Lucas 10:1-42

  • 70 discipulokunata Jesuspa kachasqanmanta (1-12)

  • Juchankuta mana saqepuq llaqtakunawan imachus pasananmanta (13-16)

  • 70 discipulokuna kutimpusqankumanta (17-20)

  • Jesús Yayanta jatunchan llamp’u sonqokunata allinpaq qhawarisqanmanta (21-24)

  • Runamasin munakuq Samaria llaqtayoq runamanta (25-37)

  • Martata Mariatawan Jesuspa watukusqanmanta (38-42)

10  Chaykuna qhepamantaq Señorqa discipulonkuna ukhumanta qanchis chunkatawan ajllaspa iskay-iskaymanta ñaupachiran lliu maymanchus rinan karan chay llaqtakunaman ayllukunamanwan.  Paykunatan niran: “Cosechanaqa askhapunin kashan, llank’aqkunan ichaqa pisilla kanku, chayrayku cosecha oqarichiq dueñota rogakuychis cosechanman llank’aqkunata kachamunanpaq.  Riychis, noqan qankunata atoqkuna* chaupipi ovejakunata jina kachashaykichis.  Aman apankichischu qolqeta, ni qoqawatapas, ni usut’atapas; amallataq pitapas ñanpiqa napaykunkichischu.*  Maypipas juj wasiman jaykuspaykichisqa ñaupaqtan ninkichis: ‘Thaj kay kachun kay wasipaq’, nispa.  Sichus chay wasipi mana kanqachu thaj kayta munakuq runa chayqa, thaj kayniykichismi qankunaman kutimpusunkichis, thaj kayta munakuq runa kaqtintaq thaj kayniykichis paywan qhepakunqa.  Chay wasipin qhepakunkichis imachus qosqasuykichista mijuspa ujaspa ima, llank’aqqa chaskinanpunin pagontaqa. Aman juj-juj wasikunapiqa alojakunkichischu.  ”May llaqtamanpas jaykusqaykichispi chaskisunkichis chayqa, imatachus jaywarisqasuykichistan mijunkichis.  Chaymantapas chay llaqtapi onqosqakunatan qhaliyachinkichis, ninkichistaq: ‘Diospa gobiernonmi qankunaman qayllaykamunña’, nispa. 10  Ichaqa may jaykusqaykichis llaqtapipas mana chaskisunkichischu chayqa, llaqtankupi jatun callekunaman lloqsispan ninkichis: 11  ‘Llaqtaykichis polvo chakiykuman k’askakuqtawanpas qankuna contran chhafchirpariyku; ichaqa yachaychis, Diospa gobiernonmi qayllaykamunña’, nispa. 12  Niykichismi: Juicio p’unchaypiqa* chay llaqtan aswan castigasqa kanqa Sodoma llaqtamantaqa. 13  ”¡Ay qanmanta, Corazín llaqta! ¡Ay qanmanta, Betsaida llaqta! Qankunapi jinachus Tiro llaqtapi, Sidón llaqtapipas milagrokunata ruwakunman karan chayqa, mayñachá juchankumanta pesapakunkuman karan qhasqa telawan churakuspa usphapi tiyaykuspa ima. 14  Chayraykun Juicio p’unchaypiqa qankuna aswan castigasqa kankichis Tiro, Sidón llaqtakunamantaqa. 15  Qanri, Capernaum llaqta, ¿janaq pachakamachu oqarisqa kanki? ¡Manapunin! Aswanpas Sepulturamanmi* uraykunki. 16  ”Pipas qankunata uyariqqa noqatawanmi uyariwan, pipas qankunata mana uyariyta munaqmi ichaqa noqatapas mana uyariwashanchu. Pipas noqata mana uyariyta munaqtaq kachamuwaqniytapas mana uyarishanchu”, nispa. 17  Jesuspa qanchis chunka discipulonkunan kusisqa kutimuspa niranku: “Señor, sutiykipi kamachiqtiykuqa supaykunaraqmi kasukuwanku”, nispa. 18  Chayta niqtinkun Jesusqa paykunata niran: “Noqaqa Satanastan rikusharaniña urmaykamushaqta, imaynan rayopas cielomanta urmaykamun jinataraq. 19  Noqan qankunaman atiyta qoykichis mach’aqwaykunata, alacrán kurukunata, enemigoq lliu atiynintawan sarukachanaykichispaq, manan ni imapas imanasunkichispaschu. 20  Ichaqa ama espiritukunaq kasukusqasuykichisraykuchu kusikuychis, aswanpas kusikuychis sutiykichis janaq pachapi qelqasqa kasqanrayku”, nispa. 21  Chay raton Jesusqa santo espirituq junt’aykusqan kaspa ancha kusikuywan niran: “Yayáy, janaq pachaq kay pachaq Señornin, llapa runakunaq ñaupanpin jatunchayki, qanmi allintapuni kaykunata pakaranki yachayniyoq, allin umayoq runakunamanta, jinaspa wawa jina kaqkunaman entiendechiranki. Arí, Yayáy, chhayna ruwayqa munasqaykiman jinan karan”, nispa. 