Lucas 4:1-44

  • Jesusta Saqra tentasqanmanta (1-13)

  • Jesús Galileapi predicayta qallarisqanmanta (14, 15)

  • Jesusta Nazaretpi mana chaskisqankumanta (16-30)

  • Capernaumpi kaq sinagogapi Jesuspa kasqanmanta (31-37)

  • Simonpa suegranpas juj runakunapas qhaliyachisqa kasqankumanta (38-41)

  • Runakuna Jesusta ch’in ladopi tarisqankumanta (42-44)

4  Chaymantataq Jesusqa santo espirituwan junt’a kaspa Jordán mayumanta ripuran, espiritutaq ch’inneqpi kashaqtin kayman jaqayman pusaran  tawa chunka p’unchay, chaypin Saqraqa tentaran. Chay p’unchaykunapiqa manan imatapas Jesusqa mijuranchu, chaymi chay p’unchaykuna tukukuqtinqa yarqay jap’iran.  Jinan Saqraqa niran: “Diospa Churinchus kanki chayqa, kay rumita niy t’antaman tukunanpaq”, nispa.  Jesustaq niran: “Qelqasqan kashan: ‘Manan t’antallawanchu runaqa kausanqa’”, nispa.  Jinan Saqraqa juj orqoman Jesusta aparan, chaypin juj ratollapi kay pachapi llapa nacionkunata qhawarichiran,  jinaspa Jesusta niran: “Qanmanmi qopusayki llapa kay nacionkunata qhapaq kayninkunatawan, noqamanmi qosqa karan llapa kaykunaqa, chaymi noqaqa pichus munasqayman qoyta atiyman.  Chayrayku, sichus juj kutillata adorawanki chayqa, llapa kaykunan qanpaq kapunqa”, nispa.  Jinan Jesusqa niran: “Qelqasqan kashan: ‘Jehová Diosniykitan adoranki, pay sapallantataqmi servinkipas’”, nispa.  Chaymantataq Saqraqa Jerusalenman Jesusta aparan, jinaspa temploq perqan pataman sayaykachispa niran: “Diospa Churinchus kanki chayqa, kaymanta saltaykuy, 10  qelqasqan kashan: ‘Paymi angelninkunata kamachinqa cuidanasuykikupaq’, 11  jinan ‘paykuna makinkupi apasunkiku, chhaynapi chakiykita rumiman mana takakunaykipaq’”, nispa. 12  Jesustaq niran: “Qelqasqan kashan: ‘Aman Jehová Diosniykita pruebaman churankichu’”, nispa. 13  Jinan Saqraqa tentayta tukuspa ripuran jayk’aqchus allin kanman wajmanta tentananpaq chaykama. 14  Jesustaq santo espirituwan junt’a kaspa Galileaman kutipuran. Chaypi kaq llapa jawa llaqtachakunapitaq paymanta allin willakuykuna mast’arikuran. 15  Jesusqa paykunaq sinagogankunapin* yachachiyta qallariran, llapa runakunataq paymanta allinta rimaranku. 16  Chaymantataq Jesusqa wiñasqan Nazaret llaqtaman riran, sábado p’unchay kaqtintaq imaynachus ruwallaqpuni jinata sinagogaman jaykuran, jinaspa sayariran Diospa simin qelqata leenanpaq. 17  Jinan paymanqa jaywaranku profeta Isaiaspa qelqasqan k’uyuta, paytaq chayta mast’ariran, maskhaspataq khayna qelqasqata tariran: 18  “Jehová Diospa espiritunmi noqapi kashan, paymi ajllawaran allin willakuykunata wajchakunaman willanaypaq. Paymi kachamuwaran kacharichisqa kanankumanta presokunaman willanaypaq, ñausakunamanpas qhawarinankumanta willanaypaq; sarunchasqakunata libranaypaq, 19  Jehová Diospa chaskinan watamanta willanaypaqwan”, nispa niqta. 20  Chay qelqata k’uyupuspataq waqaychaqman qopuspa tiyaykuran, sinagogapi llapa kaqkunataq mana chinkachispa payta qhawasharanku. 21  Jinan Jesusqa paykunata niran: “Kunan p’unchaymi kay leesqay qelqa junt’akun”, nispa. 22  Llapankun paymanta allinta rimasharanku, admirasqataq kasharanku ancha sumaq simikuna rimasqanmanta, ichaqa ninakusharankun: “Kayqa Josepa wawallanmá riki, ¿imaynapitaq chaytari ninman?”, nispa. 