Lucas 21:1-38

  • Wajcha viudaq iskay qolqecha churasqanmanta (1-4)

  • QHEPA TIEMPOPAQ SEÑALKUNAMANTA (5-36)

    • Guerrakuna, terremotokuna, millay onqoykuna, yarqaykuna (10, 11)

    • Jerusalentan soldadokuna muyuykunqa (20)

    • Nacionkunapaq señalasqa tiempo (24)

    • Runaq Churinmi jamunqa (27)

    • Higos sach’a (29-33)

    • Rijch’asqallan kashana (34-36)

  • Templopi Jesuspa yachachisqanmanta (37, 38)

21  Jesusmi qhapaq runakunata qhawasharan qolqe churanakunaman qolqenku churashaqta.  Chayllamanmi juj wajcha viudata rikuran pisi valorniyoq iskay qolqechata* chayman churaykuqta,  jinan Jesusqa niran: “Cheqaqtan niykichis: Kay viudan, wajchaña kashaspapas, llapankuq churasqanmantaqa aswan askhataraq churaykun.  Llapa churaqkunaqa puchullankumantan churanku, kay viudan ichaqa wajcha kayninpi tukuy kausananpaq kaqta churaykun”, nispa.  Chay qhepatataq wakinkuna rimasharanku temploqa sumaq rumikunawan Diosman qosqa kaqkunapiwan sumaqchasqa kasqanmanta,  jinan Jesusqa niran: “P’unchaykunan chayamunqa, chaypin kay rikusqaykichiskunaqa lliu thunisqa kanqa, manan rumi patapi juj rumillapas qhepanqachu”, nispa.  Jinan payta niranku: “Yachachikuq, ¿jayk’aqtaq chaykunari kanqa? ¿Ima señalmi kanqa chaykuna sucedenanpaqña kashaqtin?”, nispa.  Chaymi Jesusqa niran: “Cuidakuychis, paqtataq pipas pantachisunkichisman, askhan sutiywan sutichakuspa jamunqaku: ‘Noqan payqa kani’, nispa; ‘chay señalasqa tiempoqa cercapiñan kashan’, nispa. Aman paykunaq qhepantaqa rinkichischu.  Chaymantapas guerrakunamanta ch’aqwaykunamantawan uyarispaqa aman mancharikunkichischu. Chaykunaraqmi ñaupaqtaqa kanan, tukukuymi ichaqa mana kaq ratochu kanqa”, nispa. 10  Chaymantataq paykunata niran: “Juj nacionmi juj nación contra jatarinqa, juj llaqtataq juj llaqta contra jatarinqa. 11  Kallanqataqmi jatun terremotokunapas, kayneqpi chayneqpitaq kanqa yarqaykuna mast’arikuq millay onqoykuna ima; chaymantapas runakunan rikunqaku mancharikunapaq jina kaqkunata, cielomanta jatun señalkunatawan. 12  ”Manaraq chaykuna kashaqtinmi ichaqa qankunata qatikachasunkichis, jap’ispataq sinagogakunaman carcelkunaman ima apasunkichis. Chaymantapas sutiyraykun reykunaman kamachikuqkunaman ima apasqa kankichis, 13  chhaynapi paykunaman predicanaykichispaq. 14  Ichaqa aman ñaupaqmantaraqqa piensapakunkichischu imaynatachus defiendekuwaqchis chaytaqa; 15  noqan yachayta qosaykichis, yanapasaykichistaqmi imaynatachus rimanaykichispaqpas, chhaynapin contraykichispi kaqkunaqa mana ima niytapas atisunkichischu. 16  Chaymantapas tayta-mamaykichiskuna, wayqeykichiskuna, parienteykichiskuna, amigoykichiskuna imallataqmi juzganaman apasunkichis, chhaynapin wakinniykichis wañuchisqa kankichis, 17  sutiyraykutaqmi llapa runakunaq cheqnisqan kankichis. 