Mateo 10:1-42

  • 12 apostolkunamanta (1-4)

  • Imayna predicanamanta (5-15)

  • Discipulokuna qatikachasqa kanankumanta (16-25)

  • Runata manchakunamantaqa Diosta manchakunamanta (26-31)

  • Jesuspa thaj kay apamunanmantaqa espadata apamusqanmanta (32-39)

  • Jesuspa discipulonkunata chaskinamanta (40-42)

10  Chaymi chunka iskayniyoq discipulonkunata wajaran, jinaspa paykunaman atiyta qoran millay espiritukunata qarqonankupaq, imaymana onqoyniyoqkunata nanayniyoqkunatawan qhaliyachinankupaq.  Chay chunka iskayniyoq apostolkunan* karanku: “Pedro” nisqa Simón, wayqen Andrespiwan, Zebedeoq wawan Santiago, wayqen Juanpiwan,  Felipe, Bartolomé, Tomás, impuesto cobraq Mateo, Alfeoq wawan Santiago, Tadeo,  “Cananita”* nisqa Simón, Judas Iscariotepiwan, paymi karan Jesusta jap’ichiqqa.  Chay chunka iskayniyoq apostolkunatan Jesusqa kacharan khaynata kamachispa: “Aman mana judío runakunaq ñannintaqa rinkichischu, amallataq Samaria runakunaq llaqtanmanpas jaykunkichischu.  Aswanpas, Israel llaqtamanta chinkasqa ovejakunallamanmi rinkichis.  Rispaqa khaynatan ninkichis: ‘Janaq pacha gobiernon qayllaykamunña’, nispa.  Onqosqakunatan qhaliyachinkichis, wañusqakunatan kausarichinkichis, lepra onqoyniyoqkunatan qhaliyachinkichis, supaykunatapas qarqonkichismi. Gratisllan chaskirankichis, gratisllataqmi qonkichispas.  Aman qorita, qolqeta, ni cobretapas qolqe churana ch’uspaykichispi apankichischu. 10  Ñanpaqpas aman apankichischu qoqawata, llank’aqqa chaskinanpunin mijunantaqa. Chaymantapas aman apankichischu cambiakunaykichispaq p’achatapas usut’atapas, ni juj taunatawanpas. 11  ”May llaqtamanpas may ayllumanpas jaykuspaqa maskhaychis pichus chaypi qankunata chaskinasuykichispaq jina kaqta, jinaspa chaypi qhepakunkichis ripunaykichiskama. 12  Wasiman jaykuspaqa napaykunkichismi chaypi kaqkunata. 13  Paykunachus uyarikunankupaq jina kanqaku chayqa, thaj kay paykunapaq kachun; mana chayqa, thaj kay qankunaman kutimpuchun. 14  Maypipas mana chaskisunkichischu ni uyarisunkichispaschu chayqa, chay wasimanta otaq llaqtamanta lloqsipushaspan chakiykichispi kaq allpata chhafchirparinkichis. 15  Cheqaqtan niykichis: Juicio p’unchaypiqa* chay llaqtan aswan castigasqa kanqa Sodoma, Gomorra llaqtakunamantaqa. 16  ”Qankunataqa atoqkuna* chaupipi ovejakunata jinan kachashaykichis; chayrayku, mach’aqwaykuna jina yuyaysapa kaychis, ichaqa palomakuna jina mana imanakuq kaychis. 17  Runakunamanta allinta cuidakuychis, paykunan apasunkichis juzgana wasikunaman, sinagogankupitaq soq’aykusunkichis. 18  Noqaraykun kamachikuqkunaman reykunamanpas apasqa kankichis, chhaynapi paykunapas waj nacionmanta runakunapas willasqa kanankupaq. 19  Paykunaman apasuqtiykichisqa aman llakipakunkichischu imaynatachus imatataqchus rimanaykichismantaqa, chay ratopin yachankichis imatachus rimanaykichista. 20  Manan qankunallachu rimankichisqa, aswanpas Yayaykichispa espiritunmi qankunamanta rimanqa. 21  Chaymantapas, wayqellantaqmi wayqenta wañuchinapaq entreganqa, taytataq wawanta. Wawakunapas tayta-mamanku contran jatarinqaku, jinaspa wañuchinapaq entreganqaku. 22  Sutiyraykun llapa runakunaq cheqnisqan kankichis, pipas tukukuykama aguantaqmi ichaqa salvasqa kanqa. 