqninkuna qhawaqta churanqa. 48  Chay kamachitaqchus millayman tukupuspa sonqonpi ninman: ‘Patronniyqa jayk’aqraqchá kutimunqa’, nispa, 49  jinaspa kamachimasinkunata maqayta qallarinman, machaqkunawantaq mijunmanpas ujanmanpas chayqa, 50  patronninmi mana suyasqan p’unchayta mana yachasqan horata jamuspa 51  sinchita castiganqa, jinaspa iskay uyakunatawan kuskata churanqa. Chaypin payqa waqanqa, mana imanakuyta atispataq kiruntaraq k’achachachinqa.

Uraypi willakuykuna

Qhaway “explicasqa simikuna” nisqapi “Cristoq chayamusqan tiempo” nisqata.
Chaypiqa rimashan onqokuq warmiq nanaynin jina nanaymantan.
Griego rimaypiqa “manan ima aychapas” ninmi.
Qhaway “explicasqa simikuna” nisqapi “Cristoq chayamusqan tiempo” nisqata.
Griego rimaypiqa “cielo phuyupi” ninmi.
Griego rimaypiqa “tawantin wayramanta” ninmi.
Qhaway “explicasqa simikuna” nisqapi “Cristoq chayamusqan tiempo” nisqata.
Qhaway “explicasqa simikuna” nisqapi “Cristoq chayamusqan tiempo” nisqata.