Marcos 4:1-41

  • DIOSPA GOBIERNONMANTA EJEMPLOKUNA CHURAKUSQANMANTA (1-34)

    • Muju t’akaq (1-9)

    • Imaraykuchus Jesús ejemplokunata churaspa yachachisqanmanta (10-12)

    • Muju t’akaqmanta willasqanta Jesuspa explicasqan (13-20)

    • Mecherotaqa manan canasta ukhumanchu churakun (21-23)

    • Askhata qoqqa askhallatataqmi chaskinqa (24, 25)

    • Muju t’akaqpa puñupusqanmanta (26-29)

    • Mostaza mujumanta (30-32)

    • Ejemplokunata churaspa Jesuspa yachachisqan (33, 34)

  • Jesuspa sinchi wayra upallachisqanmanta (35-41)

4  Wajmantan Jesusqa qocha patapi yachachiyta qallariran, chaypin ancha askha runakuna payman juñukamuranku. Jinan juj boteman seqaspa qocha patamanta juj chikan ukhuman jaykuran, jinaspa chaypi tiyaykuran, runakunataq llapanku qocha patallapi kasharanku.  Chaypin Jesusqa ejemplokunata churaspa imaymanata yachachiyta qallariran, yachachishaspataq niran:  “Uyariychis, muju t’akaq runan t’akaq riran.  T’akasqanman jinan wakin mujuqa ñan pataman chayaran, alton phawaq animalkunataq jamuspa chaykunata pallarapuranku.  Wakin mujutaq pisi allpayoq qaqaman chayaran, jinan pisilla allpa kasqanrayku ratolla lloqsimuran.  Inti lloqsimuqtintaq naq’epuran, jinaspa ch’akipuran jawallapi saphin kasqanrayku.  Wakin mujutaq kiska-kiska ukhuman chayaran, kiskakunataq wiñamuspa p’ampapuran, chaymi mana rurupuranchu.  Wakintaq ancha allin allpaman chayaran, wiñaspataq ruruyta qallariran: wakin kinsa chunkata, wakin soqta chunkata, wakintaq pachajta”, nispa.  Jesusqa nillarantaqmi: “Uyarinanpaq ninriyoqqa uyarichun”, nispa. 10  Sapallan kashaqtintaq discipulonkunaqa chunka iskayniyoq apostolninkunapiwan chay ejemplokuna churasqanmanta tapuyta qallariranku. 11  Jinan Jesusqa paykunata niran: “Qankunaqqa kanmi yanapaqniykichis Diospa gobiernonmanta pakasqa yachaykunata entiendenaykichispaq, jujkunapaqmi ichaqa tukuy imapas comparación jinalla kashan, 12  chhaynapin qhawashaspankupas mana rikunqakuchu, uyarishaspankupas mana entiendenqakuchu, manataqmi Diosmanpas kutirikunqakuchu chhaynapi perdonasqa kanankupaq”, nispa. 13  Chaymantan nillarantaq: “Manataq chay ejemplokuna willasqayta entiendenkichischu chayqa, ¿imaynapitaq wakin ejemplokunatari entiendewaqchis? 14  ”Muju t’akaqqa Diospa siminta willaqmi. 15  Wakin runakunaqa ñan jinan kanku, paykunapin Diospa siminta t’akakun, ichaqa uyariqtinku jinan Satanasqa jamuspa sonqonkupi t’akasqa simita apapun. 16  Wakin runakunataq qaqa jina kanku, paykunaqa Diospa siminta uyarispa jinan ancha kusikuywan chaskikunku. 17  Sonqonkupi muju mana saphichakusqanraykun ichaqa juj tiempolla allin kanku, Diospa siminrayku ñak’ariy qatikachay ima kaqtintaq qhepaman kutirikapunku. 18  Wakin runakunataq kiska-kiska jina kanku, paykunaqa uyarikunkun Diospa siminta. 19  Ichaqa kay tiempopi llakipakuykuna, qhapaq kaykuna, imaymana munapayaykuna iman sonqonkuman jaykuspa simita p’ampapun, chhaynapitaq mana ruruqman tukupun. 