Mateo 22:1-46

  • Casarakuy fiestamanta (1-14)

  • Diosmanta, Roma reymantawan (15-22)

  • Kausarimpuymanta Jesusta tapunku (23-33)

  • Iskay jatun kamachikuykunamanta (34-40)

  • ¿Davidpa churinchu Cristo karan? (41-46)

22  Wajmantan Jesusqa ejemplokunata churaran:  “Janaq pacha gobiernoqa kaymanmi rijch’akun: Juj reymi casarakuy fiestata qhari wawanpaq ruwaran.  Chay reymi kamachinkunata kacharan casarakuy fiestaman invitasqa runakunata wajamunankupaq, paykunan ichaqa mana jamuyta munarankuchu.  Juj kamachinkunatan wajmanta kachallarantaq, paykunatan niran: ‘Invitasqakunata nimuychis: “Wayk’uchiniñan mijunata, toroykunapas wirayachisqa uywaykunapas nak’asqañan kashan, tukuy imapas listoñan kashan. Jamuychis casarakuy fiestaman”’, nispa.  Invitasqakunan ichaqa mana uyariqpas tukurankuchu, aswanmi ripuranku wakin chajrankuman, wakintaq negocionkuman;  wakintaqmi reypa kamachinkunata jap’ispa millayta k’amiykuranku maqaykuranku ima, jinaspa wañuchipuranku.  ”Chaywanmi reyqa sinchita phiñakuran, chaymi soldadonkunata kacharan, paykunataq chay wañuchiqkunata wañuchipuranku, llaqtankutapas kanaykapuranku.  Chaymantataq reyqa kamachinkunata niran: ‘Casarakuy fiestapaqqa tukuy imapas listoñan kashan, invitasqakunan ichaqa mana chaypaq jinachu karanku.  Chayrayku, jatun ñankunaman riychis, jinaspa llapa tarimusqaykichis runakunata kay casarakuy fiestaman wajamuychis’, nispa. 10  Chaymi chay kamachikunaqa ñankunaman lloqsispa llapa tarisqanku runakunata juñumuranku, millay runakunaña allin runakunaña karanku chaypas; chhaynapin casamiento wasiqa invitasqakunawan* junt’a kasharan. 11  ”Invitasqa runakunata qhawaq jaykuspanmi reyqa chaypi rikuran casarakuy p’achawan mana p’achasqa runata. 12  Chaymi reyqa niran: ‘Amigo, ¿imaynapitaq kaymanri jaykumuranki casarakuy p’achawan mana p’achasqa?’, nispa. Paytaq ch’inlla karan. 13  Jinan reyqa kamachinkunata niran: ‘Makintawan chakintawan wataruspa tutayaq jawaman wijch’umuychis. Chaypin payqa waqanqa, mana imanakuyta atispataq kiruntaraq k’achachachinqa’, nispa. 14  ”Askhan invitasqakunaqa, pisillataqmi ajllasqakunaqa”, nispa. 15  Chaymantataq fariseokunaqa rispa rimanakuranku Jesusta rimasqanpi pantachinankupaq. 16  Jinaspan paykunaqa qatikuqnin runakunata Herodespa t’aqanmanta kaqkunatawan kacharanku khaynata nimunankupaq: “Yachachikuq, yachaykun cheqaq rimaq kasqaykita, Diospa ñanninmantapas cheqaqta yachachisqaykita, qanqa manan jujkunaq allin qhawarinantachu maskhanki, manataqmi runakunaq jawallantachu qhawankipas. 17  Chayrayku, ¿ima niwaqtaq? ¿Allinchu Roma reyman* impuesto pagay, icha manachu?”, nispa. 18  Jesustaq mana allin piensasqankuta yachaspa paykunata niran: “Yau iskay uyakuna, ¿imaraykun pruebaman churawankichis? 19  Impuesto pagana qolqeta qhawachiwaychis”, nispa. Jinan paykunaqa juj denario* qolqeta jaywaranku. 20  Jesustaq paykunata niran: “¿Piqpa uyanmi kaypi kashan? ¿Piqpan kay sutipas?”, nispa. 21  Paykunataq niranku: “Roma reypan”, nispa. Jinan Jesusqa niran: “Chhaynaqa, Roma reypa kaqtaqa Roma reyman qopuychis, Diospa kaqtataq Diosman qopuychis”, nispa. 