Mateo 18:1-35

  • Pichus Diospa gobiernonpi kuraq kananmanta (1-6)

  • Imakunachus runata urmachinman chaykunamanta (7-11)

  • Chinkasqa ovejamanta (12-14)

  • Juj iñiqmasita allin ñanman kutichinamanta (15-20)

  • Mana perdonaq kamachimanta (21-35)

18  Chay kutipin discipulonkunaqa Jesusman achhuykuspa tapuranku: “¿Pitaq janaq pacha gobiernopiri kuraq kanqa?”, nispa.  Chaymi Jesusqa juj erqechata wajaspa chaupinkupi sayaykachiran,  jinaspa niran: “Cheqaqtan niykichis: Manachus cambiankichis, manataqchus erqechakuna jina kankichis chayqa, manapunin janaq pacha gobiernomanqa jaykunkichischu.  Chhaynaqa, pipas kay erqecha jina k’umuykukuq kaqmi janaq pacha gobiernopiqa kuraq kanqa.  Pipas khayna wawata sutiypi chaskiqqa noqatawanmi chaskiwashan.  Pitaqchus noqapi iñiq kay juch’uykunamanta jujninta urmachinman chayqa, aswan allinmi paypaqqa kanman asnoq muyuchisqan molino rumita kunkanman warkuruspa lamar-qocha ukhuman wijch’uykusqa kaynin.  ”¡Ay imaraqmi kanqa jujkunata urmachiq kay pacha runakunamanta! Kanqapunin runata urmachiqkunaqa, ichaqa ¡ay imaraqmi paykunamanta kanqa!  Chayrayku, makiykichus otaq chakiykichus juchaman urmachishasunki chayqa, wit’urukuspa wijch’upuy; aswan allinmi qanpaqqa kanman ch’ulla makillayoq ch’ulla chakillayoq kausayman jaykuy, iskay makintin iskay chakintin mana jayk’aq wañuq ninaman* wijch’uykusqa kanaykimantaqa.  Ñawiykitaqchus juchaman urmachishasunki chayqa, orqorukuspa wijch’upuy; aswan allinmi qanpaqqa kanman ch’ulla ñawillayoq kausayman jaykuy, iskay ñawintin raurashaq Gehenaman* wijch’uykusqa kanaykimantaqa. 10  Amapunin kay juch’uykunamantaqa mayqentapas pisichankichischu, paykunata cuidaq angelkunaqa qhawashallankun janaq pachapi kaq Yayaypa uyanta. 11  *—— 12  ”¿Ima niwaqchistaq? Juj runaqsi kanman pachaj ovejankuna, chaykunamanta jujnin chinkarunman chayri, ¿manachu payqa isqon chunka isqonniyoq ovejankunata orqopi saqeykuspa chay chinkasqa ovejanta maskhaq puririnman? 13  Cheqaqtan niykichis: Tariruspaqa anchatan kusikunqa, mana chinkasqa isqon chunka isqonniyoq ovejankunamantapas astawanraq. 14  Chhaynallataqmi janaq pachapi kaq Yayaypas* manapuni munanchu kay juch’uykunamanta jujnillanpas chinkananta. 15  ”Wayqeykichus qan contra juchallikun chayqa, rispa sapallanpi reparachimuy chay juchanta. Uyarisunki chayqa, allin ñanmanmi payta kutichimpunki. 16  Manachus uyarisunki chayqa, pusarikuy juj testigota otaq iskaytapas, chhaynapi iskay otaq kinsa testigokunaq siminmanta tukuy imapas allinta yachakunanpaq. 17  Paykunatapas mana uyariqtinqa iñiq t’aqaman willay. Manallataq iñiq t’aqatapas uyarinqachu chayqa, waj nacionmanta runa jina, impuesto cobraq runa jina qanpaq kachun. 