20  Wakin runakunañataqmi ichaqa allin allpa jina kanku, paykunaqa Diospa siminta uyarispan sumaqta chaskikunku, jinaspa rurunku wakin kinsa chunkata, wakin soqta chunkata, wakintaq pachajta”, nispa. 21  Jesusqa nillarantaqmi: “Mecherotaqa* manan canasta ukhumanchu, nitaq puñunaq pachanmanchu churakun ¿riki? Aswanpas k’anchana patamanmi churakun. 22  Ima tapasqa kaqpas rijurichisqan kanqa, ima allin pakasqa kaqpas sut’iman orqosqan kanqa. 23  Uyarinanpaq ninriyoqqa uyarichun”, nispa. 24  Payqa nillarantaqmi: “Kasukuychis imachus uyarisqaykichista. Askhata qonkichis chayqa, askhallatataqmi chaskinkichis, chaymanta aswan askhataraqmi chaskinkichispas. 25  Pipas kaqniyoqmanqa astawanraqmi qokunqa, mana kaqniyoqmantan ichaqa imanña kanman chaypas, qechusqa kanqa”, nispa. 26  Jesusqa nillarantaqmi: “Diospa gobiernonqa allpaman mujuta t’akaq runamanmi rijch’akun, 27  paymi tutapi puñun, p’unchayamuqtintaq jatarimun, chaykamataq mujuqa ch’ijchimuspa jatunta wiñan, chay runaqa manan yachanchu imayna chay kasqanta. 28  Allpaqa kikillanmantan pisi-pisimanta ruruchin: Ñaupaqtan q’achuta wiñachin, chaymantataq espigata rijurichimun, chaymantañataq espigapi ruruta junt’achin. 29  Ruru poqoqtintaq ichhunawan rutuyta qallarin cosecha tiempoña kasqanrayku”, nispa. 30  Jesusqa nillarantaqmi: “¿Imawanmi tupanachisunman Diospa gobiernonta? ¿Ima ejemplowanmi entiendesunman? 31  Chayqa mostaza muju jinan, chay mujun allpaman t’akasqa kashaspa kay pachapi kaq llapa mujukunamantapas aswan juch’uylla. 32  Lloqsimuspanmi ichaqa huertapi llapa plantakunamantapas* aswan jatuntaraq wiñan, k’allmankunapas jatuntan wiñan, chaymi alton phawaq animalkunapas chaypi q’esachakuyta atinku”, nispa. 33  Jesusqa chhayna askha ejemplokunata churaspan Diospa siminmanta runakunaman rimapayaq entiendeyta atisqankuman jinalla. 34  Ejemplokunata churaspapunin paykunamanqa rimapayaq, discipulonkunamanmi ichaqa sapaqllapi tukuy imatapas entiendechiq. 35  Chay p’unchay ch’isintan Jesusqa discipulonkunata niran: “Jaku qocha chimpaman”, nispa. 36  Chaymi paykunaqa llapa runakunata kachapuspa jinallata Jesusta botepi aparanku, chaypiqa juj botekunapas kashallarantaqmi. 37  Jinan manchay wayra jatariran, chaymi unuqa sinchita aytikuspa boteman waqtakuran, jinaspa millp’upusharanña. 38  Jesustaq boteq qhepanpi saunaykukuspa puñusharan. Jinan rijch’arichispa niranku: “Yachachikuq, ¿manachu imapas qokusunki? ¡Chinkaykushanchisñan!”, nispa. 39  Chaymi Jesusqa jatarimuspa wayrata phiñarikuran, jinaspa qochata niran: “¡Ch’inlla kay! ¡Upallay!”, nispa. Wayrataq thanipuran, jinan thaj kapuran. 40  Paykunatataq niran: “¿Imaraykun sinchi mancharisqa kashankichis? ¿Manaraqchu iñiyniyoq kankichis?”, nispa. 41  Paykunataq sinchi mancharisqa ninakuranku: “¿Pipunitaq kay runari, chaytaq wayrapas qochapas kasunri?”, nispanku.

Uraypi willakuykuna

Mecherotaqa “lámpara” nillankutaqmi.
Chay plantakunaqa asnapakuna verdurakuna iman.