Mateo 23:1-39

  • Manan kamachikuy simi yachachiqkuna jinachu, ni fariseokuna jinapaschu kana (1-12)

  • ¡Ay kamachikuy simita yachachiqkunamanta fariseokunamantapas! (13-36)

  • Jerusalenmanta Jesuspa llakikusqan (37-39)

23  Chaymantataq Jesusqa llapa runakunata discipulonkunatawan niran:  “Kamachikuy simita yachachiqkunapas fariseokunapas Moisés jina atiyniyoqpaqmi creekunku.  Chayrayku, tukuy ima nisqasuykichistapas ruwallaychis, ichaqa aman paykuna jinaqa ruwankichischu, paykunaqa nishaspankupas manan ruwankuchu.  Imapas kamachisqankuqa llasa q’epikuna jinan, chaytataq runakunaman q’epichinku, paykunataqmi ichaqa mana dedollankuwanpas chayta kuyurichiyta munankuchu.  Paykunaqa runakunaq rikunallanpaqmi tukuy imatapas ruwanku; mat’inkupi lloq’e makinkupiwan watakusqanku cajachakunatan* jatunyachinku, p’achankuq cantonpi q’aytukunatapas jatunmanmi tukuchinku.  Jatun mijuykunapipas allin kaq tiyanallapin tiyayta munanku, sinagogakunapipas ñaupaqllapin tiyayta munanku.  Mercado plazakunapipas napaykunatan munanku, runakunaq ‘yachachikuq’* nispa ninankutataq munankupas.  Qankunan ichaqa ama ‘yachachikuq’ nispaqa nichikunkichischu, jujllan yachachiqniykichisqa, qankunaqa llapaykichispas wayqe-panallantinmi kankichis.  Amataq kay pachapiqa pitapas ‘yayáy’ ninkichischu, jujllan Yayaykichisqa janaq pachapi kaqlla. 10  Amallataq piwanpas ‘umalli’ nispaqa nichikunkichischu, jujllan umalliykichisqa, payqa Criston. 11  Pipas qankuna ukhupi kuraqpaq qhawarikuqqa serviqniykichismi kanan. 12  Pipas jatunchakuqqa k’umuchisqan kanqa, pipas k’umuykukuqtaq jatunchasqa kanqa. 13  ”¡Ay qankunamanta, iskay uya fariseokuna, kamachikuy simita yachachiqkuna! Janaq pacha gobiernoq punkuntan wisq’ankichis runakuna mana jaykunanpaq, manataqmi qankunapas jaykunkichischu, jaykuy munaqkunatapas jark’ankichismi. 14  *—— 15  ”¡Ay qankunamanta, iskay uya fariseokuna, kamachikuy simita yachachiqkuna! Lamar-qochanta ch’aki allpanta imaraqmi purinkichis juj runallatapas t’aqaykichisman jaykuchinaykichispaq, t’aqaykichisman jaykuqtintaq Gehenapaq* tukuchipunkichis, qankuna jinataq iskay kuti juchayoqman tukupunpas. 16  ”¡Ay qankunamanta, ñausa umallikuna! Qankunan ninkichis: ‘Pipas templorayku juran chayqa, manan imananpaschu; pipas templopi qorirayku juraqmi ichaqa junt’ananpuni’, nispa. 17  ¡Mana allin yuyayniyoq ñausakuna! ¿Mayqentaq aswan allin? ¿Qorichu, icha qorita ch’uyanchaq templochu? 18  Qankunan nillankichistaq: ‘Pipas altar-rayku juran chayqa, manan imananpaschu; pipas altar patapi kaq ofrendarayku juraqmi ichaqa junt’ananpuni’, nispa. 19  ¡Ñausakuna! ¿Mayqentaq aswan allin? ¿Ofrendachu, icha ofrendata ch’uyanchaq altarchu? 20  Chhaynaqa, pipas altar-rayku juraqqa manan altar-raykullachu juran, aswanpas llapa chay patapi kaqkunarayku iman. 21  Pipas templorayku juraqpas manan temploraykullachu juran, aswanpas chay wasipi tiyaqrayku iman. 22  Pipas janaq pacharayku juraqpas Diospa trononraykun juran, chay tronopi tiyaqrayku ima. 23  ”¡Ay qankunamanta, iskay uya fariseokuna, kamachikuy simita yachachiqkuna! Qankunaqa diezmotan qoshankichis mentamanta, eneldomanta,* cominomantawan; kamachikuy simimanta aswan allin kaqkunatan ichaqa mana ruwankichischu, chaykunan: chanin kay, khuyapayakuq kay, junt’aq kay ima. Diezmotaqa qonaykichispunin karan, ichaqa manan juj ruwaykunatapas qonqanaykichischu karan. 