Mateo 11:1-30

  • Bautizaq Juanmanta allinta rimakun (1-15)

  • Mana kasukuq runakunata juchachakusqanmanta (16-24)

  • Jesús Yayanta jatunchan llamp’u sonqokunata allinpaq qhawarisqanmanta (25-27)

  • Jesuspa yugon llamp’ulla kasqanmanta (28-30)

11  Chunka iskayniyoq discipulonkunaman imachus ruwanankuta yachachiyta tukuspan Jesusqa chaymanta ripuran juj llaqtakunapi yachachinanpaq allin willakuykunata willananpaq ima.  Juanmi carcelpi kashaspa uyariran Cristoq imaymanakuna ruwasqanmanta, chaymi discipulonkunata kacharan:  “¿Qanchu kanki jamunan karan chay, icha jujtachu suyakusaqku?”, nispa tapumunankupaq.  Jinan Jesusqa paykunata niran: “Juanman kutispa willamuychis imachus uyarisqaykichista rikusqaykichistawan:  Ñausakunan qhawarinku, such’ukunan puririnku, lepra onqoyniyoqkunan qhaliyachisqa kanku, roqt’ukunan uyarinku, wañusqakunan kausarichisqa kanku, wajchakunamantaq allin willakuykunata willakushan.  Kusisqa kachun mana iskayaspa noqapi confiaqqa”, nispa.  Paykuna ripushaqtinkun Jesusqa runakunata Juanmanta tapuyta qallariran: “¿Pin karan ch’inneqpi rikusqaykichis runa? ¿Wayraq maywiykachasqan soqos jina runachu karan? Manan.  Chhaynaqa, ¿pin karan? ¿Llamp’u p’achawan p’achasqa runachu? Manan, llamp’u p’achawan p’achasqa runakunaqa reykunaq wasinpimá kashanku.  Chhaynaqa, ¿pipunitaq karanri? ¿Juj profetachu? Arí, juj profetan payqa karan, profetakunamantapas aswanraqmi. 10  Paymantan qelqasqa kashan: ‘Noqan ñaupaykita willaqniyta kachasaq, paymi ñaupaykipi ñanta allichapusunki’, nisqa. 11  Cheqaqtan niykichis: Warmimanta naceqkunamantaqa manan pipas bautizaq Juanmanta aswan kuraqqa kanchu, chaywanpas janaq pacha gobiernopiqa aswan juch’uy kaqmi Juanmanta aswan kuraqqa. 12  Bautizaq Juanpa tiemponmantapacha kunankamaqa janaq pacha gobiernoman chayanankupaqmi runakunaqa tukuy atisqankuta ruwashanku, mana pisipaqkunataqmi chayman chayanku. 13  Llapa profetakunaq qelqasqanpas kamachikuy simipas Juankamallan profetizaranku; 14  creenkichisña manaña chaypas, paymi ‘jamunan karan chay Eliasqa’. 15  Uyarinanpaq ninriyoqqa uyarichun. 16  ”¿Pimanmi kay tiempo runakunata comparasaq? Mercado plazapi tiyashaq erqechakunamanmi, paykunan pujllaqmasinkuta ninku: 17  ‘Flautatan tocapuraykiku, manataq tusurankichischu; khuyaytan waqarayku, manataq llakikuymanta sonqoykichista takakurankichischu’, nispa. 18  Juanqa mana mijuspa mana ujaspan jamuran, runakunataq ninku: ‘Supaypa junt’aykusqanmi kashan’, nispa. 19  Runaq Churinmi ichaqa jamuran mijuspa ujaspa ima, runakunataq ninku: ‘Qhawariychis kay runata, payqa rajrapun, machaqmi, impuesto cobraqkunaq juchasapakunaq amigonmi’, nispa. Chaywanpas runaqa imatapas allinta ruwasqanwanmi rikuchinqa yachayniyoq kasqanta”, nispa. 20  Chaymantataq Jesusqa wakin llaqtakunata anyayta qallariran, chay llaqtakunapin yaqa llapan milagronkunata* ruwaran, paykunan ichaqa juchankumanta mana pesapakurankuchu, chaymi niran: 21  “¡Ay qanmanta, Corazín llaqta! ¡Ay qanmanta, Betsaida llaqta! Qankunapi jinachus Tiro llaqtapi Sidón llaqtapipas milagrokunata ruwakunman karan chayqa, mayñachá juchankumanta pesapakunkuman karan qhasqa telawan churakuspa usphapi tiyaykuspa ima. 22  Chaymi niykichis: Juicio p’unchaypiqa* qankunan aswan castigasqa kankichis Tiro, Sidón llaqtakunamantaqa. 23  Qanri, Capernaum llaqta, ¿janaq pachakamachu oqarisqa kanki? ¡Manapunin! Aswanpas Sepulturamanmi* uraykunki, Sodomapichus qanpi jina milagrokuna ruwakunman karan chayqa, kunan p’unchaykamachá chay llaqtaqa kashanman karan. 24  Chaymi niykichis: Juicio p’unchaypiqa qankunan aswan castigasqa kankichis Sodoma llaqtamantaqa”, nispa. 25  Chay kutipin Jesusqa niran: “Yayáy, janaq pachaq kay pachaq Señornin, llapa runakunaq ñaupanpin jatunchayki, qanmi kaykunata pakaranki yachayniyoq, allin umayoq runakunamanta, jinaspa wawa jina kaqkunaman entiendechiranki. 26  Arí, Yayáy, chhayna ruwayqa munasqaykiman jinan karan”, nispa. 27  Jesusqa nillarantaqmi: “Yayayqa tukuy imaymanatan noqaman qowan; manan pipas Churitaqa allinta reqsinchu, aswanpas Yayallan; manallataqmi pipas Yayataqa allinta reqsinchu, aswanpas Churillan, pimanchus Churi reqsichiyta munan chayllapiwan. 28  Noqaman jamuychis, llapa sayk’usqakuna, llasa q’epiyoqkuna; noqan samachisaykichis. 29  Yugoyta apaychis, jinaspa noqamanta yachaychis, jinan samakuyta tarinkichis;* noqaqa llamp’u sonqon kani, k’umuykukuq sonqoyoqtaqmi kanipas. 30  Yugoyqa llamp’ullan, q’epiypas manan llasachu”, nispa.

Uraypi willakuykuna

Griego rimaypiqa “atiywan ruwaykunata” ninmi.
Qhaway “explicasqa simikuna” nisqapi “juicio p’unchay” nisqata.
Griego rimaypiqa “Hadesmanmi” ninmi.
Chaypiqa “almaykichispaq samakuyta tarinkichis” nillanmantaqmi.