Lucas 16:1-31

  • Mana allin mayordomomanta (1-13)

    • Pisillapipas junt’aqqa askhapipas junt’aqmi (10)

  • Kamachikuy simimanta, Diospa gobiernonmantawan (14-18)

  • Qhapaq runamanta, Lazaromantawan (19-31)

16  Chaymantataq Jesusqa discipulonkunata niran: “Juj qhapaq runamanmi willaranku: ‘Mayordomoykin kaqniykikunata ch’usaqyachipushan’, nispa.  Jinan payqa mayordomonta wajachimuspa niran: ‘Qanmantan mana allin rimayta uyarishani. Mayordomo kayniykimanta llapanta cuentata qoway, qanqa manañan wasiypi kaqniykunata qhawankiñachu’, nispa.  Jinan mayordomoqa sonqonpi niran: ‘Kunanri, ¿imatataq ruwasaq patronniy mayordomo kayniymanta wijch’upuwaqtinri? Manamá riki kallpaypas kanñachu chajrapi llank’anallaypaqpas, p’enqaymá limosna mañapakuypas.  ¡Ah! Yachaniña imachus ruwanayta, chhaynapi mayordomo kayniymanta wijch’usqa kaqtiy pillapas wasinpi chaskiwananpaq’, nispa.  Jinan payqa patronninman manu kaqkunata sapankata wajaran. Jujnintan niran: ‘¿Jayk’an patronniyman manu kashanki?’, nispa.  Jinan manukuqqa niran: ‘Pachaj barril* oliva aceiten manu kashani’, nispa. Mayordomotaq payta niran: ‘Manukusqaykimanta kay qelqata jap’iy, jinaspa tiyaykuspa usqhaylla pisqa chunka barril-llataña qelqay’, nispa.  Jujnin manukuqtan nillarantaq: ‘Qanri, ¿jayk’ataq manu kashanki?’, nispa. Jinan chay manukuqqa niran: ‘Pachaj carga* trigon manu kashani’, nispa. Jinan mayordomoqa paytapas niran: ‘Manukusqaykimanta kay qelqata jap’iy, jinaspa pusaq chunkallataña qelqay’, nispa.  Patrontaq chay mana allin mayordomoq imachus ruwasqanmanta admirakuran yachaywan* ruwasqanrayku. Kay pacha runakunaqa k’anchaypi puriq runakunamantaqa aswan yachaysapan kanku jujkunapaq imatapas ruwaspankuqa.  ”Qankunatan nillaykichistaq: Mana allin* qhapaq kaykunawan amigokunata ruwaychis, chhaynapin paykuna wiñay tiyana cheqaskunapi chaskisunkichis chay qhapaq kaykuna tukukapuqtin. 10  Pisillapi junt’aq runaqa askhapipas junt’aqllataqmi, pisillapi mana allinta imatapas ruwaqqa askhapipas mana allintan imatapas ruwanqa. 11  Chayrayku, manachus junt’aq kankichis mana allin qhapaq kaykunawan chayqa, ¿piñataq confiasunkichisman cheqaq qhapaq kaykunatari? 12  Manachus jujkunaq kaqninwanpas junt’aq kankichis chayqa, ¿pitaq imallatapas qosunkichisman? 13  Manan pi kamachipas iskay patrontaqa serviyta atinmanchu, mana chayqa, jujnintan cheqnikunman jujnintataq munakunman, jujninmanmi k’askakunman jujnintataq pisichanman. Manan atiwaqchischu Diostawan qhapaq kaykunatawan serviytaqa”, nispa. 14  Qolqe sonqo fariseokunan llapa chaykuna nisqanta uyarisharanku, chaymi Jesusta asipayaspa millayta qhawaykuranku. 15  Jinan Jesusqa paykunata niran: “Qankunaqa runakunaq qhawarinanpaqmi Dios sonqo runaman tukunkichis, Diosmi ichaqa sonqoykichista reqsin. Runakuna ukhupi imapas allinpaq jap’isqa kaqqa millakunapaqmi Diospaqqa. 