Lucas 17:1-37

  • Juchaman urmachiqmanta, perdonaymanta, iñiymantawan (1-6)

  • Kamachikuna imaynatachus qhawarikunankumanta (7-10)

  • Chunka lepra onqoyniyoqkuna qhaliyachisqa kasqankumanta (11-19)

  • Diospa gobiernon jamunanmanta (20-37)

    • “Diospa gobiernonqa qankuna chaupipin kashan” (21)

    • “Lotpa esposanta” yuyarina (32)

17  Chaymantataq Jesusqa discipulonkunata niran: “Juchaman urmachiqkunaqa kanqapunin. Ichaqa, ¡ay imaraqmi kanqa chay urmachiqkunamantaqa!  Aswan allinmi paypaqqa kanman molino rumita kunkanman warkuruspa lamar-qochaman wijch’uykusqa kaynin, kay juch’uykunamanta jujninta juchaman urmachinanmantaqa.  Chhaynaqa, qankuna kikiykichista allinta cuidakuychis. Wayqeykichus qan contra juchallikun chayqa, payta anyay; juchanmantachus pesapakun chayqa, perdonapuy.  Juj p’unchaypi qanchis kutitaña qan contra juchallikuspa, qanchis kutillatataq qanman kutimuspa nisunkiman: ‘Perdonaway’, nispa chayqa, perdonapunkin”, nispa.  Apostolkunan Señorta niranku: “Yanapawayku aswan iñiyniyoq kanaykupaq”, nispa.  Jinan Señorqa paykunata niran: “Iñiyniykichischus mostaza muju sayayllapas kanman chayqa, kay mora sach’atan niwaqchis: ‘T’irakuspa lamar-qochapi mallkikamuy’, nispa, jinan chay sach’aqa kasusunkichisman.  ”¿Mayqenniykichistaq kamachiykichis chajrapi yapumusqanmanta otaq uywa michimusqanmanta kutimuqtin niwaqchis: ‘Usqhaylla kayman jamuy, jinaspa mesapi mijuy’, nispa?  ¿Manachu aswanpas niwaqchis: ‘Cenanaypaq imallatapas wayk’urapuway, jinaspa mandilta churakuspa atiendeway, mijuyta ujayta tukunaykama; chaymantaña qanqa mijunkipas ujankipas’, nispa?  Kamachiqa imachus ruwanantataq ruwashan chayqa, manan patronqa ‘gracias’ ninmanchu ¿riki? 10  Chhaynaqa, qankunapas ima kamachitapas ruwaspaykichisqa ninkichismi: ‘Noqaykuqa mana valeq kamachikunallan kayku, imachus ruwanayku karan chayllatan ruwayku’”, nispa. 11  Jerusalenman rishaspan Jesusqa Samariawan Galileawan tupayninta pasasharan. 12  Juj aylluman jaykushaqtinmi payta rikururanku lepra onqoyniyoq chunka runakuna, karullapi sayaykuspataq 13  fuerteta niranku: “¡Jesús, yachachikuq, khuyapayaykuwayku!”, nispa. 14  Jesustaq paykunata rikuruspa niran: “Phaway riychis, jinaspa sacerdotekunawan qhawachikamuychis”, nispa. Rishaqtinkutaq lepra onqoyninkuqa chinkapuran. 15  Jinan jujnin runaqa lepra onqoyninmanta qhaliyapusqanta reparaspa alto kunkawan Diosta jatunchaspa kutimuran. 16  Jesuspa ñaupanpi pampakama k’umuykuspataq agradecekuran, payqa Samaria llaqtayoq runan karan. 17  Jesustaq niran: “¿Manachu chunka runakuna qhaliyachisqa karanku? Chhaynaqa, ¿maytaq wakin isqon runakunari? 18  ¿Imaraykutaq paykunari mana jujnillankupas kutimunchu Diosta jatunchaq? ¿Imaraykutaq waj nacionmanta runallari kutimun?”, nispa. 19  Jinan chay runata niran: “Sayarispa ripuy, iñiyniykin qhaliyachisunki”, nispa. 20  Juj kutinmi fariseokuna Jesusta tapuranku jayk’aqchus Diospa gobiernon jamunan karan chayta, jinan payqa niran: “Diospa gobiernonqa manan llapa runaq reparananpaq jinachu jamunqa, 21  nitaq pipas ninqachu: ‘¡Qhawariychis, kaypin kashan!’ otaq ‘¡jaqaypin kashan!’, nispaqa. Diospa gobiernonqa qankuna chaupipin kashan”, nispa. 22  Chaymantataq Jesusqa discipulonkunata niran: “Tiempon chayamunqa, chaypin qankunaqa runaq Churinpa jujnin p’unchayninta rikuyta munankichis, ichaqa manan rikunkichischu. 23  Runakunan nisunkichis: ‘¡Qhawariychis, jaqaypin kashan!’ otaq ‘¡kaypin kashan!’, nispa. Ichaqa aman creenkichischu, amataq qhepankutapas phawankichischu. 24  Imaynan llifllikiyqa cieloq juj ladonmanta cieloq juj ladonkamaraq k’ancharin, chhaynallataqmi kanqa runaq Churinpa p’unchayninpipas. 25  Ñaupaqtan ichaqa imaymanapiraq ñak’arinan, kay tiempo runakunaq pisichasqan imaraqmi kanan. 26  Imaynan Noepa p’unchayninkunapi karan, chhaynallataqmi runaq Churinpa p’unchayninkunapipas kanqa. 27  Runakunan mijusharanku, ujasharanku, qharikunapas warmikunapas casarakusharanku, Noepa arcaman jaykusqan p’unchaykama; chayllamanmi jatun para chayamuran, jinaspa llapankuta millp’upuran. 28  Chhaynallataqmi Lotpa p’unchayninkunapipas karan; runakunan mijusharanku, ujasharanku, rantisharanku, vendesharanku, tarpusharanku, wasitapas ruwasharanku. 29  Sodoma llaqtamanta Lotpa lloqsimusqan p’unchaymi ichaqa cielomanta azufreyoq nina para chayamuran, jinaspa llapankuta ch’usaqyachipuran. 30  Chhaynallataqmi kanqa runaq Churinpa rikuchikunan p’unchaypipas. 31  ”Chay p’unchaypiqa wasi patapi kashaqqa amaña uraykuchunchu kaqninkunata orqomunanpaq, jinallataq chajrapi kashaqpas amaña kutimuchunchu ima saqesqanmanpas. 32  Lotpa esposanta imachus pasasqanta yuyariychis. 33  Pipas vidanta* waqaychayta munaqqa chinkachinqan, pipas vidanta chinkachiqmi ichaqa tarinqa. 34  Niykichismi: Chay tutapin juj puñunapi iskay kashanqaku; jujninmi apasqa kanqa, jujnintaq saqerparisqa kanqa. 35  Iskay warmikunan molino rumipi kuska kutashanqaku; jujninmi apasqa kanqa, jujnintaq saqerparisqa kanqa”, nispa. 36  *—— 37  Jinan paykunaqa niranku: “Señor, ¿maypin chay kanqa?”, nispa. Jesustaq paykunata niran: “Maypichus wañusqa cuerpo kashanqa, chaypin ankakunapas juñukunqa”, nispa.

Uraypi willakuykuna

Chaypiqa “almanta” nillanmantaqmi.
Kay versiculoqa manan rijurinchu “Westcott, Hort” nisqa griego qelqakunapi, nitaq wakin allin reqsisqa qelqakunapipas.