18  Chaywanpas, manan juj chujchallaykichispas umaykichismanta chinkanqachu. 19  Allinta aguantaspan vidaykichistaqa salvankichis.* 20  ”Jerusalén llaqtata rikunkichis soldadokunawan muyuykusqa kashaqta chayqa, yachaychis ch’usaqyachisqa kanan tiempo qayllaykamusqanta. 21  Chaypacha Judeapi kaqkunaqa orqokunaman ayqechunku, Jerusalén llaqta ukhupi kaqkunapas chaymanta lloqsichunku, campokunapi kaqkunapas amaña chayman jaykuchunkuchu. 22  Chay p’unchaykunapin Diospa phiñakuynin chayamunqa, chhaynapi paypa qelqachisqan simikuna llapallan junt’akunanpaq. 23  ¡Ay chay p’unchaykunapi onqoq warmikunamanta, ñuñuq wawayoq warmikunamantapas! Chay p’unchaykunaqa sinchi ñak’ariymi kay allpapi kanqa, kay llaqtapas castigasqan kanqa. 24  Wakinmi espadawan wañuchisqa kanqaku, wakintaq llapa nacionkunaman preso apasqa kanqaku, Jerusalén llaqtapas nacionkunaq sarukachasqanmi kanqa, nacionkunapaq señalasqa tiempo junt’akunankama. 25  ”Chaymantapas intipi, killapi, ch’askakunapi iman señalkuna kanqa; kay pachapitaq nacionkuna ñak’arinqaku, manataq imanakuytapas atinqakuchu lamar-qocha phoqchirispa qaparisqanrayku. 26  Kay pachantinman imakunachus jamunanta reparaspan runakunaqa sinchita mancharikunqaku, yuyayninkuraqmi chinkanqapas; cielopi atiykunapas chhafchirisqan kanqa. 27  Chaykuna qhepatataq runaq Churinta rikunqaku atiywan sinchi lliflli kaywan phuyupi jamushaqta. 28  Chaykuna sucedeyta qallariqtinqa allinta sayaychis umaykichistapas oqariychis; kacharichisqa kanaykichismi chayamushanña”, nispa. 29  Chaymantataq Jesusqa juj ejemplota churaran: “Qhawariychis higos sach’ata, llapa wakin sach’akunatapas. 30  Raphichankunaq ch’ijchimusqanta rikuspaykichismi qankunaqa yachankichis paray tiempo cercapiña kashasqanta ¿riki? 31  Chhaynallataq chaykunaq sucedesqanta rikuspaykichispas yachaychis Diospa gobiernon qayllaykamushasqanta. 32  Cheqaqtan niykichis: Manapunin kay tiempo runakunaqa wañunqakuchu llapa chaykuna junt’akunankama. 33  Cielopas kay pachapas tukukapunqan, imachus nisqaykunan ichaqa manapuni tukukunqachu. 34  ”Qankuna kikiykichista allinta cuidakuychis amapuni jayk’aqpas sonqoykichis sinchi mijuykunawan, sinchi ujaykunawan, kay kausaypa llakipakuyninkunawan ima afanasqa kashananpaq; chaytaq chay p’unchay qonqaylla jap’isunkichisman 35  juj trampa jina. Chay p’unchayqa kay pachantinpi llapa runakunamanmi chayamunqa. 36  Rijch’ashaqlla kashaychis Diosmanta tukuy tiempo rogakuspa, chhaynapi llapa chaykuna pasananmanta salvasqa kanaykichispaq, runaq Churinpa ñaupanpi sayanaykichispaqwan”, nispa. 37  Jesusqa p’unchaymi yachachiq templopi, tutataq ripuq Olivos orqopi alojakuq. 38  Tutallamantataq llapa runakuna templota jamuqku payta uyarinankupaq.

Uraypi willakuykuna

Griego rimaypiqa “iskay leptón qolqechata” ninmi.
Chaypiqa “almaykichistaqa salvankichis” nillanmantaqmi.