16  Kamachikuy simipas profetakunaq qelqasqanpas Juankamallan karan. Chaymantapachan ichaqa Diospa gobiernonmanta allin willakuykuna willasqa kashan, imaymana clase runakunataq chayman jaykunankupaq tukuy atisqankuta ruwashanku. 17  Cielopas kay pachapas tukukapunmanraqmi, kamachikuy simimantan ichaqa manapuni juj letraq imachallanpas chinkanmanchu manachus junt’akunqa chayqa. 18  ”Pipas esposanmanta t’aqakuspa* jujwan casarakunman chayqa, pantay juchamanmi urmashanman. Pipas qosanmanta t’aqanasqa warmiwan casarakuqpas pantay juchamanmi urmashallanmantaq. 19  ”Juj runan karan qhapaqllaña, payqa pukaniraq azul p’achawan, lino p’achawan imallan p’achakuq, sapa p’unchaytaq imaymana kaqninkunawan kusirikuq. 20  Paypa punkunmanmi churaqku “lleq” nishaq k’irikunayoq limosna mañapakuq runata, chay runaq sutinmi karan Lázaro. 21  Payqa qhapaqpa mesanmanta ususqakunataraqmi mijuyta munaq, alqokunapas jamuspan k’irinkunata llaqwaqku. 22  Tiempowantaq chay runaqa wañukapuran, jinan angelkuna Abrahanpa ladonman* apapuranku. ”Qhapaq runapas wañukapullarantaqmi, jinan paytaqa p’ampapuranku. 23  Sepulturapi* ñak’arishaspan payqa wichayta qhawarispa karupi rikuran Abrahanta, Lazarotaq ladonpi* kasharan. 24  Jinan payqa wajarikuran: ‘Taytáy Abrahán, khuyapayawaspayki Lazarota kachamuway dedo puntallantapas unuman challpuykuspa qalluyta thasnuykachinanpaq, maytapunin ñak’arishani kay nina rauraypi’, nispa. 25  Abrahantaq ichaqa payta niran: ‘Wawáy, ¿manachu yuyarinki kausashaspa imaymana allin kaqkunawan kusirikusqaykita? Lazaron ichaqa khuyayta ñak’ariran. Chaymi payqa kusisqa kaypi kashan, qantaq ñak’arishanki. 26  Jinaspapas sinchi jatun ukhu wayq’on noqaykutaqa qankunamanta t’aqawashanku, chayrayku pipas kaymanta qankunaman jamuyta munaqqa manan atinmanchu, nitaq qankunapas chimpamuyta atiwaqchischu’, nispa. 27  Chay runataq niran: ‘Chhaynaqa, taytáy, papaypa wasinmanyá Lazarota kacharapuway, 28  chaypin pisqa wayqeykunaraq kashan, paykunaman willaykampuwachun lliu imaymanakunata, chhaynapi kay ñak’ariyman mana chayamunankupaq’, nispa. 29  Jinan Abrahanqa niran: ‘Moisespas profetakunapas paykunawantáq kashanqá, paykunatayá uyarichunku’, nispa. 30  Paytaq niran: ‘Taytáy Abrahán, manan uyarinkumanchu, pipas wañusqanmanta kausarispa paykunaman rillaqtinmi juchankumantaqa pesapakunqaku’, nispa. 31  Abrahantaq payta niran: ‘Manachus Moisestapas ni profetakunatapas uyarinqakuchu chayqa, wañusqamantaña jujnin kausarispa paykunaman riqtinpas manayá uyarikunqakuchu’”, nispa.

Uraypi willakuykuna

Griego rimaypiqa “100 bato medida” ninmi. Sapanka medidamanmi jaykuq 22 litro.
Griego rimaypiqa “100 coro medida” ninmi. Sapanka medidamanmi jaykuq 220 litro.
Chaypiqa “yachaysapa kaywan” otaq “allin yuyaywan” nillanmantaqmi.
Chaypiqa “mana chanin” nillanmantaqmi.
Griego rimaypiqa leykunaq nisqanman jina jujpaqkama t’aqanakuymantan rimashan.
Griego rimaypiqa “Abrahanpa qhasqonman” ninmi.
Griego rimaypiqa “Hadespi” ninmi.
Griego rimaypiqa “qhasqonpi” ninmi.