23  Jesustaq paykunata niran: “Rimaypi nisqankuman jinachá: ‘Doctor, qan kikiykita jampikuy’, niwankichis; niwallankichistaqchá: ‘Capernaum llaqtapi imaymana ruwasqaykitan uyariyku, ruwallaytaqyá kay llaqtaykipipas chaykunata’, nispaykichis”, nispa. 24  Nillarantaqmi: “Cheqaqtan niykichis: Manan mayqen profetapas kikin llaqtanpiqa allin chaskisqachu. 25  Cheqaqtapunin nillaykichistaq: Eliaspa tiemponpiqa askha viudakunan Israel llaqtapi karan, kinsa wata soqta killayoqta mana paramuqtintaq jinantinpi yarqay karan. 26  Chaywanpas Eliasqa manan chay viudakunamanta mayqenmanpas kachasqachu karan, aswanpas Sidonpi kaq Sarepta llaqtapi tiyaq viudallamanmi. 27  Profeta Eliseoq tiemponpipas askhan lepra onqoyniyoq runakunaqa Israelpi karan, chaywanpas manan mayqenninkupas qhaliyachisqachu karan, aswanpas Siria llaqtayoq Naamanllan qhaliyachisqa karan”, nispa. 28  Chayta uyarispankun Sinagogapi llapa kaqkunaqa sinchita phiñakuranku, 29  jinan jatarispanku usqhaylla llaqtamanta orqoranku, jinaspa llaqta jatarichisqanku orqopi sayaq qhata patakama aparanku chaymanta qaqapachinankupaq. 30  Jesustaq ichaqa chaupinkuta lloqsispa ripuran. 31  Jinaspan Galileapi kaq Capernaum llaqtaman uraykuran, chaypitaq sábado p’unchaykunapi runakunaman yachachiran, 32  paykunataq anchata admirakuranku imayna yachachisqanmanta; Jesusqa Diospa nisqanman jinapunin yachachiq.* 33  Sinagogapin kasharan millay espirituq junt’aykusqan runa, paymi fuerteta qapariran: 34  “Nazaret llaqtayoq Jesús, ¿iman noqaykuwan ruwanayki? ¿Wañuchiwaqniykuchu jamushanki? Allintan yachani pichus kasqaykita, qanqa Diospa ch’uya Churinmi kanki”, nispa. 35  Jesustaq payta phiñarikuran: “Upallay, lloqsiy paymanta”, nispa. Jinan chay espirituqa runakuna chaupiman wijch’urparispa mana k’irispalla paymanta lloqsiran. 36  Chaywanmi llapallanku anchata admirakuspa paykunapura ninakuranku: “¿Ima rimaytaq kayri? Atiywanmi millay espiritukunatapas kamachin, paykunataq kasukuspa runakunamanta lloqsinku”, nispa. 37  Jinan paymanta willakuykunaqa muyuriqninpi lliu llaqtakunaman mast’arikuran. 38  Sinagogamanta lloqsispataq Jesusqa Simonpa* wasinman jaykuran. Chaypin Simonpa suegranqa sinchi fiebrewan ñak’arisharan, jinan payta valekuranku yanapananpaq. 39  Jesustaq payman achhuykuspa fiebrenmanta qhaliyachiran. Jinan chay warmiqa kaq rato jatarispa paykunata atiendeyta qallariran. 40  Inti jaykupushaqtintaq runakunaqa wasinkupi kaq onqosqakunata Jesusman pusamuranku, ima onqoyniyoqña karanku chaypas. Paytaq sapankaman makinta churaykuspa qhaliyachiran. 41  Askha runakunamantataqmi supaykunapas qaparikuspa lloqsiranku: “Qanqa Diospa Churinmi kanki”, nispa. Jesustaq ichaqa phiñarikuspa supaykunata mana rimanankuta dejaqchu Cristo kasqanta yachasqankurayku. 42  Qhepantin p’unchaytaq* Jesusqa lloqsispa ch’in ladoman riran. Runakunataq payta maskhayta qallariranku, maypichus kasqanman chayaspankutaq valekuranku ama ripunanpaq. 43  Jesustaq ichaqa paykunata niran: “Juj llaqtakunapipas willamunaymi Diospa gobiernonmanta allin willakuykunataqa, chaypaqmi Diosqa kachamuwaran”, nispa. 44  Chaymi payqa Judeapi kaq sinagogakunapi allin willakuykunata willaspa puriran.

Uraypi willakuykuna

Qhaway “explicasqa simikuna” nisqapi “sinagoga” nisqata.
Griego rimaypiqa “atiywanmi yachachiq” ninmi.
Chayqa apóstol Pedroq jujnin sutinmi.
Qhepantin p’unchaytaqa “paqaristin p’unchay” nillankutaqmi.