Mateo 20:1-34

  • Uvas chajrapi llank’aqkuna igual-llata pagonkuta chaskisqankumanta (1-16)

  • Wañunanmantan Jesús wajmanta willakun (17-19)

  • Diospa gobiernonpi allin puestota mañakuqkunamanta (20-28)

    • Askha runakunaraykun Jesusqa vidanta qoran (28)

  • Iskay ñausakuna qhaliyachisqa kasqanmanta (29-34)

20  ”Janaq pacha gobiernoqa uvas chajrayoq runamanmi rijch’akun, chay runan tutallamanta lloqsiran chajranpi llank’achinanpaq runakunata contrataq.  Llank’apakuqkunata tarispataq paykunawan rimanakuran juj p’unchaymanta juj denario* qolqeta pagapunanpaq, jinaspa uvas chajranman kacharan.  Las nueveta jina* wajmanta lloqsispan mercado plazapi rikullarantaq qasi sayashaq runakunata.  Jinan paykunata niran: ‘Qankunapas uvas chajrayman llank’aq riychis, iman paganatan pagapusaykichis’, nispa.  Chaymi paykunaqa riranku. Chajrayoqmi lloqsillarantaq las doceta jina,* chaymantataq tardenta las tresta jina,* chaypipas kaqllatataqmi ruwaran.  Las cincota jinaña* lloqsispan chajrayoqqa tarillarantaq qasi sayashaq runakunata, jinan paykunatapas niran: ‘¿Imanaqtinmi kaypi ch’isiyaq sayashankichis mana imata ruwaspa?’, nispa.  Chaymi paykunaqa niranku: ‘Manan pipas contratawankuchu’, nispa. Jinan chajrayoqqa niran: ‘Chhaynaqa, qankunapas uvas chajrayman llank’aq riychis’, nispa.  ”Ch’isinyashaqtintaq uvas chajrayoqqa llank’achiq encargadota niran: ‘Llank’aqkunata wajamuspa pagapuy, qhepa chayamuqkunamanta qallarispan ñaupaq chayamuqkunapi tukunki’, nispa.  Las cincota jina* llank’ayta qallariqkunan jamuspanku juj denario qolqeta sapankanku chaskiranku. 10  Chaymi ch’isiyaq llank’aqkunaqa masta chaskinankupaq piensasharanku, ichaqa paykunapas juj denario qolqetan chaskillarankutaq. 11  Chayta chaskikuspan paykunaqa chajrayoqmanta rimapakuyta qallariranku, 12  jinaspa payta niranku: ‘Kay qhepa chayamuqkunaqa juj horallamá llank’anku, noqaykun ichaqa ruphaypa chayasqan sayk’usqallaña ch’isiyaq llank’aykuyku, ¿chaychu paykunamanqa noqaykuman jinallataq pagapushanki?’, nispa. 13  Chajrayoqtaq paykunamanta jujninta niran: ‘Amigo, noqaqa manan ima mana allintachu ruwashayki. ¿Manachu rimaranchis juj denario qolqeta pagapunaypaq? 14  Pagoykita aparikuspa ripuy. Noqaqa kay qhepa chayamuqkunamanpas qanman jinallataqmi pagapuyta munani. 15  ¿Manachu qolqeywanqa ima munasqaytapas ruwayman? Icha, ¿envidiakushankichu paykunapaq allin kaqta ruwapusqaymanta?’, nispa. 16  Chhaynallataqmi qhepapi kaqkunaqa ñaupaqpi kanqaku, ñaupaqpi kaqkunataq qhepapi kanqaku”, nispa. 17  Jerusalén llaqtaman rishaqtinkun Jesusqa chunka iskayniyoq discipulonkunata sapaqman pusaspa niran: 18  “Jerusalén llaqtamanmi wichashanchis, chaypin runaq Churinqa umalli sacerdotekunaman, kamachikuy simi yachachiqkunamanwan entregasqa kanqa. Paykunan wañunanpaq juchachanqaku, 19  jinaspa waj nacionmanta runakunaman entreganqaku burlakunankupaq, soq’aykunankupaq, k’aspipi warkunankupaq ima; kinsa p’unchaymantan ichaqa kausarichisqa kanqa”, nispa. 