22  Jesusqa nillarantaqmi: “Yayayqa tukuy imaymanatan noqaman qowan; manan pipas yachanchu pichus Churi kasqantaqa, aswanpas Yayallan; manallataqmi pipas yachanchu pichus Yaya kasqantaqa, aswanpas Churillan, pimanchus Churi reqsichiyta munan chayllapiwanmi yachan”, nispa. 23  Discipulonkunaman kutirispataq Jesusqa sapaqllapi paykunata niran: “Kusisqa kachunku rikusqaykichista rikuq ñawikunaqa. 24  Cheqaqtan niykichis: Askha profetakuna reykuna iman imakunachus rikusqaykichista rikuyta munaranku, ichaqa manan rikurankuchu; imakunachus uyarisqaykichistapas uyariytan munaranku, ichaqa manallataqmi uyarirankuchu”, nispa. 25  Chayllamanmi kamachikuy simita allinta yachaq runa sayarispa Jesusta pruebaman churananpaq niran: “Yachachikuq, ¿imatan ruwanay wiñay kausayta chaskinaypaq?”, nispa. 26  Jinan Jesusqa payta tapuran: “¿Iman kamachikuy simipi qelqasqa kashan? ¿Imatan entienderanki?”, nispa. 27  Chay runataq kutichiran: “‘Jehová Diosniykitan munakunki tukuy sonqoykiwan, tukuy almaykiwan,* tukuy kallpaykiwan, tukuy yuyayniykipiwan’, ‘runamasiykitapas qan kikiykita jinan munakunki’ ninmi”, nispa. 28  Jesustaq niran: “Allintan ninki; chayta ruwamushallay, jinan wiñay kausayta chaskinki”, nispa. 29  Paytaq ichaqa allin runapaq qhawarichikuyta munaspa Jesusta tapuran: “¿Pipunitaq runamasiyri?”, nispa. 30  Jinan Jesusqa niran: “Juj runan Jerusalenmanta Jericó llaqtaman uraykamusharan, jinan paytaqa suwakuna jap’ispa lliuta ch’utipuranku, maqaykuranku ima, wañunayashaqta wijch’uspataq pasapuranku. 31  Chayllamanmi juj sacerdote chay ñanninta uraykamusharan, chay runata rikuspataq chimpallanta pasaran. 32  Chhaynallataqmi juj Leví runapas chayman chayamuspa chimpallanta pasallarantaq. 33  Chaynintan rishallarantaq Samaria llaqtayoq runapas, paymi ichaqa chay runata rikuspa mayta khuyapayaykuran. 34  Payman achhuykuspataq aceitewan vinowan ima k’irinkunata jampispa wataykuran. Jinaspan asnonman churaykuspa alojakuna wasiman aparan, chaypin paytaqa cuidaran. 35  Qhepantin p’unchaytaq iskay denario* qolqeta alojakuna wasipi dueñoman qoran, jinaspa niran: ‘Payta qhawariykapuwanki. Astawan gastanki chayqa, kutimuspayña pagapusayki’, nispa. 36  Chay kinsantinkumanta, ¿mayqentaq karan suwakunaq jap’isqan runaq runamasinri?”, nispa. 37  Jinan payqa niran: “Payta khuyapayaykuqmi”, nispa. Chaymi Jesusqa niran: “Phaway qanpas chhaynallatataq ruwamuy”, nispa. 38  Chaymanta rishaspankun paykunaqa juj aylluman jaykuranku. Chaypin Marta sutiyoq warmiqa wasinpi sumaqta Jesusta chaskiran. 39  Paypan karan juj ñañan María sutiyoq, paymi Señorpa ñaupanpi tiyaykuspa yachachisqankunata uyarisharan. 40  Martataq ichaqa imaymana ruwaykunapi afanasqa kasharan. Jinan payqa Jesusman achhuykuspa niran: “Señor, ñañaymi sapallayta saqerparimuwan imaymana ruwanakunantinta, ¿manachu chay imapas qokusunki? Niykapuwayyá yanapawananpaq”, nispa. 41  Señortaq payta niran: “Marta, Marta, imaymanakunawanmi nishu afanasqa kashanki. 42  Manan imaymanakunatachu necesitakun, aswanpas pisillatan otaq jujllata. Mariaqa aswan allin kaqtan ajllakun, manataqmi pipas chaytaqa qechunqachu”, nispa.

Uraypi willakuykuna

Griego rimaypiqa “lobokuna” ninmi.
Chaypiqa “amallataq pitapas ñanpiqa abrazaykuspa napaykunkichischu” nillanmantaqmi.
Qhaway “explicasqa simikuna” nisqapi “juicio p’unchay” nisqata.
Griego rimaypiqa “Hadesmanmi” ninmi.
Qhaway “explicasqa simikuna” nisqapi “alma” nisqata.
Juj denario qolqeqa karan juj p’unchay llank’asqamanta pagon.