22  Chayta uyarispan anchata admirakuranku; Jesusta saqespataq ripuranku. 23  Chay p’unchaypin “kausarimpuyqa manan kanchu” niq saduceokunaqa Jesusman achhuykuspa niranku: 24  “Yachachikuq, Moisesmi niran: ‘Pipas mana wawayoq wañukapunman chayqa, wayqenmi chay wañuqpa esposanwan casarakapunqa, chhaynapi wawata churiyapunanpaq’, nispa. 25  Noqayku ukhupin karan qanchis runakuna wayqentinkama. Ñaupaq kaqmi casarakuran, chaymantataq wañukapuran, mana wawayoq wañupusqanraykutaq wayqenqa viudawan casarakapuran. 26  Chhaynallataqmi karan iskay kaqwan, kinsa kaqwan, llapan qanchisnintinwanpas. 27  Chay qhepamanqa chay warmipas wañukapullarantaqmi. 28  Qanchisninkutaq chay warmiwan casarakuranku chayqa, ¿mayqenninkuq esposantaq kanqa kausarimpuy kaqtinri?”, nispa. 29  Jinan Jesusqa paykunata niran: “Qankunaqa manan entiendenkichischu Diospa simin qelqatapas ni imaynachus Diospa atiynin kasqantapas, chaymi pantashankichis. 30  Kausarimpuy kaqtinqa manan qharikunapas warmikunapas casarakunqakuchu, aswanpas paykunaqa janaq pachapi angelkuna jinan kanqaku. 31  Wañupuqkunaq kausarimpunanmantaqa, ¿manachu leerankichis Diospa imachus nisqasuykichista? Paymi niran: 32  ‘Noqan kani Abrahanpa Diosnin, Isaacpa Diosnin, Jacobpa Diosnin’, nispa. Payqa manan wañusqakunaq Diosninchu, aswanpas kausaqkunaq Diosninmi”, nispa. 33  Chayta uyarispan runakunaqa anchata admirakuranku yachachisqanmanta. 34  Saduceokunata Jesuspa upallachisqanmanta uyarispan fariseokunaqa juñunakuspa Jesusman jamuranku. 35  Paykunamanta jujninmi karan kamachikuy simita allinta yachaq, paymi pruebaman churananpaq Jesusta tapuran: 36  “Yachachikuq, kamachikuy simipi kaq kamachikuykunamanta, ¿mayqenmi aswan jatun?”, nispa. 37  Jinan Jesusqa niran: “‘Jehová Diosniykitan munakunki tukuy sonqoykiwan, tukuy almaykiwan,* tukuy yuyayniykipiwan’. 38  Chaymi ñaupaq kaq aswan jatun kamachikuyqa. 39  Chay kamachikuy jina iskay kaq kamachikuytaq kay: ‘Runamasiykitan munakunki qan kikiykita jina’, nisqa. 40  Chay iskaynin kamachikuykunamantan paqarimun llapa kamachikuy simipas profetakunaq qelqasqanpas”, nispa. 41  Fariseokuna chayllapiraq juñunasqa kashaqtinkun Jesusqa paykunata tapuran: 42  “¿Ima niwaqchistaq Cristomanta? ¿Piqpa Churintaq payri?”, nispa. Paykunataq: “Davidpa Churinmi”, niranku. 43  Jinan Jesusqa paykunata niran: “Chhaynaqa, ¿imaynapitaq Davidri Diospa yuyaychasqan kaspa ‘Señor’ nispa niran? Davidmi niran: 44  ‘Jehová Diosmi Señorniyta niran: “Paña ladoypi tiyaykuy, enemigoykikunata chaki sarunaykiman churanaykama”’, nispa. 45  Chhaynaqa, Davidtaq Cristota ‘Señor’ niran chayqa, ¿imaynapitaq payri Churin kanman?”, nispa. 46  Manan pipas ni juj simillatapas paymanqa kutichiyta atiranchu, manataqmi chay p’unchaymantaqa pipas tapuyta munaranñachu.

Uraypi willakuykuna

Chaypiqa “mesapi tiyaqkunawan” nillanmantaqmi.
Griego rimaypiqa “Cesarman” ninmi. Chhaynatan sutichaqku Roma llaqtapi wakin reykunata.
Juj denario qolqeqa karan juj p’unchay llank’asqamanta pagon.
Qhaway “explicasqa simikuna” nisqapi “alma” nisqata.