20  Chaymantataq Zebedeoq esposanqa qhari wawankunapiwan Jesusman achhuykuspa valekunanpaq k’umuykuran. 21  Chaymi Jesusqa niran: “¿Imatan munanki?”, nispa. Warmitaq niran: “Valekuykin kay iskay wawaykuna gobiernoykipi qanwan kuska tiyanankupaq, jujnin paña ladoykipi jujnintaq lloq’e ladoykipi”, nispa. 22  Jinan Jesusqa chay warmiq wawankunata niran: “Qankunaqa manan yachankichischu imatachus mañakushankichis chayta. ¿Atiwaqchischu ujanayña kashan chay copa* ujayta?”, nispa. Paykunataq niranku: “Atisaqkun”, nispa. 23  Jinan Jesusqa niran: “Ujankichismi copaytaqa, paña ladoypi lloq’e ladoypi pipas tiyananmi ichaqa mana noqaq ninaychu, aswanpas Yayaymi ajllanqa pikunachus chaypi tiyanqa chaytaqa”, nispa. 24  Chayta yachaspan chunka discipulokunaqa phiñakuranku chay iskaynin wayqekunapaq. 25  Jesustaq paykunata wajaspa niran: “Yachasqaykichis jina, nacionkunapi kamachikuqkunaqa kamachisqan runakunatan dueñochakunku, umalli kaqkunapas jujkunatan sarunchanku. 26  Qankuna ukhupin ichaqa mana chhaynachu kanan, aswanmi pipas qankuna ukhupi kuraq kayta munaqqa serviqniykichis kanan, 27  mayqenniykichispas ñaupaqpi kayta munaqtaq kamachiykichis kanan. 28  Runaq Churinpas manan servichikuqchu jamuran, aswanpas jujkunata servinanpaqmi, vidanwan* pagaspa askha runakunata kacharichinanpaqwan”, nispa. 29  Jericó llaqtamanta lloqsishaqtinkun ancha askha runakuna Jesusta qatikuranku. 30  Ñan patapin iskay ñausakuna tiyasharanku, jinan chayninta Jesuspa pasashasqanta uyarispa kallpawan wajakuranku: “¡Davidpa Churin Señor, khuyapayaykuwayku!”, nispa. 31  Runakunataq chay ñausakunata phiñarikuranku upallanankupaq, paykunan ichaqa astawanraq wajakuranku: “¡Davidpa Churin Señor, khuyapayaykuwayku!”, nispa. 32  Jinan Jesusqa sayaykuran, paykunata wajaspataq niran: “¿Ima ruwapunaytan munankichis?”, nispa. 33  Paykunataq niranku: “Señor, ñawiykuta kichariwayku”, nispa. 34  Chaymi Jesusqa anchata khuyapayaspa ñawinkuta llamiykuran, jinan paykunaqa kaq rato qhawaripuranku, chaymantataq payta qatikuranku.

Uraypi willakuykuna

Juj denario qolqeqa karan juj p’unchay llank’asqamanta pagon.
Griego rimaypiqa “kinsa kaq horata jina” ninmi, chaytaqa yupaqku intiq lloqsimusqanmantapachan.
Griego rimaypiqa “soqta kaq horata jina” ninmi, chaytaqa yupaqku intiq lloqsimusqanmantapachan.
Griego rimaypiqa “isqon kaq horata jina” ninmi, chaytaqa yupaqku intiq lloqsimusqanmantapachan.
Griego rimaypiqa “11 horata jinaña” ninmi, chaytaqa yupaqku intiq lloqsimusqanmantapachan.
Griego rimaypiqa “11 horata jina” ninmi, chaytaqa yupaqku intiq lloqsimusqanmantapachan.
Jesustan wañuchinanku karan Diosta k’amiqmanta tumpaspa, Diostaq mana chayta jark’ananchu karan, chaytan chay copaqa representan.
Chaypiqa “almanwan” nillanmantaqmi.