18  ”Cheqaqtan niykichis: Kay pachapi tukuy imapas watasqaykichisqa ñan janaq pachapiqa watasqaña kanqa, kay pachapi tukuy ima paskasqaykichispas ñan janaq pachapiqa paskasqaña kanqa. 19  Cheqaqtan nillaykichistaq: Qankunamanta iskaychus kay pachapi rimanakuwaqchis ima allin kaqtapas mañakunaykichispaq chayqa, mañakusqaykichisman jinan janaq pachapi kaq Yayayqa ruwapusunkichis. 20  Maypichus iskaypas kinsapas sutiypi juñunakushanku chaypin noqaqa chaupinkupi kashani”, nispa. 21  Chaymantataq Pedroqa Jesusman achhuykuspa niran: “Señor, ¿jayk’a kutikaman wayqeyta perdonasaq noqa contra juchallikuqtin? ¿Qanchis kutikamachu?”, nispa. 22  Jinan Jesusqa niran: “Manan qanchis kutikamallachu, aswanpas qanchis chunka qanchisniyoq kutikaman. 23  ”Janaq pacha gobiernoqa kamachinkunamanta cuentata mañaq reymanmi rijch’akun. 24  Chay rey cuentata mañayta qallariqtinmi payman pusamuranku chunka waranqa talento qolqe* manukuqninta. 25  Mana imanpas pagananpaq kaqtintaq reyqa kamachikuran chay kamachita, esposanta, wawankunata, tukuy imaymanankunatawan vendemunankupaq, chhaynapi manun pagasqa kananpaq. 26  Jinan chay kamachiqa reyman k’umuykuspa niran: ‘Suyariykullaway, pagapullasaykin manuytaqa’, nispa. 27  Chaymi chay reyqa kamachinta anchata khuyapayaspa kacharipuran, llapa manuntataq perdonapuran. 28  Chay kamachitaq chaymanta lloqsispa pachaj denario* qolqe manukuqnin kamachimasinwan tuparan, jinaspan kunkanmanta jap’ispa seq’osharanña: ‘Pagapuway llapa manusqayta’, nispa. 29  Jinan chay kamachimasinqa k’umuykuspa rogakuyta qallariran: ‘Suyariykullaway, pagapullasaykin manuytaqa’, nispa. 30  Paymi ichaqa mana uyariyta munaranchu, aswanmi rispa carcelman wisq’achimuran llapa manunta pagapunankama. 31  Kamachimasinkunataq chayta rikuspa sinchita llakikuranku, chaymi reyman rispa llapa chaykuna pasasqanta willamuranku. 32  Jinan reyqa chay kamachita wajachimuspa niran: ‘Millay kamachi, noqaqa llapa manuykitan perdonapurayki rogakuwaqtiyki. 33  ¿Manachu qanpas chay kamachimasiykita khuyapayawaq karan, imaynan noqapas khuyapayarayki jinata?’, nispa. 34  Jinaspan reyqa sinchi phiñasqallaña chay kamachita carcelerokunaman entregaran llapa manunta pagapunankama. 35  Kaqllatataqmi janaq pacha Yayaypas ruwasunkichis manachus sapankaykichis wayqeykichista qankuna contra juchallikuqtin tukuy sonqowan perdonankichis chayqa”, nispa.

Uraypi willakuykuna

Chayqa wiñaypaq wañuymantan rimashan.
“Gehena” nisqaqa Jerusalén llaqtaq cantonpi q’opa kanana wayq’on karan.
Kay versiculoqa manan rijurinchu “Westcott, Hort” nisqa griego qelqakunapi, nitaq wakin allin reqsisqa qelqakunapipas.
Chaytaqa “Yayaykichispas” nispapas t’ijrakullanmantaqmi.
10.000 talento qolqeqa karan 60 millón denario qolqen. Juj denarioqa karan juj p’unchay llank’asqamanta pagon.
Juj denario qolqeqa karan juj p’unchay llank’asqamanta pagon.