23  Juj llaqtapi qatikachasunkichis chayqa, waj llaqtaman ayqeychis, cheqaqtan niykichis: Israelpi ayllukunata llaqtakunatapas manaraq tukushaqtiykichismi runaq Churinqa chayamunqa. 24  ”Yachachisqaqa manan aswan allinchu yachachiqninmantaqa, manallataqmi kamachipas patronninmantaqa. 25  Yachachisqa runapaqqa allinmi yachachiqnin jina kay, kamachipaqpas patronnin jina kay. Wasiyoqtataq runakuna niranku: ‘Beelzebub’,* nispa chayqa, ¡astawanraqchá wasinpi kaqkunataqa chhaynata ninqaku! 26  Chayrayku, aman paykunataqa manchakunkichischu, imapas tapasqa kaqqa rijurichisqan kanqa, ima pakasqa kaqpas yachakunqan. 27  Tutayaqpi nisqaytaqa k’anchaypi willaychis, ninrillapi uyarisqaykichistapas wasi patakunamanta willamuychis. 28  Ama manchakuychischu cuerpo wañuchiqkunataqa, paykunaqa manan atinkumanchu kausay* chinkachiytaqa; aswanpas manchakuychis cuerpotawan kausaytawan Gehenapi* chinkachiy atiqta. 29  ¿Manachu iskay pichinkukunata pisi valorniyoq qolqellapaq vendekun? Chaywanpas manan jujllapas pampamanqa urmanmanchu Yayaykichis mana yachashaqtinqa. 30  Qankunaqqa chujchaykichispas llapallanmi yupasqa kashan. 31  Chayrayku, ama manchakuychischu, qankunaqa askha pichinkukunamantapas astawanraqmi valenkichis. 32  ”Pipas runakunaq ñaupanpi ‘reqsinin’ niwaqniytaqa, noqapas ‘reqsinin’ nillasaqtaqmi janaq pachapi kaq Yayaypa ñaupanpi. 33  Pipas runakunaq naupanpi negawaqniytan ichaqa, noqapas negallasaqtaq janaq pachapi kaq Yayaypa ñaupanpi. 34  Ama piensaychischu kay pachaman jamusqaywan thaj kay kanantaqa; manan thaj kayta apamuqchu jamuni, aswanmi espadata churaq. 35  Noqaqa t’aqanachiqmi jamuni: Churin taytan contra kanqa, ususitaq maman contra, qhachuntaq suegran contra. 36  Runaq enemigonkunaqa wasinpi kaqkunallataqmi kanqa. 37  Pipas taytantapas mamantapas noqamanta astawan munakuqqa manan noqapaq jinachu, pipas churintapas ususintapas noqamanta astawan munakuqqa manallataqmi noqapaq jinachu. 38  Pipas discipuloy kayta munaqqa ñak’arina k’aspinta chaskispan qhepayta jamunan, mana chayqa manan noqapaq jinachu kanqa. 39  Pipas vidanta* salvayta munaqqa chinkachinqan, pipas noqarayku vidanta chinkachiqmi ichaqa salvanqa. 40  ”Pipas qankunata chaskiqqa noqatan chaskiwallantaq, noqata chaskiwaqtaq kachamuqniytapas chaskillantaq. 41  Pipas juj runata profeta kasqanrayku chaskiqqa, profeta jinan premiota chaskinqa; pipas juj allin runata allin kasqanrayku chaskiqqa, allin runa jinan premiota chaskinqa. 42  Cheqaqtan niykichis: Pipas kay juch’uypaq qhawarisqa kaqkunamanta mayqenmanpas discipuloy kasqanrayku juj vaso chiri unullatapas jaywarinqa chayqa, manapunin imaraykupas premiontaqa chinkachinqachu”, nispa.

Uraypi willakuykuna

Qhaway “explicasqa simikuna” nisqapi “apóstol” nisqata.
Chaypiqa “tukuy sonqowan ruwaq” nillanmantaqmi.
Qhaway “explicasqa simikuna” nisqapi “juicio p’unchay” nisqata.
Griego rimaypiqa “lobokuna” ninmi.
“Beelzebub” sutiqa Satanaspa juj kaq sutinmi; paymi supaykunaq kamachiqninqa.
Chaypiqa “alma” nillanmantaqmi.
“Gehena” nisqaqa Jerusalén llaqtaq cantonpi q’opa kanana wayq’on karan.
Chaypiqa “almanta” nillanmantaqmi.