Marcos 3:1-35

  • Makin ch’akisqa runa qhaliyachisqa kasqanmanta (1-6)

  • Qocha patapi askha runakuna juñukusqanmanta (7-12)

  • 12 apostolkunamanta (13-19)

  • Santo espirituta k’amikusqanmanta (20-30)

  • Jesuspa mamanmanta wayqenkunamantawan (31-35)

3  Wajmantan Jesusqa sinagogaman jaykullarantaq, chaypin kasharan juj runa jujnin makin ch’akisqa.  Fariseokunataq makilla Jesusta qhawasharanku sábado p’unchaypi chay runata qhaliyachinmanchus icha manachus chayta, chhaynapi chayman tumpalla juchachanankupaq.  Jinaqtinmi Jesusqa ch’akisqa makiyoq runata niran: “Sayarispa kay chaupiman jamuy”, nispa.  Chaymantataq paykunata niran: “¿Ima ruwaymi allin kanman sábado p’unchaypi? ¿Allin kaqta ruwaychu, icha mana allin kaqta ruwaychu? ¿Runata* salvaychu, icha wañuchiychu?”, nispa. Paykunan ichaqa ch’inlla karanku.  Jinan muyuriqninpi kaqkunata phiñasqa qhawarispa, sonqonku rumiyasqa kasqanmanta maytapuni llakikuran, chaymi chay runata niran: “Makiykita jaywarimuy”, nispa. Jaywariqtintaq makinqa qhali kapuran.  Chayta rikuspan fariseokunaqa lloqsispa jina Herodespa t’aqanmanta kaqkunawan Jesusta wañuchinankupaq rimanakuranku.  Jesusmi ichaqa discipulonkunawan kuska lamar-qocha ladoman riran, jinan Galileamanta Judeamantawan ancha askha runakuna qatikuranku.  Imaymana ruwasqanmanta uyarispan askhallaña runakuna jamullarantaq Jerusalenmanta, Idumea llaqtamanta, Jordán mayu inti lloqsimuy ladomanta, Tiro llaqtaq Sidón llaqtaq muyuriqninmantawan.  Chaymi Jesusqa discipulonkunata niran juj boteta listota alistapushanankupaq, chhaynapi runakuna mana k’iskinankupaq. 10  Askha onqosqakunata qhaliyachisqanraykun sinchi onqosqa runakuna llapallanku Jesusman k’iskipakamuranku payta llamiykunankupaq. 11  Millay espiritukunapas payta rikuspan ñaupanpi k’umuykuspa qapariqku: “¡Qanqa Diospa Churinmi kanki!”, nispa. 12  Chaymi Jesusqa askha kutita paykunata allin-allinta kamachiran pichus kasqanta ama rimarinankupaq. 13  Juj orqoman seqaspataq wakin discipulonkunata wajaran, paykunataq payman jamuranku. 14  Chunka iskayniyoq runakunata ajllaspataq “apostolkuna” nispa suticharan; paykunan puriysinanku karan, Jesustaqmi paykunata kachanan karan allin willakuykuna willaqta, 15  atiytapas qonan karan supaykunata qarqonankupaq. 16  Chay chunka iskayniyoq runakunan karan: Simón (paytan Jesusqa suticharan “Pedro” nispa), 17  Zebedeoq wawan Santiago, Santiagoq wayqen Juan (paykunatan sutichallarantaq “Boanerges” nispa, chayqa “rayo t’ojaypa wawankuna” ninantan nin), 18  Andrés, Felipe, Bartolomé, Mateo, Tomás, Alfeoq wawan Santiago, Tadeo, “Cananita”* nisqa Simón, 19  Judas Iscariote ima, paymi karan Jesusta jap’ichiqqa. Jinan Jesusqa juj wasiman jaykuran. 20  Wajmantan askha runakuna juñukamullarantaq, chaymi Jesuswan discipulonkunawanqa mana ni mijuytawanpas atirankuchu. 21  Jesuspa familiantaq imachus pasasqanta uyarispa payta jap’ispa pusapunankupaq jamuranku: “Manan yuyayninpichu kashan”, nispanku. 22  Jerusalén llaqtamantan uraykamuranku kamachikuy simita yachachiqkuna, paykunapas nirankun: “Beelzebubpa* junt’aykusqanmi kashan, supaykunata kamachiqpa atiyninwanmi supaykunata qarqon”, nispa. 23  Jinan Jesusqa runakunata wajaspa ejemplokunawan yachachiyta qallariran, khaynatan niran: “¿Imaynapin Satanás pay kikinta qarqokunman? 24  Mayqen nacionpas t’aqanasqa kaspaqa, manan sayayta atinmanchu. 25  Mayqen familiapas t’aqanasqa kaspaqa, manallataqmi jujllachasqa kayta atinkumanchu. 26  Satanaspas kikinpa contranpi jatarispaqa t’aqanasqan kanman, manataqmi sayayta atinmanchu, aswanpas chinkapunmanmi. 27  Manan pipas kallpasapa runaq wasinman jaykuspa imantapas suwayta atinmanchu manachus ñaupaqta chay runata watanman chayqa. Wataspañan imantapas suwayta atinman. 28  Cheqaqtan niykichis: Runakunaq lliu ima ruwasqanpas perdonasqan kanqa, imapiña juchallikuranku pisichaspaña k’amiranku chaypas. 29  Santo espirituta pisichaspa k’amiqmi ichaqa mana jayk’aqpas perdonasqachu kanqa, aswanmi wiñaypaq juchayoq kanqa”, nispa. 30  Chaytaqa niran: “Millay espiritun paypi kashan”, nispa niqtinkun. 31  Chayllamanmi Jesuspa maman wayqenkuna ima jamuranku, jawallapi sayaykuspankutaq payta wajamuqta kachaykuranku. 32  Jesuspa muyuriqninpiqa askha runakunan tiyasharanku, chaymi niranku: “Mamaykin wayqeykikunapiwan maskhashasunkiku, jawapin kashanku”, nispa. 33  Jinan Jesusqa niran: “¿Pitaq mamaypas wayqeykunapas?”, nispa. 34  Muyuriqninpi tiyaqkunata qhawarispataq niran: “¡Qhawariychis, paykunan mamaypas wayqeykunapas! 35  Pipas Diospa munayninta ruwaqmi wayqeypas, panaypas, mamaypas”, nispa.

Uraypi willakuykuna

Chaypiqa “almata” nillanmantaqmi.
Chaypiqa “tukuy sonqowan ruwaq” nillanmantaqmi.
“Beelzebub” sutiqa Satanaspa juj kaq sutinmi.