Marcos 13:1-37

  • TUKUKUY TIEMPOMANTA (1-37)

    • Guerrakuna, terremotokuna, yarqaykuna (8)

    • Allin willakuykunan willakunqa (10)

    • Manchay ñak’ariymi kanqa (19)

    • Runaq Churinmi jamunqa (26)

    • Higos sach’a (28-31)

    • Makillan kashana (32-37)

13  Templomanta lloqsishaqtinmi jujnin discipulon niran: “¡Yachachikuq, qhawariy khayna munay rumikuna, khayna munay perqakuna!”, nispa.  Jinan Jesusqa niran: “¿Kay jatun perqakunatachu qhawashankichis? Yachanallaykichispaqpas, kaypiqa manapunin juj rumillapas rumi patapi qhepanqachu, llapallanmi thunisqa kapunqa”, nispa.  Temploq chimpan Olivos orqopi Jesús tiyashaqtinmi Pedro, Santiago, Juan, Andrés ima sapaqllapi payta tapuranku:  “Niwayku: ¿Jayk’aqmi chaykuna kanqa? ¿Ima señalmi rikuchinqa llapa chaykuna tukukunan tiempopiña kashasqanta?”, nispa.  Jinan Jesusqa paykunata niran: “Cuidakuychis, paqtataq pipas pantachisunkichisman.  Askhan sutiywan sutichakuspa jamunqaku: ‘Noqan Cristoqa kani’, nispa, chhaynapin askhata pantachinqaku.  Chaymantapas tukuyneqpi guerrakuna kasqanmanta uyarispaqa aman mancharikunkichischu, chaykunaqa kananpunin, chaywanpas manaraqmi tukukuychu.  ”Juj nacionmi juj nación contra jatarinqa, juj llaqtataq juj llaqta contra jatarinqa; kayneqpi chayneqpin kanqa terremotokunapas; kallanqataqmi yarqaypas. Chaykunaqa nanay* qallariyllaraqmi.  ”Qankunaqa allinta cuidakuychis; runakunan juzgana wasikunaman apasunkichis, sinagogakunapitaq soq’aykusqa kankichis, kamachikuqkunaq reykunaq ñaupanmantaq noqarayku apasqa kankichis, chhaynapi paykunapas willasqa kanankupaq. 10  Ñaupaqtaqa llapa nacionkunamanraqmi allin willakuykuna willasqa kanan. 11  Juzgana wasikunaman apasqa kankichis chayqa, aman llakipakunkichischu imatachus rimanaykichismantaqa, chay ratopin yachankichis imatachus rimanaykichista, chayllatan rimankichis; manan qankunachu rimankichisqa aswanpas santo espiritun. 12  Chaymantapas wayqellantaqmi wayqenta wañuchinapaq entreganqa, taytataq wawanta; wawakunapas tayta-mamanku contra jatarispan wañuchinapaq entreganqaku. 13  Sutiyraykun llapa runakunaq cheqnisqan kankichis. Tukukuykama aguantaqmi ichaqa salvasqa kanqa. 14  ”(Kayta leeqqa allin reparaqmi kanan entiendenanpaq.) Ch’usaqyachiq millakunapaq kaqta mana sayananpi sayashaqta rikunkichis chayqa, Judeapi kaqkuna orqokunaman ayqechunku. 15  Wasi patapi kaqpas amaña uraykuchunchu, amallataq wasinmanpas jaykuchunchu ima kaqnintapas orqomunanpaq; 16  chajrapi kaqpas amaña wasinman kutichunchu p’achanta apananpaq. 17  ¡Ay chay p’unchaykunapi onqoq warmikunamanta, ñuñuq wawayoq warmikunamantapas! 18  Diosmanta mañakushallaychis ama chiri tiempopichu chay kananpaq. 19  Chay p’unchaykunaqa ñak’ariy p’unchaykunan kanqa, chhayna ñak’ariyqa manan karanchu kay pacha runakunata Dios kamasqanmantapacha ni kunankamapas, nitaq qhepamanpas kanqachu. 