Lucas 24:1-53

  • Jesuspa kausarimpusqanmanta (1-12)

  • Emaús aylluman risqankumanta (13-35)

  • Discipulonkunaman Jesuspa rijurisqanmanta (36-49)

  • Jesuspa janaq pachaman wichapusqanmanta (50-53)

24  Semana qallariy p’unchaytataq* pacha illarimuyllata sepulturaman riranku preparasqanku sumaq q’apaq qorakuna apariykusqa.  Chayaspataq sepultura wisq’ana rumita juj ladoman suchuchisqata tariranku,  jinaspa chayman jaykuranku, ichaqa manan tarirankuchu Señor Jesuspa cuerponta.  Chaywan ancha admirasqa kashaqtinkun iskay runakuna ladonkupi rijuriran k’ancharishaq p’achayoq.  Chaywan mancharikuspan paykunaqa umankuta k’umuranku, chay runakunataq niranku: “¿Imanaqtintaq kausashaq kaqtari wañusqakuna ukhupi maskhashankichis?  Payqa manan kaypiñachu, aswanpas kausarichisqan kapun. Yuyariychis Galileapiraq kashaspa imatachus nirasunkichis chayta.  Payqa: ‘Runaq Churinqa juchasapa runakunamanmi entregasqa kanan, k’aspipi wañuchisqan kanan, ichaqa kinsa p’unchaymantan jatarichisqa kanqa’ nispamá nirasunkichis riki”, nispa.  Jinan paykunaqa Jesuspa imakunachus nisqanta yuyariranku.  Sepulturamanta kutipuspataq llapa chaykunata willaranku chunka jujniyoq apostolkunaman wakin discipulokunamanwan. 10  Apostolkunaman willaqkunan karan: María Magdalena, Juana, Santiagoq maman María, paykunawan kashaq wakin warmikuna ima. 11  Chay warmikunaq willasqantan ichaqa cuentopaq jina rikuranku, chaymi mana creerankuchu. 12  Pedron ichaqa sayarispa phawaylla sepulturaman riran, chayaruspataq k’umuykuspa sepultura ukhuta qhawaykuran, jinan lino telakunallataña chaypi rikuran. Chaymi imachus pasasqanmanta admirasqa kutipuran. 13  Chay p’unchayllataqmi “Emaús” nisqa aylluman risharanku Jesuspa iskay discipulonkuna, chay aylluqa chunka jujniyoq kilómetro jina karupin kasharan Jerusalén llaqtamanta, 14  paykunan rimasharanku tukuy chaykuna pasasqanmanta. 15  Chaykunamanta riman-riman purishaqtinkun Jesusqa paykunaman achhuykuran, jinaspa paykunawan kuska puriran; 16  paykunan ichaqa mana reqsirankuchu. 17  Jesustaq paykunata tapuran: “¿Imamantan afantaraq rimashankichis?”, nispa. Jinan paykunaqa llakisqa uyantin sayaykuranku. 18  Cleopas sutiyoq kaqtaq niran: “¿Sapallan tiyaq waj llaqtayoq runachu kanki, chaychu mana yachanki kay p’unchaykunapi Jerusalén llaqtapi imakunachus pasasqanta?”, nispa. 19  Jinan Jesusqa paykunata tapuran: “¿Imakunataq pasaranri?”, nispa. Paykunataq niranku: “¿Manachu Nazaret llaqtayoq Jesusmanta imatapas uyariranki? Payqa profetan karan, atiywanmi imatapas ruwaq, atiywantaqmi rimaqpas, allin qhawarisqataqmi karan Diospa ñaupanpi runakunaq ñaupanpipas. 20  Paytan umalli sacerdotekunawan juj umallikunapiwan entregaranku wañuchisqa kananpaq, jinan k’aspiman clavaranku. 21  Noqaykuqa: ‘Paychá Israel llaqtataqa kacharichinqa’, nispan nisharayku. Jinaspapas chaykunaq pasasqanmantaqa ñamá kinsa p’unchayña karunpas. 22  Chaymantapas noqayku t’aqamanta wakin warmikunan admirakuytaraq willawanku, paykunan illarimuyllata sepulturata risqaku, 23  ichaqa manan Jesuspa cuerponta tarimusqakuchu, aswanmi angelkunata rikumusqaku, chay angelkunan paykunaman willamusqa: ‘Jesusqa kausashanmi’, nispa. 24  Chaymi noqaykuwan kashaqkunamanta wakinqa sepulturata riranku, chay warmikunaq nisqanta jinatapunitaqmi tarimusqakupas, Jesustan ichaqa mana rikumusqakuchu”, nispa. 25  Jinan Jesusqa paykunata niran: “Yau mana yuyayniyoq, mana entiendeq sonqoyoq runakuna, ¿imaraykun mana entiendenkichischu profetakunaq llapa rimasqanta? 26  ¿Manachu Cristoqa chaykunata ñak’arinanpuni karan, chhaynapi jatunchasqa kananpaq?”, nispa. 