Lucas 14:1-35

  • Punkillisqa runa sábado p’unchaypi qhaliyachisqa kasqanmanta (1-6)

  • Invitasqa kaspa k’umuykukuq kanamanta (7-11)

  • Wajchakunata invitanamanta (12-14)

  • Invitasqakuna mana jamuy munasqankumanta (15-24)

  • Discípulo kanapaq imakuna ruwanamanta (25-33)

  • Q’aymayapuq kachimanta (34, 35)

14  Juj kutinmi Jesusqa sábado p’unchaypi fariseokunamanta juj umalli runaq wasinman jaykuran mijunanpaq, wasipi kaqkunataq mana chinkachispa payta qhawasharanku.  Juj punkillisqa runataq paypa ñaupanpi kasharan.  Jinan Jesusqa kamachikuy simita allin yachaqkunata fariseokunatawan tapuran: “¿Allinchu kanman sábado p’unchaypi pitapas qhaliyachiy icha manachu?”, nispa.  Paykunataq ch’inlla karanku. Jinan payqa onqosqa runata llamiykuspa qhaliyachiran, jinaspa kachapuran.  Chaymantan Jesusqa paykunata tapullarantaq: “¿Mayqenniykichistaq sábado p’unchaypi wawaykichis otaq toroykichispas pozoman urmaykuqtin mana kaq ratochu orqowaqchis?”, nispa.  Paykunataq mana ima nirankupaschu.  Invitasqa runakuna ñaupaq tiyanakunata ajllakusqankuta rikuspataq Jesusqa llapankuman juj ejemplota willaran:  “Pipas casarakuy fiestaman invitasunki chayqa, ama ñaupaq kaq tiyanapiqa tiyankichu, paqtapas invitaqniyki qanmanta aswan allinpaq jap’isqa runata invitallanmantaq karan,  jinaspa nisunkiman: ‘Kay runaman qoy chay tiyanata’, nispa; qantaq p’enqasqa riwaq qhepa tiyanaman. 10  Aswanpas pipas invitasunki chayqa, qhepa tiyanapi tiyaykuy, chhaynapin invitaqniyki runa jamuspa nisunki: ‘Amigolláy, kay ñaupaqman jamuy’, nispa. Chhaynapitaq llapa invitasqakunaq ñaupanpi allin qhawarisqa kanki. 11  Pipas jatunchakuqqa k’umuchisqan kanqa, pipas k’umuykukuqtaq jatunchasqa kanqa”, nispa. 12  Chaykunata nispan invitaqnintapas Jesusqa nillarantaq: “Almuerzotapas cenatapas wayk’uchispaqa aman wajankichu amigoykikunata, wayqeykikunata, parienteykikunata, ni qhapaq llaqtamasiykikunatapas; yaqapaschá paykunaqa jayk’aqllapas wajarisunkikuman, chhaynapitaq invitasqaykimanta pagapushasunkikuman. 13  Aswanpas jatun mijuyta wayk’uchispaqa invitamuy wajchakunata, ñuk’ukunata, such’ukunata, wist’ukunata, ñausakunatawan, 14  paykunaqa manan imankuwanpas pagapuyta atisunkikumanchu, chaymi kusisqa kanki. Chay ruwasqaykimantaqa allin runakunaq kausarimpunan tiempopiñan pagasqa kanki”, nispa. 15  Chaykunata uyarispan jujnin invitasqa runa payta niran: “Kusisqa kachun Diospa gobiernonpi mijuq* runaqa”, nispa. 16  Jinan Jesusqa payta niran: “Juj runan jatun cenata wayk’uchiran askha invitasqan runakunapaq. 17  Cenay horastataq invitasqan runakunaman kamachinta kacharan: ‘Jamuychis, ñan tukuy imapas listoña kashan’, nispa nimunanpaq. 18  Invitasqakunan ichaqa sapankanku ‘manan jamuyta atiymanchu’ niranku. Jujninmi niran: ‘Chajratan rantirukuni, chayta qhawaqmi rinay kashan; manan jamuyta atiruymanchu’, nispa. 19  Jujnintaq niran: ‘Pisqa masa torokunatan rantirukuni, chaykunaq imayna llank’asqanta qhawaqmi rinay kashan; manan jamuyta atiruymanchu’, nispa. 20  Juj kaqtaq niran: ‘Kunallanmi casararukuni, chaymi mana jamuyta atiymanchu’, nispa. 21  Jinan kamachiqa patronninman kutimuspa llapa chaykunata willaran. Chaywanmi patronqa sinchita phiñakuran, jinaspa kamachinta niran: ‘Usqhaylla riy llaqtapi jatun callekunata juch’uy callekunatawan, jinaspa pusamuy wajchakunata, ñuk’ukunata, such’ukunata, ñausakunata, wist’ukunatawan’, nispa. 22  Jinan kamachiqa patronninpa nisqanman jina ruwaran, kutimuspataq niran: ‘Patrón, kamachiwasqaykiman jinan ruwaramuni, chaywanpas kashanraqmi campoqa’, nispa. 23  Chaymi patronqa kamachinta niran: ‘Riy jatun ñankunata, k’ijllu ñankunatawan, jinaspa llapa tarisqayki runakunata pusamunkipuni, chhaynapi wasiy junt’a kananpaq. 24  Noqan qankunata niykichis: Chay invitasqa runakunamantaqa manapunin mayqenpas wayk’uchisqay cenataqa malliykullanqapaschu’”, nispa. 25  Ancha askha runakunan Jesuswan risharanku, Jesustaq paykunaman kutirispa niran: 26  “Pipas noqaman jamuqqa cheqnikunanmi* taytanta, mamanta, esposanta, wawankunata, wayqenkunata, panankunata, pay kikintawanpas,* mana chayqa manan atinmanchu discipuloy kayta. 27  Pipas discipuloy kayta munaqqa, ñak’arina k’aspinta apariykuspa qhepayta jamuchun, mana chayqa manan atinmanchu discipuloy kayta. 28  Pipas juj torreta sayarichiyta munaqqa, ¿manachu tiyaykuspa ñaupaqtaraq qolqenta tanteakun torreta tukunanpaq aypanqachus manachus chayta? 29  Mana chayqa, cimientota churaykuspallapaschá sayarapunman, manataq tukuyta atinmanchu, llapa chayta rikuqkunataq payta asipayankuman: 30  ‘Kay runaqa torre perqaytan qallarin, manataq tukuyta atinchu’, nispa. 31  Juj reypas juj reywan guerraman rinan kashaqtinqa, ¿manachu ñaupaqtaraq tiyaykuspa yuyaychaqninkunata tapurikun atinmanchus chunka waranqa soldadokunallawan iskay chunka waranqa soldadokuna atipayta icha manachus chayta? 32  Manachus atinman chayqa, contranpi jamuq rey karupiraq kashaqtinmi payqa juj comisionta kachanman allipunakapunankupaq. 33  Chayraykun niykichis: Mayqenniykichispas kaqninkunata mana saqeqqa manan atinmanchu discipuloy kaytaqa. 34  ”Kachiqa ancha allinpunin; kachitaqchus q’aymayapunman chayqa, ¿imaynatan wajmanta kachiman tukunman? 35  Manan valenmanñachu ni allpapaqpas ni wanupaqpas, aswanpas jawaman jich’anallapaqñan. Uyarinanpaq ninriyoqqa uyarichun”, nispa.

Uraypi willakuykuna

Griego rimaypiqa “t’anta mijuq” ninmi.
Chayqa “noqamanta aswan pisitan munakunan” ninantan nin.
Chaypiqa “almantawanpas” nillanmantaqmi.