Mateo 19:1-30

  • Casarakuymanta t’aqanakuymantawan (1-9)

  • Soltero kay allin kasqanmanta (10-12)

  • Wawakunata Jesuspa bendecisqanmanta (13-15)

  • Qhapaq waynaq tapukusqanmanta (16-24)

  • Diospa gobiernonrayku imakuna saqenamanta (25-30)

19  Chaykunata rimayta tukuspan Jesusqa Galileamanta ripuran, Jordán mayuta chimpaspataq Judea llaqta ladoman chayaran.  Ancha askha runakunataq payta qatikuranku, jinaspa onqosqakunata qhaliyachiran.  Fariseokunataq payman achhuykuspa pruebaman churayta munaspa tapuranku: “¿Atinmanchu juj runa esposanmanta imaraykullapas t’aqakapuyta?”,* nispa.  Jesustaq niran: “¿Manachu leerankichis runata kamaqqa qallariymantapacha qharita warmitawan kamasqanta?  Paymi niran: ‘Chayraykun runaqa taytantapas mamantapas saqepunqa, jinaspa esposanman jujllachakapunqa, iskayninkutaq juj aychalla kapunqaku’, nispa.  Chhaynaqa manan iskayñachu kanku, aswanpas juj aychallañan. Chayrayku, Diospa jujllachasqantaqa ama pipas t’aqachunchu”, nispa.  Paykunataq niranku: “Chhaynaqa, ¿imaraykutaq Moisesri kamachiran pi runapas t’aqanakuy papelta qospa esposanmanta t’aqakapunanpaq?”, nispa.  Jinan Jesusqa niran: “Moisesqa k’ullu sonqo kasqaykichisraykun mana jark’arasunkichischu esposaykichismanta t’aqakapunaykichista, ichaqa manan chhaynachu qallariypiqa karan.  Chayraykun niykichis: Pipas esposan qhelli juchaman mana urmashaqtin paymanta t’aqakuspa jujwan casarakunman chayqa, pantay juchamanmi urmashanman”, nispa. 10  Jinan discipulonkunaqa niranku: “Chhaynataq chayqa, yanqañachá kanman casarakuyqa”, nispa. 11  Jesustaq paykunata niran: “Manan lliuchu chayman jina ruwayta atinkuman, aswanpas pikunatachus Dios yanapan chaykunallan.* 12  Wakinmi mana casarakuyta atinkuchu mana allin nacesqankurayku,* wakintaq runakunaq capasqanrayku; jujkunataq mana casarakunkuchu janaq pacha gobiernorayku. Pipas chhayna kayta atiqqa kallachun”, nispa. 13  Chaymantataq runakunaqa wawakunata Jesusman apamuranku makinta paykunaman churaykuspa Diosmanta mañapunanpaq, discipulokunan ichaqa paykunata phiñarikuranku. 14  Jinan Jesusqa niran: “Jinalla wawakunaqa noqaman jamuchunku, ama jark’aychischu, janaq pacha gobiernoqa paykunapaqmi”, nispa. 15  Chay wawakunaman makinta churaykuspataq chaymanta ripuran. 16  Juj waynan payman achhuykuspa niran: “Yachachikuq, ¿ima allinkunatan ruwanay wiñay kausayta chaskinaypaq?”, nispa. 17  Jesustaq niran: “¿Imanaqtinmi noqata tapuwanki imachus allin kasqanmanta? Jujllan ninman imachus allin kasqantaqa.* Kausaytachus chaskiyta munanki chayqa, kamachikuykunatan tukuy tiempo kasukunayki”, nispa. 18  Paytaq niran: “¿Mayqen kamachikuykunata?”, nispa. Jinan Jesusqa niran: “Aman pitapas wañuchinkichu, aman jujwan pantankichu, aman suwakunkichu, aman llullakuspa yanqamanta tumpankichu, 19  tayta-mamaykitan respetanki, runamasiykitapas qan kikiykita jinan munakunki”, nispa. 20  Chay waynataq niran: “Chaykunataqa llapantan junt’ashani, ¿imatawanraqtaq ruwanayri?”, nispa. 21  Jinan Jesusqa niran: “Dios serviyniykita allintapuni junt’ayta munanki chayqa, phaway kaqniykikunata vendemuy, chaytataq wajchakunaman qomuy, chhaynapin janaq pachapi qhapaq kayniyki kanqa; jinaspa qatikamuway”, nispa. 22  Chayta uyarispan waynaqa sinchi llakisqa ripuran askha kaqniyoq kasqanrayku. 23  Chaymi Jesusqa discipulonkunata niran: “Cheqaqtan niykichis: Qhapaq runapaqqa sasapunin kanqa janaq pacha gobiernoman jaykuyqa. 24  Nillaykichistaqmi: Camelloraqmi agujaq ninrinta suskhuyta atinman juj qhapaq runa Diospa gobiernonman jaykunanmantaqa”, nispa. 25  Chayta uyarispan discipulonkunaqa ancha admirasqa niranku: “Chhaynaqa, ¿pillañataq salvasqari kanman?”, nispa. 26  Jesustaq paykunata qhawaykuspa niran: “Runakunaqa manan atinkumanchu chay ruwaytaqa, Diospaqmi ichaqa tukuy imapas atikuqlla”, nispa. 27  Jinan Pedroqa niran: “Noqaykuqa tukuy imata saqespaykun qatikamushaykiku, ¿imataq noqaykupaqri kanqa?”, nispa. 28  Jesustaq paykunata niran: “Cheqaqtan niykichis: Tukuy imapas mosoqyachisqa kanan tiempopin runaq Churinqa qhapaq trononpi tiyaykunqa, chaypin qankuna qatikamuwaqniykunapas, chunka iskayniyoq tiyanakunapi tiyaykullankichistaq, jinaspa Israelpa chunka iskayniyoq ayllunkunata juzgankichis. 29  Pipas wasintapas, wayqenkunatapas, panankunatapas, taytantapas, mamantapas, wawankunatapas, allpankunatapas sutiyrayku saqeqqa, pachaj kutitawanraqmi chaskinqa, wiñay kausaytaq herencian kanqa. 30  ”Askha ñaupaqpi kaqkunan qhepapi kanqaku, askha qhepapi kaqkunataq ñaupaqpi kanqaku.

Uraypi willakuykuna

Griego rimaypiqa leykunaq nisqanman jina jujpaqkama t’aqanakuymantan rimashan.
Chaypiqa “pikunachus chay qokuyta chaskiranku chaykunallan” nillanmantaqmi.
Chaypiqa rimashan qhari kayninpas warmi kayninpas mana allin kasqanmantan.
Griego rimaypiqa “jujllan allin kaqqa” ninmi.