Lucas 18:1-43

  • Mana sayk’uspa justiciata mañakuq viudamanta (1-8)

  • Fariseomanta, impuesto cobraqmantawan (9-14)

  • Jesusman wawakunata apamusqankumanta (15-17)

  • Qhapaq umalli runaq tapukusqanmanta (18-30)

  • Wañunanmanta Jesús wajmanta willakun (31-34)

  • Limosna mañakuq ñausa runa qhaliyachisqa kasqanmanta (35-43)

18  Chaymantataq Jesusqa juj ejemplota churaran mana sayk’uspa Diosmanta mañakushanallankupuni kasqanta yachachinanpaq, niranmi:  “Juj llaqtapin karan juj juez, payqa manan Diosta manchakuqchu, nitaq runakunatapas respetaqchu.  Chay llaqtapin kallarantaq juj viuda, paymi rillaqpuni chay juezman: ‘Ama jinachu kay, justiciata ruwapuway contraypi kaqmanta’, nispa;  chay jueztaq mana kasuqchu. Chaymantan ichaqa sonqollanpi niran: ‘Manaña Diosta manchakunichu, ni pi runatapas respetanichu chaypas,  jinatapas kay viudapaq justiciata ruwapusaq, chhaynapi amaña sapa rato jamuwashananpaq, mana chayqa jamushallanqan rogakuyninkunawan sayk’uchiwaqniy’”,* nispa.  Chaymantataq Señorqa niran: “¿Repararankichischu chay mana chanin juezpa imachus nisqanta?  Chhaynaqa, ¿manachu Diosqa tuta-p’unchay wajakuqnin ajllasqankunapaq justiciata ruwapunqa? Chaymantapas, payqa pacienciakunqan paykunapaq.  Niykichismi: Payqa mana suyachikuspan justiciata ruwapusunkichis. Ichaqa runaq Churin chayamuspa, ¿tarinqachu chhayna iñiyta kay pachapi?”, nispa.  Wakin runakunan allin runapaq qhawarikuspa jujkunata mana imapaq valeqta jina qhawariqku, paykunapaqmi Jesusqa juj ejemplota churallarantaq: 10  “Iskay runakunan temploman wicharanku Diosmanta mañakuq, jujninmi karan fariseo jujnintaq impuesto cobraq. 11  Fariseon sayaykuspa sonqollanpi khaynata mañakuran: ‘Diosníy, graciastan qoyki, manan wakin runakuna jinachu kani suwa, mana chanin, jujwan pantaq, manallataqmi kay impuesto cobraq runa jinapaschu kani. 12  Noqaqa iskay kutitan semanapi ayunani, tukuy adquirisqaymantan diezmotapas qoni’, nispa. 13  Impuesto cobraqtaq ichaqa karullapi sayaykuspa mana munaranchu cielota qhawariyllatapas, aswanpas sonqonta takakuspan niran: ‘Diosníy, khuyapayaykuway noqa juchasapa runata’, nispa. 14  Niykichismi: Chay runan wasinman uraykapuran fariseomanta aswan chaninpaq jap’isqa. Pipas jatunchakuqqa k’umuchisqan kanqa, pipas k’umuykukuqtaq jatunchasqa kanqa”, nispa. 15  Runakunan wawankuta Jesusman apamusharanku llamiykunanpaq, jinan discipulonkunaqa chayta rikuspa runakunata phiñarikuranku. 16  Jesustaq ichaqa wawakunata payman apamunankupaq khaynata niran: “Jinalla wawakunaqa noqaman jamuchunku, ama jark’aychischu, Diospa gobiernonqa paykunapaqmi. 17  Cheqaqtan niykichis: Pipas Diospa gobiernonta mana juj wawa jinachu chaskinqa chayqa, manapunin chaymanqa jaykunqachu”, nispa. 18  Umalli runakunamanta jujninmi Jesusta tapuran: “Allin yachachikuq, ¿imatan ruwanay wiñay kausayta chaskinaypaq?”, nispa. 19  Jinan Jesusqa niran: “¿Imaraykun ‘allin’ niwanki? Manan pipas allinqa kanchu, aswanpas Diosllan. 