27  Jinaspataq Diospa simin qelqapi paymanta lliu qelqasqata entiendechiran, Moisespa qelqasqanmanta qallarispa llapallan profetakunaq qelqasqankama. 28  May ayllumanchus risharanku chayman qayllaykushaqtinkutaq Jesusqa aswan karumanpas rishanman jina purishallaran. 29  Chaymi paykunaqa qhepakunanpaq valekuranku: “Ama jinachu kay, noqaykuwan qhepakuy, intipas ñamá chinkaykapushanña, tutayamunqañan kanpas”, nispa. Jinan Jesusqa paykunawan kuska wasiman jaykuran. 30  Paykunawan mijushaspataq t’antata jap’ispa Diosman graciasta qoran, phasmispataq paykunaman jaywaran. 31  Jinaqtinmi paykunaq ñawinkuqa kicharikuran, jinan Jesusta reqsiruranku, Jesustaq ichaqa ñaupankumanta qonqaylla ch’usaqman tukupuran. 32  Jinan paykunaqa ninakuranku: “¿Manachu ñanpi rimapayawaspanchis Diospa simin qelqaq nisqanta llapanta entiendechiwashaqtinchisqa sonqonchisraq llanllariran?”, nispa. 33  Chay ratopacha sayarispataq paykunaqa Jerusalenman kutiranku, chaypin tariranku chunka jujniyoq apostolkunata Jesuspa juj discipulonkunatawan juñunasqata, 34  paykunan ninakusharanku: “Cheqaqtapunichá Señorqa kausarimpun, Simonmanpas rijurimusqan”, nispa. 35  Emausmanta kutimuqkunapas willakurankun ñanpi imachus pasasqanmanta, imaynatachus t’antata phasmishaqtin reqsiruranku chaytapas. 36  Chaykunamanta rimashallaqtinkuraqmi Jesusqa paykuna chaupipi rijuriran, jinaspa niran: “Thaj kay kachun qankunapaq”, nispa. 37  Paykunan ichaqa sinchitapuni mancharikuranku “juj espirituchá kayqa” nispanku. 38  Chaymi Jesusqa paykunata niran: “¿Imaraykun mancharisqa kashankichis? ¿Imaraykun sonqoykichispipas iskayashankichis? 39  Qhawariychis makiykunata chakiykunata, noqa kikiymi kashani. Llamiykuwaychis, qhawaykuwaychis; juj espirituqa manan tulluyoqchu ni aychayoqchu ¿riki? Rikuwasqaykichis jinapas noqaqa tulluyoqmi aychayoqmi kashani”, nispa. 40  Chayta nispataq makinkunata chakinkunatawan paykunaman qhawaykachiran. 41  Sinchi kusisqataq admirasqataq kasharanku chayqa, manaraqmi creesharankuchu, chaymi Jesusqa paykunata niran: “¿Kashanchu imallaykichispas mijunapaq?”, nispa. 42  Jinan paykunaqa challwa kankata qoranku, 43  Jesustaq chaskikuspa paykunaq rikushasqan mijuran. 44  Chaymantataq Jesusqa paykunata niran: “Qankunawanraq kashaspaymá riki niraykichis: ‘Moisespa chaskisqan kamachikuy simipi, profetakunaq qelqasqanpi, salmo takikunapipas noqamanta qelqasqa kaqqa junt’akunanpunin’”, nispa. 45  Chhaynapin Jesusqa paykunaq yuyayninta kichariran Diospa simin qelqaq imachus nisqanta allinta entiendenankupaq, 46  jinaspa niran: “Diospa simin qelqapi nisqan jina, Cristoqa ñak’arinanmi karan, kinsa p’unchaymantataq wañusqanmanta kausarimpunan karan, 47  paypa sutinpitaq Jerusalenmanta qallarispa llapa nacionkunapi willasqa kanan karan runakuna juchankumanta pesapakuspa perdonasqa kanankumanta willakuy. 48  Chaykunamantan qankunaqa willankichis. 49  Noqan qankunaman apachimusaykichis Yayaypa imachus prometesqanta. Chayrayku, qankunaqa Jerusalén llaqtallapi qhepakunkichis janaq pacha atiywan junt’aykusqa kanaykichiskama”, nispa. 50  Chaymantataq paykunataqa Betania llaqtachakama pusaran, jinaspa makinta oqarispa paykunapaq Diosmanta mañapuran. 51  Chayta ruwashaspan Jesusqa paykunamanta t’aqarikuran, jinaspa janaq pachaman oqarisqa karan. 52  Paykunataq payman k’umuykuranku, jinaspa Jerusalenman ancha kusisqa kutipuranku. 53  Sapa p’unchaytaqmi templopi kasharanku Diosta jatunchaspa.

Uraypi willakuykuna

Chayqa karan domingo p’unchaymi, judío runakunapaqqa chaymi karan semana qallariy p’unchay.