Mateo 2:1-23

  • Ch’aska qhawaq watuqkunaq visitasqankumanta (1-12)

  • Egiptoman ayqekusqankumanta (13-15)

  • Herodes wawakunata wañuchisqanmanta (16-18)

  • Nazaretman kutimpusqankumanta (19-23)

2  Rey Herodes* kamachikushaqtinmi Jesusqa naceran Judeapi kaq Belén llaqtapi, chay qhepamantaq inti lloqsimuy ladomanta Jerusalén llaqtaman jamuranku ch’aska qhawaq watuqkuna,  jinaspa tapukuranku: “¿Maypin kashan judío runakunaq reynin kananpaq naceq wawa? Inti lloqsimuy ladopi kashaspaykun ch’askanta rikumuyku, chaymi kunan jamushayku payman k’umuykunaykupaq”, nispa.  Chayta uyarispan rey Herodesqa mana imanakuytapas atiranchu, kaqllataq Jerusalén llaqtapi llapa runakunapas.  Chaymi payqa juñuran llapa umalli sacerdotekunata kamachikuy simi yachachiqkunatawan, jinaspa tapuyta qallariran maypichus Cristo* nacenan karan chayta.  Paykunataq niranku: “Judeapi kaq Belén llaqtapin. Khaynatan profetaqa qelqasqa:  ‘Judá allpapi kaq Belén, qanqa Judapi kamachikuqkuna ukhupiqa manapunin aswan juch’uyllaqa kawaqchu, qanmantan juj kamachikuq lloqsimunqa, paymi Israel llaqtayta michinqa’”, nispa.  Jinan Herodesqa ch’aska qhawaq watuqkunata pakallapi wajachimuran, jinaspa allin-allinta tapuykuran jayk’aqchus chay ch’aska rijuriran chayta.  Belenman kacharparispataq niran: “Riychis, jinaspa allintapuni maskhamuychis chay erqechata, tarimuspaykichistaq kutimuspa willawankichis, chhaynapi noqapas rispa payman k’umuykamunaypaq”, nispa.  Jinan paykunaqa reyta uyarispa puriripuranku, chayllamanmi inti lloqsimuy ladopi rikumusqanku ch’askaqa wajmanta rijuriran, jinaspa ñaupankuta riran, erqechaq kasqan wasiman chayaspataq altonpi sayaykuran. 10  Ch’askaq sayaykusqanta rikuspankun paykunaqa anchatapuni kusikuranku. 11  Wasiman jaykuspataq erqechata rikuranku maman Mariatawan, jinaspa qonqorikuspa erqechaman k’umuykuranku. Qhapaq kaykuna apamusqankutapas payman qoranku: qorita, yuraq inciensota, sumaq q’apaq mirratawan. 12  Ichaqa Diosmi mosqoyninkupi niran ama Herodesman kutinankupaq, chaymi paykunaqa waj ñanninta llaqtankuman kutipuranku. 13  Paykuna pasapuqtinkun Jehová Diospa angelninqa Joseman mosqoyninpi rijurispa niran: “Jatariy, erqechata mamantawan pusarikuspa Egiptoman usqhaylla ayqekuy, jinaspa chaypi tiyamuy noqa willamunaykama, Herodesmi erqechata maskhamunqaña wañuchinanpaq”, nispa. 14  Jinan Joseqa jatarispa erqechata mamantawan pusarikuspa chay tutapacha Egiptoman ripuran. 15  Chaypin tiyamuran Herodespa wañupunankama, chhaynapin Jehová Diospa nisqan junt’akuran. Paymi profetanwan niran: “Egiptomantan Churiyta wajamurani”, nispa. 16  Herodestaq manchaytaraq phiñakuran ch’aska qhawaq watuqkuna paymanta aswan yuyaysapa kasqankuta reparaspa, chaymi runankunata kacharan Belén llaqtapi, lliu muyuriqninpi kaq llaqtakunapiwan iskay watayoqmanta urayman llapa qhari wawakunata wañuchimunankupaq, chaytaqa ruwaran jayk’aqchus ch’aska qhawaqkuna ch’askata rikuranku chayta yachasqanraykun. 17  Chhaynapin chay tiempopi junt’akuran profeta Jeremiaspa willasqan, paymi niran: 18  “Ramá llaqtapin uyarikuran khuyay waqay, sonqo nanayta qapariy ima. Raquelmi wawankunamanta waqasharan, manataqmi pipas sonqonta tiyaykachiyta atiranchu wawankuna manaña kapusqanrayku”, nispa. 19  Herodes wañupuqtintaq Jehová Diospa angelninqa Joseman mosqoyninpi rijurillarantaq Egipto llaqtapi, 20  jinaspa niran: “Jatariy, erqechata mamantawan pusarikuspa Israel llaqtaman kutipuy, erqechata* wañuchinankupaq maskhaqkunaqa ñan wañupunkuña”, nispa. 21  Jinan Joseqa jatarispa erqechata mamantinta pusarikuspa Israel llaqtaman kutimpuran. 22  Ichaqa Herodespa churin Arquelao taytanpa rantinpi Judeapi kamachikushasqanta yachaspan manchakuran chayman riyta. Chaymi mosqoypi Diospa willasqan kaspa Galileaman ripuran. 23  Chayman chayaspataq “Nazaret” nisqa llaqtapi tiyaran, chhaynapin profetakunaq willasqan junt’akuran. Paykunan niranku: “‘Nazaret llaqtayoq’* nisqan kanqa”, nispa.

Uraypi willakuykuna

Chay reytaqa “Jatun Herodes” niqkun.
Chayqa “Mesías” otaq “ajllasqa” nillanmantaqmi.
Chaypiqa “erqechaq almanta” nillanmantaqmi.
Qhaway “explicasqa simikuna” nisqapi “Nazaret llaqtayoq” nisqata.