20  Qanqa yachankimá riki: ‘Aman jujwan pantankichu, aman pitapas wañuchinkichu, aman suwakunkichu, aman pitapas yanqa tumpankichu, tayta-mamaykitapas respetankin’, nisqa kamachikuykunataqa”, nispa. 21  Paytaq niran: “Chaykunataqa juch’uychaymantapachan junt’ashani”, nispa. 22  Chayta niqtinmi Jesusqa niran: “Kanraqmi juj ruwanayki: Llapa kaqniykikunata vendemuspa wajchakunaman rakimuy, chhaynapin janaq pachapi qhapaq kayniyki kanqa; jinaspa qatikamuway”, nispa. 23  Chayta uyarispan payqa sinchitapuni llakikuran qhapaqllaña kasqanrayku. 24  Jesustaq payta qhawaykuspa niran: “¡May sasapunin qolqesapakunapaqqa Diospa gobiernonman jaykuy kanqa! 25  Camelloraqmi agujaq ninrinta suskhuyta atinman juj qhapaq runa Diospa gobiernonman jaykunanmantaqa”, nispa. 26  Chayta uyariqkunataq niranku: “Chhaynaqa, ¿pillañataq salvasqari kanman?”, nispa. 27  Chaymi Jesusqa niran: “Runakunapaq mana atikuqqa atikuqmi Diospaqqa”, nispa. 28  Jinan Pedroqa niran: “Noqaykuqa imaymanaykuta saqespan qatikamushaykiku”, nispa. 29  Jesustaq paykunata niran: “Cheqaqtan niykichis: Pipas wasintapas, esposantapas, wayqenkunatapas, tayta-mamantapas, wawankunatapas Diospa gobiernonrayku saqeqqa 30  astawanraqmi kay tiempopi chaskinqa, jamuq tiempopitaq wiñay kausayta chaskinqa”, nispa. 31  Chaymantataq Jesusqa chunka iskayniyoq apostolkunata juj ladoman pusaspa niran: “Kunanqa Jerusalén llaqtamanmi wichasunchis, chaypin junt’akunqa runaq Churinmanta profetakunaq llapa qelqasqan. 32  Waj nacionmanta runakunamanmi entregasqa kanqa; paykunan burlakunqaku, millayta tratanqaku, thoqaykunqaku ima; 33  soq’aykusqanku qhepatataq wañuchinqaku, ichaqa kinsa p’unchaymantan jatarimpunqa”, nispa. 34  Paykunataq mana chaykunata entienderankuchu; paykunapaqqa pakasqan chay simikunaqa kasharan, chaymi mana chay nisqanta entienderankuchu. 35  Jericó llaqtaman Jesús qayllaykushaqtinmi juj ñausa runa ñan patapi tiyashasqa limosnata mañakuspa. 36  Askha runakuna chayninta pasashasqanta uyarispataq chay runaqa tapukuran: “¿Iman kashan?”, nispa. 37  Jinan niranku: “¡Nazaret llaqtayoq Jesusmi kayninta pasashan!”, nispa. 38  Chayta niqtinkun payqa fuerteta wajarikuran: “¡Davidpa Churin Jesús, khuyapayaykuway!”, nispa. 39  Jinan ñaupaqta rishaqkunaqa payta phiñarikuranku upallananpaq, paytaq ichaqa astawanraq wajarikuran: “¡Davidpa Churin, khuyapayaykuway!”, nispa. 40  Jinan Jesusqa sayaykuspa kamachikuran chay runata payman pusamunankupaq, payman achhuykuqtintaq Jesusqa tapuran: 41  “¿Ima ruwapunaytan munanki?”, nispa. Jinan payqa niran: “Señor, ñawiyta kichariway”, nispa. 42  Jesustaq payta niran: “Kicharikuchun ñawiyki; iñiyniykin qhaliyachisunki”, nispa. 43  Jinan chay runaqa kaq rato qhawariran, jinaspa Diosta jatunchaspa Jesusta qatikuran. Runakunapas chaykuna pasasqanta rikuspan Diosta jatuncharanku.

Uraypi willakuykuna

Chaypiqa “saqmashaspalla tukuwaqniy” nillanmantaqmi.