Mateo 14:1-36

  • Bautizaq Juanpa umanta wit’usqankumanta (1-12)

  • 5.000 runakunata Jesuspa mijuchisqanmanta (13-21)

  • Unu patapi Jesuspa purisqanmanta (22-33)

  • Genesaretpi runakunata qhaliyachisqanmanta (34-36)

14  Chay tiempopin kamachiq Herodesman* willaranku Jesuspa imakunachus ruwasqanmanta.  Chaymi serviqninkunata niran: “Kayqa bautizaq Juanpunin kanman. Payqa wañusqanmantachá jatarichisqa karan, chaychá imaymana milagrokunata* ruwashan”, nispa.  Herodesqa Juanta jap’ichispan watachisqa, jinaspa carcelman wisq’achisqa, chaytan ruwasqa wayqen Felipeq esposan Herodiaspa causanpi.  Juanmi payta askha kutipi nisqa: “Manan allinchu chay warmiwan kasqaykiqa”, nispa.  Chaymi Herodesqa wañuchiyta munaran, ichaqa manan atiranchu runakunata manchakusqanrayku; llapa runan Juantaqa “profeta” niqku.  Herodesmi wata junt’ay p’unchayninta fiestakusharan, chaypin Herodiaspa ususinqa tususqanwan Herodespa sonqonta sinchita kusichiran.  Chaymi Herodesqa juramentota ruwaspa prometeran tukuy ima mañakusqanta qonanpaq.  Jinan chay sipasqa mamanpa yachachisqan niran: “Kay platopi qoway bautizaq Juanpa umanta”, nispa.  Chaywanmi reyqa sinchita llakikuran, ichaqa jurasqanrayku paywan kuska mijuq runakunarayku iman kamachikuran Juanpa umanta chay sipasman qonankupaq. 10  Jinaspa juj soldadota carcelman kacharan Juanpa umanta wit’umunanpaq. 11  Jinan platopi apamuspa sipasman qoranku, paytaq mamanman aparan. 12  Chaymantataq Juanpa discipulonkunaqa jamuspanku ayanta apapuspa p’ampampuranku, jinaspa riranku Jesusman willaq. 13  Chayta uyarispan Jesusqa sapallan kananpaq ch’inneq ladoman botepi ripuran, runakunataq chayta yacharuspanku muyuriqpi kaq llaqtakunamanta chakillapi qatikuranku. 14  Jesustaq botemanta uraykuspa ancha askha runakunata rikuran, chaymi paykunata khuyapayaran onqosqa kaqkunatapas qhaliyachiran. 15  Tardeña kaqtintaq discipulonkunaqa payman achhuykuspa niranku: “Kayneqqa ch’inmi, tardeñataqmi kanpas, chayrayku kachapullayña kay runakunata, chhaynapi ayllukunaman rispa mijunata rantikunankupaq”, nispa. 16  Jinan Jesusqa paykunata niran: “Manan ripunankuraqchu, qankuna imallatapas mijuchiychis”, nispa. 17  Chaymi discipulonkunaqa niranku: “Manan imaykupas kanchu, pisqa t’antallaykun iskay challwallaykupiwan kashan”, nispa. 18  Jinan Jesusqa niran: “Kayman apamuwaychis”, nispa. 19  Chaymantataq llapa runakunata kamachiran pasto pampapi tiyaykunankupaq; pisqa t’antata iskay challwatawan jap’ispataq cielota qhawarispa graciasta qoran, t’antata phasmispataq discipulonkunaman jaywayta qallariran, paykunataq llapa runakunaman rakiranku. 20  Jinan llapanku mijuranku sajsanankukama, chaymantataq puchuq t’anta phasmikunata chunka iskayniyoq canasta junt’ata juñuranku. 21  Mijuqkunaqa karan pisqa waranqa jina qharikunan, kallarantaqmi warmikunapas wawakunapas, ichaqa manan yupasqachu karanku. 22  Chay qhepamantaq Jesusqa discipulonkunata boteman seqachiranpacha, chhaynapi chimpaman ñaupashanankupaq, chaykamataq payqa runakunata kachapusharan. 23  Runakunata kachapuspataq orqoman sapallan wicharan Diosmanta mañakuq. Tutayamusharanñan kanpas, payqa sapallanmi chaypi kasharan. 24  Chay ratopaqqa botepas qocha patamanta sinchi karu ukhupiñan kasharan, sinchita wayramuqtintaq unuqa boteta nishuta aytikachasharan. 25  Manaraq illarimushaqtinmi* Jesusqa discipulonkunaq kasqanman riran unu patanta purispa. 26  Unu patanta purishaqta rikuruspankutaq discipulokunaqa mancharikuranku, jinaspa niranku: “¡Imataq jaqayri!”, nispa. Chaymantataq manchakuymanta qapariranku. 27  Jesustaq kaq rato paykunata niran: “¡Kallpachakuychis! Ama mancharikuychischu, noqan kani”, nispa. 28  Jinan Pedroqa niran: “Señor, qanpuni kanki chayqa, kamachiway unu patanta qanman jamunaypaq”, nispa. 29  Jesustaq: “¡Jamuy!” niran. Jinan Pedroqa botemanta uraykuspa unu patanta puriran. 30  Ichaqa sinchi wayramusqanta rikuspan mancharikuran, unuman chinkaykushaspataq qapariran: “¡Señor, aysaruway!”, nispa. 31  Jesustaq kaq rato makinta jaywarispa jap’iran, jinaspa niran: “Pisi iñiyniyoq runa, ¿imanaqtinmi iskayaranki?”, nispa. 32  Boteman seqaqtinkutaq wayraqa thaj kapuran. 33  Jinaqtinmi botepi kaqkunaqa payman k’umuykuspa niranku: “Cheqaqtapunin qanqa Diospa Churin kanki”, nispa. 34  Qochata chimpaspankutaq Genesaret ladoman chayaranku. 35  Runakunataq reqsiruspanku llapa muyuriqnintinman willachimuranku, chaymi runakunaqa llapa onqosqakunata Jesusman pusamuranku. 36  Jinaspa rogakuranku jawa p’achanpa cantollantapas llamiykunankupaq, jinan llamiykuqkunaqa allintapuni qhaliyapuranku.

Uraypi willakuykuna

Payqa karan Jatun Herodespa wawan Herodes Antipasmi.
Griego rimaypiqa “atiywan ruwaykunata” ninmi.
Chayqa karan las tresmanta inti lloqsimuykaman.