Marcos 11:1-33

  • Jerusalenman Jesuspa jaykusqanmanta (1-11)

  • Higos sach’a ñakasqa kasqanmanta (12-14)

  • Jesús templomanta runakunata qarqosqanmanta (15-18)

  • Higos sach’aq ch’akipusqanmanta (19-26)

  • Jesuspa autoridadninta mana respetasqankumanta (27-33)

11  Jerusalén llaqtaman qayllaykushaspankun Olivos orqoman chayaranku, chaypin karan Betfagué llaqtacha, Betania llaqtachapiwan, jinan Jesusqa iskay discipulonkunata kacharan:  “Jaqay rijurimushaq aylluman riychis, chayman jaykuspaykichis jinan mana piqpa sillakusqan malta asnota watasqata tarinkichis, jinaspa paskaruspa aysamunkichis.  Sichus pipas nisunkichis: ‘¿Imatan ruwashankichis?’, nispa chayqa, ‘Señormi munashan, kunallanmi kutichimpunqa’, nispan ninkichis”, nispa.  Jinan paykunaqa chay aylluman rispa ñan patapi kaq wasi punkuq chimpanpi juj malta asnota watasqata tariranku, jinaspa paskaranku.  Chaypi sayashaq wakin runakunataq niranku: “¿Imapaqmi chay malta asnota paskashankichis?”, nispa.  Paykunataq Jesuspa nisqanman jina niranku, jinan chay runakunaqa mana jark’arankuchu.  Chaymi paykunaqa malta asnota Jesusman aysamuranku, jinaspa jawa p’achankuwan caronaykuranku, Jesustaq chay asnochaman sillaykuran.  Askha runakunataqmi jawa p’achankuta ñan pataman mast’aranku, wakintaq campomanta raphisapa k’allmakunata wit’umuspa chayta mast’aranku.  Ñaupanta riqkunapas qhepanta jamuqkunapas alto kunkawanmi nisharanku: “¡Salvasqa kachun! ¡Sumaqpaq qhawarisqa kachun Jehová Diospa sutinpi jamuqqa! 10  ¡Sumaqpaq qhawarisqa kachun taytanchis Davidpa jamuq gobiernonqa! ¡Janaq pachapi tiyaq payta* salvachun!”, nispa. 11  Jerusalén llaqtaman jaykuspataq temploman riran, chaypin muyuriqninpi tukuy imaymana kaqkunata qhawariran, ichaqa tardeña kaqtinmi chunka iskayniyoq apostolninkunapiwan Betania llaqtachaman kutipuran. 12  Qhepantin p’unchaytaq* Betania llaqtachamanta lloqsimushaqtinku Jesusqa yarqachikuran. 13  Chaymi raphiyoq higos sach’ata karullamantaraq rikuspa “rurushanpaschá” nispa chayman riran. Chayaspataq mana ima rurutapas chaypi tariranchu, aswanpas raphillata, mana higos tiempochu kasqanrayku. 14  Chaymi Jesusqa niran: “Amaña jayk’aqpas pipas qanmanta ruruta mijuchunchu”, nispa. Discipulonkunaqa uyarisharankun chay nisqanta. 15  Chaymantataq paykunaqa Jerusalén llaqtaman chayaranku. Chaypin Jesusqa temploman jaykuspa vendeqkunata rantiqkunatawan jawaman qarqomuyta qallariran, qolqe cambiaqkunaq mesankunatapas paloma vendeqkunaq tiyanankunatapas t’ijrarpariranmi, 16  jark’arantaqmi templonta imatapas pasachiy munaqkunata. 17  Yachachishaspan Jesusqa paykunata niran: “¿Manachu qelqasqa kashan: ‘Wasiyqa “llapa nacionmanta runakunaq mañakunan wasi” nisqan kanqa’, nispa? Qankunataq ichaqa suwakunaq t’oqonman tukuchipusqankichis”, nispa. 18  Chayta uyarispan umalli sacerdotekunaqa kamachikuy simita yachachiqkunapiwan imaynatachus Jesusta wañuchinankupaq piensayta qallariranku, ichaqa llapa runakuna yachachikuyninmanta sinchita admirakusqankuraykun payta manchakuranku. 19  Inti jaykuyta jinataq llaqtamanta lloqsipuranku. 20  Tutallamanta rishaspataq higos sach’ata rikuranku saphinmantapacha ch’akisqata. 21  Jinan Pedroqa ñaupaq p’unchaypi imachus pasasqanta yuyarispa niran: “¡Yachachikuq, qhawariy! Ñakasqayki higos sach’a ch’akirapusqa”, nispa. 22  Jesustaq paykunata niran: “Diospi iñiychis. 23  Cheqaqtan niykichis: Pipas kay orqota ninman: ‘Jatarispa lamar-qochaman wijch’uykukuy’, nispa, manataq sonqonpi iskayanmanchu, aswanpas iñinman chay nisqan junt’akunanpi chayqa, chhaynapunin kanqa. 24  Chaymi niykichis: Tukuy imatapas mañakuspaykichisqa chaskiwaqchispas jinataña iñiychis, jinan chaskinkichis. 25  Mañakushaspaykichisqa contraykichispi juchallikuqkunata perdonaychis, chhaynapi janaq pachapi kaq Yayaykichispas juchaykichiskunata perdonanasuykichispaq”, nispa. 26  *—— 27  Paykunaqa wajmantan Jerusalén llaqtaman jamuranku. Templo patiopi Jesús purishaqtintaq umalli sacerdotekuna, kamachikuy simita yachachiqkuna, kuraq runakunapiwan jamuspa 28  payta tapuranku: “¿Ima autoridadwantaq qanri kaykunata ruwanki? ¿Pin autoridadta qorasunki kaykunata ruwanaykipaq?”, nispa. 29  Jinan Jesusqa paykunata niran: “Noqapas jujta tapullasaykichistaq. Kutichiwankichis chayqa, noqapas nillasaykichistaqmi ima autoridadwanchus kaykunata ruwashani chayta. 30  ¿Pin Juanman atiyta qoran bautizananpaq? ¿Dioschu* icha runakunachu? Niwaychis”, nispa. 31  Jinan paykunapura ninakuranku: “‘Diosmi’ nisunchis chayqa, ‘¿imaraykun mana creerankichischu?’ niwasunchá riki. 32  ‘Runakunan’ nisunchis chayqa, imaraqchá pasawasunman”, nispa. Paykunaqa manchakurankun runakunata llapallanku Juanta profetapaqpuni jap’isqankurayku. 33  Chaymi Jesusta niranku: “Manan yachaykuchu”, nispa. Jesustaq paykunata niran: “Chhaynaqa manan noqapas nisaykichischu ima autoridadwanchus kaykunata ruwani chayta”, nispa.

Uraypi willakuykuna

“Payta” nispaqa Jesusmantan rimashan.
Qhepantin p’unchaytaqa “paqaristin p’unchay” nillankutaqmi.
Kay versiculoqa manan rijurinchu “Westcott, Hort” nisqa griego qelqakunapi, nitaq wakin allin reqsisqa qelqakunapipas.
Griego rimaypiqa “janaq pachachu” ninmi.