Marcos 10:1-52

  • Casarakuymanta t’aqanakuymantawan (1-12)

  • Jesús wawakunata bendecisqanmanta (13-16)

  • Qhapaq runaq tapukusqanmanta (17-25)

  • Diospa gobiernonrayku imakuna saqenamanta (26-31)

  • Wañunanmantan Jesús wajmanta willakun (32-34)

  • Santiagowan Juanwan imachus mañakusqankumanta (35-45)

    • Askha runakunaraykun Jesusqa vidanta qoran (45)

  • Bartimeo sutiyoq ñausa runa qhaliyachisqa kasqanmanta (46-52)

10  Chaymanta jatarispan Jesusqa Judea jap’iypi Jordán mayu chimpaman riran, chaypin runakunaqa wajmanta payman juñukamuranku. Paytaq imaynan ruwallaqpuni jinata wajmanta yachachiyta qallariran.  Fariseokunataq Jesusman achhuykuspa pruebaman churayta munaspa tapuranku: “¿T’aqakapullanmanchu* juj runa esposanmanta?”, nispa.  Jinan Jesusqa niran: “¿Imatan Moisés kamachirasunkichis?”, nispa.  Paykunataq niranku: “‘Pi runapas t’aqanakuy papelta esposanman qospaqa t’aqakunmanmi’, nispan Moisesqa kamachikuran”, nispa.  Jesustaq paykunata niran: “Moisesqa k’ullu sonqo kasqaykichisraykun chay kamachikuytaqa qelqapurasunkichis.  Diosmi ichaqa qallariymantapacha ‘runataqa kamaran qharita warmitawan.  Chayraykun runaqa taytantapas mamantapas saqepunqa,  iskayninkutaq juj aychalla kapunqaku,’ chhaynaqa manan iskayñachu kanku, aswanpas juj aychallañan.  Chayrayku, Diospa jujllachasqantaqa* ama pipas t’aqachunchu”, nispa. 10  Discipulonkunapas chayllamantataqmi Jesusta wasipi tapuranku. 11  Jinan payqa niran: “Pipas esposanmanta t’aqakuspa jujwan casarakunman chayqa, esposanpa contranpin pantay juchaman urmashanman, 12  juj warmitaqchus qosanmanta t’aqakuspa jujwan casarakunman chayqa, pantay juchamanmi urmashallanmantaq”, nispa. 13  Chaymantataq runakunaqa wawakunata Jesusman apamuyta qallariranku paykunaman makinta churaykunanpaq, discipulonkunataq chay runakunata phiñarikuranku. 14  Chayta rikuspan Jesusqa phiñakuran, jinaspa discipulonkunata niran: “Jinalla wawakunaqa noqaman jamuchunku, ama jark’aychischu; Diospa gobiernonqa paykunapaqmi. 15  Cheqaqtan niykichis: Pipas Diospa gobiernonta mana juj wawa jinachu chaskinqa chayqa, manapunin chaymanqa jaykunqachu”, nispa. 16  Wawakunata marq’arikuspataq paykunaman makinta churaykuspa allinlla kanankupaq Diosmanta mañakuran. 17  Ñanninta Jesús rishaqtinmi juj runa phawaylla jamuspa ñaupanpi qonqorikuran, jinaspa tapuran: “Allin yachachikuq, ¿imatan ruwanay wiñay kausayta chaskinaypaq?”, nispa. 18  Jinan Jesusqa niran: “¿Imaraykun ‘allin’ niwanki? Manan pipas allinqa kanchu, aswanpas Diosllan. 19  Yachankiñamá riki kamachikuykunataqa: ‘Aman pitapas wañuchinkichu, aman jujwan pantankichu, aman suwakunkichu, aman pitapas yanqa tumpankichu, aman pitapas engañankichu, tayta-mamaykitan respetanki’, nisqata”, nispa. 20  Chay runataq niran: “Yachachikuq, juch’uychaymantapachan chaykunataqa junt’ashani”, nispa. 21  Jinaqtinmi Jesusqa munakuywan qhawaykuspa payta niran: “Kanraqmi juj ruwanayki: Phaway kaqniykikunata vendemuspa wajchakunaman qomuy, chhaynapin janaq pachapi qhapaq kayniyki kanqa; jinaspa qatikamuway”, nispa. 22  Paytaq Jesuspa chay nisqanwan llakikuran, sinchi llakisqataq ripuranpas askha kaqniyoq kasqanrayku. 23  Jinan Jesusqa muyuriqninta qhawarispa discipulonkunata niran: “¡May sasapunin qolqesapakunapaqqa Diospa gobiernonman jaykuy kanqa!”, nispa. 24  Chayta uyarispan discipulonkunaqa admirakuranku, Jesustaq paykunata niran: “Wawallaykuna, ¡may sasapunin Diospa gobiernonman jaykuyqa! 25  Camelloraqmi agujaq ninrinta suskhuyta atinman juj qhapaq runa Diospa gobiernonman jaykunanmantaqa”, nispa. 26  Paykunataq astawanraq admirakuspa niranku:* “Chhaynaqa, ¿pillañataq salvasqari kanman?”, nispa. 27  Jinaqtinmi Jesusqa paykunata qhawaykuspa niran: “Runakunaqa manan atinkumanchu chay ruwaytaqa, Diospaqmi ichaqa tukuy imapas atikuqlla”, nispa. 28  Jinan Pedroqa Jesusta niran: “Noqaykuqa tukuy imata saqespaykun qatikamushaykiku”, nispa. 