Mateo 15:1-39

  • Costumbreman jinalla imatapas ruwasqankumanta (1-9)

  • Sonqomanta imachus lloqsimuqmi runataqa qhellichan (10-20)

  • Fenicia llaqtayoq warmi allin iñiyniyoq kasqanmanta (21-28)

  • Imaymana onqoyniyoqkunata Jesuspa qhaliyachisqanmanta (29-31)

  • 4.000 runakunata mijuchisqanmanta (32-39)

15  Jinan Jerusalenmanta jamuranku wakin fariseokuna kamachikuy simita yachachiqkunapiwan, jinaspa Jesusman achhuykuspa niranku:  “¿Imaraykun discipuloykikuna p’akinku ñaupa tiempo runakunaq costumbrenta? Paykunaqa manamá riki mijunankupaqpas makinkutaqa maqchikunkuchu”,* nispa.  Jesustaq niran: “¿Imaraykun qankunapas costumbreykichisrayku Diospa kamachikuyninta p’akinkichis?  ¿Manachu Diosqa niran: ‘Tayta-mamaykitan respetanki’, nispa? ¿Manachu nillarantaq: ‘Pipas taytanmantapas mamanmantapas millayta rimaqqa wañuchisqa kachun’, nispa?  Qankunataq ichaqa ninkichis: ‘Pipas taytantapas mamantapas ninqa: “Qanta yanapanaypaq imachus qonay kaqtaqa Diosmanmi ofrendata jina qopuni”, nispa chayqa,  manañan taytantapas mamantapas yanapananñachu’, nispa. Chhaynapin qankunaqa Diospa siminta costumbreykichisrayku mana valeqman tukuchinkichis.  Iskay uyakuna, sut’illantan profeta Isaiasqa qankunamanta niran:  ‘Kay runakunaqa simillankuwanmi “respetaykikun” niwanku, sonqonkutaq ichaqa noqamanta karupi kashan.  Yanqapaqmi adorawashanku, paykunaqa runakunaq kamachikusqallantan yachachinku’”, nispa. 10  Chaymantataq runakunata wajaspa niran: “Uyariychis, jinaspa entiendeychis: 11  Runataqa manan siminman imapas jaykuqchu qhellichan, aswanpas siminmanta lloqsimuqmi runataqa qhellichan”, nispa. 12  Jinan discipulonkunaqa payman achhuykuspa niranku: “¿Repararankichu chay nisqaykiwan fariseokunaq phiñarukusqankuta?”, nispa. 13  Jesustaq niran: “Ima plantapas janaq pacha Yayaypa mana plantasqan kaqqa t’irasqan kanqa. 14  Jina kachunku, paykunaqa ñausa umallikunan kanku. Juj ñausachus juj ñausallatataq pusanman chayqa, iskayninkun t’oqoman urmaykunqaku”, nispa. 15  Jinan Pedroqa niran: “Ñaupaq kaq ejemplo churasqaykita entiendechiwayku”, nispa. 16  Chaymi Jesusqa niran: “¿Manaraqchu qankunapas entiendenkichis? 17  ¿Manachu yachankichis tukuy ima mijusqapas wijsaman jaykuspaqa jisp’akunapi jisp’asqa kasqanta? 18  Simimanta lloqsimuqmi ichaqa sonqomanta paqarimun, chaymi runataqa qhellichan. 19  Sonqomantan paqarimun: mana allin piensaykuna, runa wañuchiykuna, jujwan pantaykuna, qhelli jucha ruwaykuna, suwakuykuna, yanqa tumpaykuna, pisichaspa k’amiykuna ima. 20  Chaykunan runataqa qhellichan, manan mana maqchisqa* makiwan mijuychu”, nispa. 21  Chaymanta ripuspan Jesusqa riran Tiro, Sidón llaqtakuna ladoman. 22  Chayllamanmi jamuran Fenicia ladomanta juj warmi, jinaspa fuerteta wajakuran: “Davidpa Churin Señor, khuyapayaykuway. Ususiymi supaypa sinchi ñak’arichisqan kashan”, nispa. 23  Jesustaq ichaqa mana ima niranpaschu. Chaymi discipulonkunaqa payman achhuykuspa niranku: “Chay warmita kachapuy, qhepanchistan wajakuspa jamushan”, nispa. 24  Jinan Jesusqa niran: “Noqaqa Israel runakunallamanmi kachamusqa karani, paykunaqa chinkasqa ovejakuna jinan kanku”, nispa. 25  Chay warmitaq Jesusman achhuykuspa k’umuykuran: “Señor, yanapaykuway”, nispa. 26  Jinan Jesusqa niran: “Manan allinchu wawakunaq t’antanta uña alqochakunaman qoyqa”, nispa. 27  Warmitaq niran: “Chhaynan Señor, ichaqa uña alqochakunapas dueñonkuq mesanmanta usuq t’antataqa mijunkun”, nispa. 28  Chaymi Jesusqa niran: “Jatunmá iñiyniykiqa kasqa, munasqaykiman jina ruwasqa kachun”, nispa. Jinan chay warmiq ususinqa kasqan rato qhaliyapuran. 29  Chaymanta ripuspan Jesusqa Galilea qochaq qayllanman chayaran, orqoman wichaspataq chaypi tiyaykuran. 30  Jinan ancha askha runakuna payman jamuranku wist’ukunata, ñuk’ukunata, ñausakunata, upakunata, imaymana onqoyniyoqkunatawan pusariykuspa; jinaspa ñaupanman usqhaylla achhuykachiranku, paytaq llapankuta qhaliyachiran. 31  Chaymi runakunaqa anchata admirakuranku upakuna rimariqtin, ñuk’ukuna qhaliyaqtin, wist’ukuna allinta puririqtin, ñausakuna qhawariqtin ima, jinan Israelpa Diosninta jatuncharanku. 32  Jesustaq discipulonkunata wajaspa niran: “Khuyapayanin kay runakunata, paykunaqa kinsa p’unchayñan noqawan kashanku, manataqmi imapas mijunankupaq kanchu, manan mana mijusqataqa kachapuymanchu, ñanpipaschá pisipapunkuman”, nispa. 33  Jinaqtinmi discipulonkunaqa niranku: “¿Maypitaq kay ch’inneqpiri t’antata tarimuykuman khaytukuy runakunata sajsachinapaq?”, nispa. 34  Jinan Jesusqa paykunata niran: “¿Jayk’a t’antaykichismi kashan?”, nispa. Paykunataq niranku: “Qanchisllan kashan iskay kinsa challwachakunallapiwan”, nispa. 35  Chaymi Jesusqa llapa runakunata kamachiran pampapi tiyaykunankupaq, 36  chay qanchis t’antata challwakunatawan jap’ispataq Diosman graciasta qoran, phasmispataq discipulonkunaman jaywaran, paykunataq runakunaman rakiranku. 37  Llapankun sajsanankukama mijuranku, puchuq phasmikunatataq qanchis jatun canastakunapi junt’ata juñuranku. 38  Mijuqkunaqa karanku tawa waranqa qharikunan, kallarantaqmi warmikunapas wawakunapas, ichaqa manan yupasqachu karanku. 39  Llapa runakunata kachapuspataq Jesusqa boteman seqaran, jinaspa Magadán llaqta ladoman riran.

Uraypi willakuykuna

Chay maqchikuyqa judío runakunaq costumbrenkuman jina ch’uyanchakuymi karan.
Chay maqchikuyqa judío runakunaq costumbrenkuman jina ch’uyanchakuymi karan.