24  ¡Ñausa umallikuna! Qankunaqa ch’uspitan suysunkichis, camellotan ichaqa enterollata millp’uykunkichis. 25  ”¡Ay qankunamanta, iskay uya fariseokuna, kamachikuy simita yachachiqkuna! Copatapas platotapas jawallantan maqchinkichis, ukhuntaq ichaqa junt’a kashan munapayaywan, sonqoykichispa tukuy munasqanpi puriypiwan. 26  Yau ñausa fariseo, ñaupaqtaqa copatapas platotapas ukhuntaraq maqchiy, chhaynapi jawanpas limpio kananpaq. 27  ”¡Ay qankunamanta, iskay uya fariseokuna, kamachikuy simita yachachiqkuna! Yuraqyachisqa sepulturakunamanmi rijch’akunkichis, chaykunaqa jawallanmantan munay rikukun, ukhuntaq ichaqa wañusqakunaq tullunwan, imaymana millakuna kaqkunapiwan junt’a kashan. 28  Chhaynan qankunapas runakunaq rikunallanpaq Dios sonqo runaman tukunkichis, sonqoykichistaq ichaqa junt’a kashan iskay uya kaywan mana allin ruwaykunapiwan. 29  ”¡Ay qankunamanta, iskay uya fariseokuna, kamachikuy simita yachachiqkuna! profetakunaq sepulturantan ruwankichis, Dios sonqo runakunaq sepulturantapas munaymanmi tukuchinkichis. 30  Ninkichistaq: ‘Ñaupa taytanchiskunaq tiemponpi kausasunman karan chayqa, manan profetakunata wañuchiqmasinkuchu kasunman karan’, nispa. 31  Chhaynapin qankunallataq willakunkichis profetakunata wañuchiqkunaq wawankuna kasqaykichista. 32  Chhaynaqa, tukupaychisyá ñaupa taytaykichiskunaq ruway qallarisqankuta. 33  ”¡Mach’aqwaykuna, arí, mach’aqway miraykunan kankichis! Qankunaqa manapunin ayqenkichischu Gehenapaq juzgasqa kanaykichismantaqa. 34  Qhawariychis, qankunamanmi kachamushaykichis profetakunata, yachayniyoq runakunata, yachachiqkunata ima. Paykunamanta wakintan wañuchinkichis, wakintataq k’aspipi warkunkichis, wakintataq sinagogaykichiskunapi waqtaykunkichis, wakintañataq llaqtan-llaqtanta qatikachankichis. 35  Chhaynapin kay pachapi chanin runakunaq yawarnin jich’akusqanmanta qankuna juchayoq kankichis, chanin Abelpa yawarninmantapacha Baraquiaspa wawan Zacariaspa yawarninkama, paytan qankunaqa wañuchirankichis temploq pationpi altarpa qayllanpi. 36  Cheqaqtan niykichis: Llapan chaykunaqa kay tiempo runakunamanmi chayamunqa. 37  ”¡Jerusalén, Jerusalén, qanmi kanki profetakunata wañuchiq, qanman kachamusqakunata rumiwan ch’aqeqpas! ¡Askha kutitan wawaykikunata juñuyta munarani imaynan wallpapas chiuchinkunata rafran ukhupi oqllan jinata, qankunan ichaqa mana munarankichischu! 38  Chayraykun wasiykichis* qankunaman saqerparisqa kanqa.* 39  Chaymi niykichis: Kunanmantaqa manapunin rikuwankichisñachu: ‘Sumaqpaq qhawarisqa kachun Jehová Diospa sutinpi jamuqqa’, ninaykichiskama”, nispa.

Uraypi willakuykuna

Chay cajachakunapin karan Diospa simin qelqakuna. Chaytan judío runakunaqa watakuqku mana allin kaqmanta pakaykusqa kanankupaq.
Hebreo rimaypiqa “rabí” ninmi.
Kay versiculoqa manan rijurinchu “Westcott, Hort” nisqa griego qelqakunapi, nitaq wakin allin reqsisqa qelqakunapipas.
“Gehena” nisqaqa Jerusalén llaqtaq cantonpi q’opa kanana wayq’on karan.
Eneldoqa anís planta jinan, chaywanmi mijunata sumaqyachiqku.
Chaypiqa templomantan rimashan.
Chaytaqa “qankunaman ch’usaqta saqerparipunqa” nispapas t’ijrakullanmantaqmi.