Judas 1:1-25

  • Napaykuy (1, 2)

  • Pantasqata yachachiqkuna juzgasqa kanankumanta (3-16)

    • Miguelpa Saqrawan churanakusqan (9)

    • Enocpa profetizasqanmanta (14, 15)

  • Diospa munakuynillanpi kashanamanta (17-23)

  • Diospaq kachun jatunchayqa (24, 25)

 Jesucristoq kamachin Santiagoq wayqen* noqa Judasmi qelqamushaykichis qankuna Dios Yayanchispa munakusqan wajasqakunaman, arí, qankuna Jesucristopaq waqaychasqa kaqkunaman:  Diospa khuyapayakuynin, thaj kaynin, munakuyninpas qankunapi astawanraq yapakuchun.  Munasqa wayqe-panaykuna, maytapunin kallpachakusharani imaynatachus Dios salvawasunchis chaymanta qelqamunaypaq. Ichaqa obligasqan rikukuni iñiyniykichisrayku anchatapuni kallpachakunaykichismanta qelqamunaypaq, chay iñiyqa juj kutillan ch’uya runakunaman wiñaypaq qosqa karan.  Diospa simin qelqan ñaupaqmantaña willaran wakin runakuna juzgasqa kanankumanta, chay runakunan mana reparaylla qankuna ukhuman jaykumushanku; chay runakunaqa manan manchakunkuchu Diosta, aswanmi paykunaqa Diospa khuyapayakuyninta q’ewispa mana p’enqarikuspa juchallapi purishanku, chhaynapin sapallan dueñonchis Señor Jesucristotapas neganku.  Imakunatachus nimusaykichis chaykunata allintaña yachankichis chaypas, yuyarichiytan munaykichis. Jehová Diosmi Egipto llaqtamanta askha runakunata orqomuran, mana iñiq runakunatan ichaqa qhepaman ch’usaqyachipuran.  Maypichus kanankuta, jinallataq maypichus tiyanankuta saqepuq angelkunatapas laqhayaq ukhupin wiñaypaq wataran, chhaynapi jatun p’unchaypi juzgasqa kanankupaq.  Chay angelkuna jinan Sodoma Gomorra llaqtakuna, muyuriqninpi kaq llaqtakunapas sinchi qhelli jucha* ruwayman qokuranku, aychankuq munasqanman jinan paykunaqa millay mana ruwana kaqkunatawanraq ruwaranku. Chay llaqtakunapas ch’usaqyachisqan karanku, arí, paykunaqa ninawanmi wiñaypaq ch’usaqyachisqa karanku, chhaynapi chaykunata yachaspa ama paykuna jinachu kananchispaq.  Chaykunata yachashaspapas pantasqa yuyaynillankupin musphashanku chay runakunaqa. Paykunaqa aychata qhellichaspan purinku, autoridadtapas* pisichankun, Diospa jatunchasqan runakunamantapas millaytan rimanku.  Arcángel* Miguelmi ichaqa Moisespa cuerponmanta Saqrawan churanakushaspa mana juchacharanchu, nitaqmi millay simikunawanchu imatapas niran, aswanmi niran: “Jehová Diosmi anyasunki”, nispa. 10  Chay runakunan ichaqa imachus mana entiendesqankumantapas millayta rimanku. Paykunaqa animalkuna jina mana yuyayniyoqkunan kanku, animalkuna jinallataqmi imatapas entiendenku, chayman jina imatapas ruwaspataq qhellichakushanku. 11  ¡Ay imaraqmi paykunamanta kanqa! Paykunaqa Cainpa ñanninmanmi jaykupunku, pagota chaskinankuraykun usqhaylla Balaampa pantasqa ñanninmanpas jaykupunku, Coré jinataqmi rimapakushankupas, chaymi pay jina chinkachisqa kanqaku. 12  Paykunaqa wayqe-panantin mijusqaykichispin qankunawan kusirikushanku, ichaqa unu ukhupi rumikuna jinan kanku. Chaymantapas mana manchakuspa paykuna kikinkuta michikuqkuna; kayman jaqayman wayraq apakachasqan mana unuyoq phuyukuna; tiemponpi mana ruruq, iskay kutita wañuq,* saphinmanta t’irasqa sach’akuna iman paykunaqa kanku. 13  Phiñasqa lamar-qochaq phoqchiriynin jinan paykunaqa p’enqay ruwasqankutapas phosoqota jinaraq aqtumushanku, kayman jaqayman phawakachaq ch’askakunan kankupas, chaymi paykunaqa sinchi laqhayaqman wiñaypaq wijch’uykusqa kanqaku. 14  Paykunamantan Adanpa qanchis kaq miraynin Enocpas ñaupaqmantaraq niran: “Jehová Diosmi sinchi askha ch’uya angelninkunawan jamuran 15  llapa runakunata juzgananpaq, payta mana manchakuqkunata castigananpaqwan. Diosqa chayta ruwanqa sinchi millay kaqkunata ruwasqankurayku, pay contra millayta rimaq juchasapakuna kasqankurayku iman”, nispa. 16  Chay runakunaqa rimapakuqkunan kanku, quejakushallankun vidankumantapas, imachus munasqallankutan ruwankupas, sinchi alabakuqmi kankupas, imatapas chaskinankuraykullataqmi jujkunatapas alabanku. 17  Qankuna ichaqa, munasqa wayqe-panaykuna, yuyariychis ñaupaqmantapacha Señorninchis Jesucristoq apostolninkuna imachus nisqasuykichista, 18  paykunan niq kasunkichis: “Tukukuy tiempopiqa burlakuq runakunan rijurimunqaku, paykunan Diosta mana manchakuspa munasqankuman jina imatapas ruwanqaku”, nispa ¿riki? 19  Paykunaqa t’aqanachiqkunan kanku, animalkuna jinan imatapas ruwanku, manan Diospa espiritunwanpas pusachikunkuchu. 20  Qankuna ichaqa, munasqa wayqe-panaykuna, ch’uyay-ch’uya iñiyniykichispi wiñaychis, santo espirituq yanapayninwantaq Diosmantapas mañakuychis, 21  chhaynapi paypa munakuynillanpi kashanaykichispaq; chaymantapas Señorninchis Jesucristoq wiñay kausayman apaq khuyapayakuyninta suyakushallaychis. 22  Jinaspapas khuyapayashallaychis iskayaqkunata, 23  paykunata salvaychis ninamanta orqorparispaykichis. Ichaqa jujkunatapas khuyapayashallaychis kikiykichista cuidakuspaykichis, aychankuq qhellichasqan p’achatapas cheqnikuspaykichis. 24  Diosqa atiyniyoqmi urmanaykichismanta cuidanasuykichispaq, lliflli kayninpa ñaupanpi ancha kusisqata mana k’iñasqata sayachinasuykichispaqpas. 25  Pay sapallanmi salvawaqninchisqa,* chayrayku Señorninchis Jesucristowan paypaq kachun qhapaq kaypas, jatunchaypas, atiypas, kamachikuq kaypas, wiñay-wiñaymanta, kunanpas, wiñay-wiñaypaqpas. Amén.

Uraypi willakuykuna

Griego rimaypiqa “Jacoboq wayqen” ninmi.
Qhaway “explicasqa simikuna” nisqapi “qhelli jucha” nisqata.
Chaypiqa rimashan Diosmanta, paypa churasqan umalliqkunamantawanmi.
Qhaway “explicasqa simikuna” nisqapi “arcángel” nisqata.
Chaypiqa “jujpaqkama wañuq” nillanmantaqmi.
Chaypiqa “Diosmi Jesucristowan salvawanchis” nillanmantaqmi.