20  Manachus chay p’unchaykunata Jehová Dios pisiyachinman chayqa, manan pipas* salvasqachu kanman; paypa ajllasqankunaraykun ichaqa chay p’unchaykuna pisiyachisqa kanqa. 21  ”Pipas nisunkichisman: ‘¡Qhawariychis! Kaypin Cristoqa kashan’, otaq ‘¡qhawariychis! Jaqaypin kashan’, nispa chayqa, aman creenkichischu. 22  Llulla Cristokunan llulla profetakunan rijurimunqa, jinaspan señalkunata, admiranapaq jina kaqkunatawan ruwanqaku, chaykunawanmi ajllasqakunatawanraq pantachiyta munanqaku; 23  chayrayku, cuidakuychis. Ñaupaqmantañan tukuy imatapas willashaykichis. 24  ”Chay p’unchaykunapin chay ñak’ariy qhepata inti tutayanqa, killapas manaña k’anchanqachu, 25  ch’askakunapas cielomantan urmaykamunqa, cielopi kaq atiykunapas chhafchirisqan kanqa. 26  Jinan runaq Churinta rikunqaku jatun atiywan lliflli kaywan phuyupi jamushaqta. 27  Jinan payqa angelkunata kachamunqa, jinaspa ajllasqakunata juñunqa kay pachaq tawantin ladonmanta,* kay pachaq k’uchunmanta cieloq k’uchunkamaraq. 28  ”Qankunaqa higos sach’aq k’allmachankuna ch’ijchirimuqtin, raphinkunapas lloqsimuqtinmi yachankichis paray tiempoqa cercapiña kashasqanta ¿riki? 29  Chhaynallataq chaykuna pasasqanta rikuspaykichisqa yachaychis runaq Churin qayllaykamushasqanta, punkupiña kashasqanta. 30  Cheqaqtan niykichis: Manapunin kay tiempo runakunaqa wañunqakuchu llapa chaykuna junt’akunankama. 31  Cielopas kay pachapas tukukapunqan, imachus nisqaykunan ichaqa manapuni tukukunqachu. 32  ”Chay p’unchaymanta chay horamantawanmi ichaqa mana pipas yachanchu, ni janaq pachapi angelkunapas ni Churipas, aswanpas Yayallan yachan. 33  Makilla qhawashaychis, rijch’asqallataq kashaychispas, manan yachankichischu jayk’aqchus Diospa ajllasqan tiempo kasqanta. 34  Chayqa karuman ripuq runamanmi rijch’akun, paymi kamachinkunaman wasinta encargaran sapankaman llank’anata qospa, punku qhawaqtataq kamachiran makilla kashananpaq. 35  Chayrayku, makilla kashaychis, manan yachankichischu jayk’aqchus wasiyoq jamunanta, ch’isintachus, icha kuska tutatachus, icha wallpa waqaytachus, ichari tutallamantachus.* 36  Chaytaq qonqaylla chayamuspa puñushaqta tarisunkichisman. 37  Qankunaman nisqaytaqa lliumanmi nini: Makilla kashaychis”, nispa.

Uraypi willakuykuna

Chaypiqa rimashan onqokuq warmiq nanaynin jina nanaymantan.
Griego rimaypiqa “manan ima aychapas” ninmi.
Griego rimaypiqa “tawantin wayramanta” ninmi.
Ñaupa tiempopiqa tawamanmi tutata t’aqaqku: Ñaupaq kaqtan “ch’isin” niqku, chayqa karan las saisemanta las nuevekaman. Iskay kaqtan “kuska tuta” niqku, chayqa karan las nuevemanta las docekaman. Kinsa kaqtan “wallpa waqay” niqku, chayqa karan las docemanta las treskaman. Tawa kaqtataq “tutallamanta” niqku, chayqa karan las tresmanta las saisekaman.