Marcos 2:1-28

  • Mana kuyuriy atiq runata Jesuspa qhaliyachisqanmanta (1-12)

  • Leví sutiyoq runata Jesuspa wajasqanmanta (13-17)

  • Ayunomanta Jesusta tapusqankumanta (18-22)

  • Jesús ‘sábado p’unchaypa Señornin’ kasqanmanta (23-28)

2  Pisi p’unchaykuna qhepamanmi Jesusqa wajmanta Capernaum llaqtaman jaykuran, runakunataq wasipi kashasqanta yacharuranku.  Jinan runakunaqa askhallaña chay wasiman juñukamuranku, chaymi manaña punkullapipas campo karanñachu, Jesustaq Diospa siminta paykunaman willayta qallariran.  Wakin runakunataq mana kuyuriy atiq runata apamuranku tawamanta wantuspa.  Ichaqa askha runakuna kasqanraykun mana Jesusman apaykuyta atirankuchu, chaymi paykunaqa wasiq techonta t’oqospa chayninta chay runataqa juj camillapi Jesuspa kasqanman uraykachiranku.  Jesustaq iñiyniyoq kasqankuta rikuspa chay mana kuyuriq runata niran: “Wawalláy, juchaykikunan perdonasqa kapun”, nispa.  Chaypin tiyasharanku kamachikuy simita wakin yachachiqkunapas, paykunan sonqonkupi nisharanku:  “¿Imaraykutaq kay runari khaynata riman? Diostamá k’amishan chaywanqa, ¿pitaq juchakuna perdonaytari atinman, manachu Dioslla?”, nispa.  Chaymi Jesusqa chhayna piensasqankuta kaq rato reparaspa niran: “¿Imaraykun sonqoykichispi chhaynata piensashankichis?  ¿Mayqentaq aswan fácil kanman? ¿Mana kuyuriy atiq runata ‘juchaykikunan perdonasqa kapun’ niychu, icha, ‘jatarispa camillaykita oqarispa ripuy’ niychu? 10  Yachanallaykichispaqpas, runaq Churinqa atiyniyoqmi kay pachapi juchakunata perdonananpaq”, nispa. Chayta nispataq chay mana kuyuriy atiq runata niran: 11  “Sayariy, camillaykita oqarispa wasiykiman ripuy”, nispa. 12  Jinan chay runaqa sayarispa camillantapas oqarispa llapa runakunaq ñaupanmanta lloqsipuran, runakunataq chaywan anchata admirakuranku, Diosta jatunchaspataq niranku: “Manamá jayk’aqpas khaynakunataqa rikuranchischu”, nispa. 13  Wajmantan Jesusqa qocha pataman rillarantaq, lliu runakunataq payman juñukamuranku, jinan paykunata yachachiyta qallariran. 14  Rishaspataq Jesusqa rikuran Alfeoq wawan Leví sutiyoq runata impuesto cobranapi tiyashaqta, jinan Jesusqa payta niran: “Qatikamuway”,* nispa; paytaq sayarispa qatikuran. 15  Chay qhepamantaq Jesusqa Levipa wasinpi mijusharan, chaypin askha kasharanku impuesto cobraqkuna juchasapa runakunapas, paykunan Jesuswan discipulonkunapiwan kuska mijusharanku. Paykunamantaqa askhan Jesusta qatikusharanku. 16  Fariseo t’aqamanta kamachikuy simita yachachiqkunan ichaqa, impuesto cobraqkunawan juchasapakunapiwan mijusqanta rikuspa Jesuspa discipulonkunata niranku: “¿Imaraykun yachachiqniykichis mijun impuesto cobraqkunawan juchasapakunawan ima?”, nispa. 17  Chayta uyarispan Jesusqa paykunata niran: “Qhalikunaqa manan doctorta necesitankuchu, onqosqakunan ichaqa necesitanku. Noqaqa manan allin kausaq runakunata wajaqchu jamuni, aswanpas juchasapakunata wajaqmi”, nispa. 18  Juanpa discipulonkuna fariseokuna iman ayunaqku. Chaymi Juanpa discipulonkunaqa Jesusman achhuykuspa niranku: “Noqaykupas fariseokunaq discipulonkunapas ayunaykun, ¿imanaqtintaq discipuloykikunari mana ayunankuchu?”, nispa. 19  Jinan Jesusqa paykunata niran: “¿Ayunankumanchu novioq amigonkuna novio paykunawan kashaqtin? Paykunawan novio kashaqtinqa manan ayunankumanchu ¿riki? 20  Ichaqa chayamunqan p’unchaykuna, chaypin novioqa paykunamanta qechusqa kanqa, chay p’unchayñan paykunaqa ayunanqaku. 21  Manan pipas mauk’a p’achamanqa mosoq telawan remiendanmanchu, mana chayqa chay mosoq telan q’estispa* mauk’a p’achata chutarispa astawanraq llik’irparinman. 22  Chaymantapas manan pipas mana poqosqa vinotaqa mauk’a odrekunaman* jich’aykunmanchu. Jich’aykunmanchus chayqa, odrekunachá phatapunman vino poqoqtin, chhaynapitaq vinoqa usunman, odrekunapas manaña valepunmanchu. Aswanpas mana poqosqa vinotaqa mosoq odrekunamanmi jich’aykuna”, nispa. 23  Sábado p’unchaypi chajra-chajranta Jesús pasashaqtinmi discipulonkunaqa purin-purin trigota p’itispa mijuyta qallariranku. 24  Jinan fariseokunaqa Jesusta niranku: “¡Qhawariy! ¿Imaraykun sábado p’unchaypi mana ruwanata ruwashanku?”, nispa. 25  Jesustaq paykunata niran: “¿Manachu jayk’aqpas leerankichis imatachus David ruwaran chayta? Paymi runankunapiwan yarqaypi tarikuranku manaña imapas mijunankupaq kaqtin. 26  Chaymi, uma sacerdote Abiatarmanta willakuypi nisqan jina, Diospa wasinman jaykuspa Diosman jaywasqa t’antata mijuran, qoykurantaq runankunamanpas. Chay t’antataqa manan pipas mijunanchu karan, aswanpas sacerdotekunallan. ¿Manachu chayta leerankichis?”, nispa. 27  Chaymantan nillarantaq: “Sábado p’unchayqa runakunaraykun churasqa karan, manataqmi runakunachu sábado p’unchayrayku kamasqa karan. 28  Chhaynaqa, runaq Churinqa sábado p’unchaypapas Señorninmi”, nispa.

Uraypi willakuykuna

“Qatikamuway” nispaqa Jesuspa discipulon kapuymantan rimashan.
“Q’estiy” simitaqa “q’entiy” otaq “encogekuy” nillankutaqmi.
Chaykunaqa karan uywa qaramanta ruwasqan.