29  Jesustaq niran: “Cheqaqtan niykichis: Pipas wasintapas, wayqenkunatapas, panankunatapas, mamantapas, taytantapas, wawankunatapas, chajrankunatapas, noqarayku allin willakuykunarayku ima saqeqqa, 30  qatikachasqan kanqa; ichaqa pachaj kutitawanraqmi kay tiempopi chaskinqa wasikunata, wayqekunata, panakunata, mamakunata, wawakunata, chajrakunata ima; jamuq tiempopitaq wiñay kausayta chaskinqa. 31  Askha ñaupaqpi kaqkunan qhepapi kanqaku, askha qhepapi kaqkunataq ñaupaqpi kanqaku”, nispa. 32  Jerusalenman wichaq ñannintan risharanku, Jesustaq ñaupankuta risharan, discipulonkunaqa ancha admirasqan kasharanku, qhepankuta riqkunataq manchakuyta qallariranku. Jesusqa wajmanta chunka iskayniyoq apostolkunata juj ladoman pusaspan imakunachus payta pasananña kasharan chayta willayta qallariran: 33  “Jerusalén llaqtamanmi wichashanchis, chaypin runaq Churinqa umalli sacerdotekunaman kamachikuy simi yachachiqkunamanwan entregasqa kanqa. Paykunan wañunanpaq juchachanqaku, jinaspa waj nacionmanta runakunaman entreganqaku, 34  paykunataq burlakunqaku, thoqaykunqaku, jasut’inqaku, wañuchinqaku ima; kinsa p’unchaymantan ichaqa jatarimpunqa”, nispa. 35  Chaymantataq Zebedeoq wawankuna Santiagowan Juanpiwan Jesusman achhuykuspa niranku: “Yachachikuq, ima mañakusqaykutapas ruwapuwanaykikutan munayku”, nispa. 36  Jesustaq paykunata niran: “¿Ima ruwapunaytan munankichis?”, nispa. 37  Paykunataq niranku: “Kamachikuspayki jujniykuta paña ladoykipi jujniykutataq lloq’e ladoykipi tiyachiwankiku”, nispa. 38  Jinan Jesusqa paykunata niran: “Qankunaqa manan yachankichischu imatachus mañakushankichis chayta. ¿Atiwaqchischu ujanayña kashan chay copa* ujayta? ¿Atiwaqchischu bautizakushasqay bautismowan bautizakuyta?”, nispa. 39  Paykunataq niranku: “Atisaqkun”, nispa. Jesustaq niran: “Ujanay copataqa ujankichismi, bautizakushasqay bautismowanpas bautizakunkichismi. 40  Paña ladoypi lloq’e ladoypi pipas tiyaykunanmi ichaqa mana noqaq ninaychu, aswanpas Diosmi ajllanqa pikunachus chaypi tiyanqa chaytaqa”, nispa. 41  Chayta yachaspan chunka discipulonkunaqa phiñakuranku Santiagopaq Juanpaqwan. 42  Jinan Jesusqa paykunata wajaspa niran: “Yachasqaykichis jina, nacionkunapi kamachikuq jina kaqkunaqa kamachisqan runakunatan dueñochakunku, umalli kaqkunapas jujkunatan sarunchanku. 43  Qankuna ukhupin ichaqa mana chhaynachu kanan, aswanmi pipas qankuna ukhupi kuraq kayta munaqqa serviqniykichis kanan, 44  mayqenniykichispas ñaupaqpi kayta munaqtaq llapaykichispa kamachin kanan. 45  Runaq Churinpas manan servichikuqchu jamuran, aswanpas jujkunata servinanpaqmi, vidanwan* pagaspa askha runakunata kacharichinanpaqwan”, nispa. 46  Chaymantataq Jericó llaqtaman jaykuranku. Chay llaqtamantan Jesusqa lloqsisharan discipulonkunawan askha runakunapiwan; ñan patapitaq Timeoq wawan Bartimeo tiyashasqa, payqa limosnata mañakuq ñausa runan karan. 47  Nazaret llaqtayoq Jesús chayninta pasashasqanta uyarispan payqa wajakuyta qallariran: “¡Davidpa Churin Jesús, khuyapayaykuway!”, nispa. 48  Jinan askha runakuna payta phiñarikuranku upallananpaq, paytaq ichaqa astawanraq wajarikuran: “¡Davidpa Churin, khuyapayaykuway!”, nispa. 49  Chaymi Jesusqa sayaykuspa niran: “Wajamuychis”, nispa. Jinan chay ñausa runata wajamuranku: “¡Kallpachakuy! Sayariy, wajamushasunkin”, nispa. 50  Jinan chay ñausa runaqa jawa p’achantapas wijch’usparaq sayariruspa usqhaylla Jesusman riran. 51  Jinan Jesusqa payta tapuran: “¿Ima ruwapunaytan munanki?”, nispa. Chay ñausa runataq niran: “Yachachikuq,* ñawiyta kichariway”, nispa. 52  Jesustaq niran: “Phaway ripuy, iñiyniykin qhaliyachisunki”, nispa. Paytaq kaq rato qhawariran, jinaspa Jesusta qatikuran.

Uraypi willakuykuna

Griego rimaypiqa leykunaq nisqanman jina jujpaqkama t’aqanakuymantan rimashan.
Griego rimaypiqa “yugoman watasqantaqa” ninmi.
Chaytaqa “ninakuranku” nispapas t’ijrakullanmantaqmi.
Jesustan wañuchinanku karan Diosta k’amiqmanta tumpaspa, Diostaq mana chayta jark’ananchu karan, chaytan chay copaqa representan.
Chaypiqa “almanwan” nillanmantaqmi.
Hebreo rimaypiqa “rabboni” ninmi.