Juan 9:1-41

  • Ñausapuni naceq runata Jesuspa qhaliyachisqanmanta (1-12)

  • Qhaliyachisqa runata fariseokuna tapusqankumanta (13-34)

  • Fariseokuna ñausa kasqankumanta (35-41)

9  Chayninta purishaspan Jesusqa rikuran ñausapuni naceq runata.  Jinan discipulonkunaqa tapuranku: “Yachachikuq, ¿pitaq juchallikuran kay runa ñausa nacenanpaqri? ¿Paychu icha tayta-mamanchu?”, nispa.  Jinan Jesusqa niran: “Manan kay runachu ni tayta-mamanpaschu juchallikun, aswanmi kayqa kashan Diospa ruwayninkuna paywan rikuchisqa kananpaq.  P’unchayraq kashaqtinmi kachamuwaqniypa qowasqan llank’anataqa ruwashananchis, tutayaqtinqa manañan pipas llank’ayta atinqachu.  Kay pachallapiraq kashaspayqa kay pachapaqmi k’anchay kani”, nispa.  Chaykunata nispataq pampaman thoqaspa t’uruta ruwaran, chaywantaq chay runaq ñawinta llunch’iran,  jinaspa niran: “Phaway Siloam estanquepi maqchirakamuy”, nispa (“Siloam” simiqa “phawamuq unu” ninantan nin). Jinan payqa rispa maqchikamuran, jinaspa ñawin kichasqa kutimpuran.  Payta rikuspan llaqtamasinkunaqa mañapakushaqta rikuq runakunapiwan niranku: “¿Manachu kayqa kashan limosna mañapakuq runa?”, nispa.  Wakinmi nisharanku: “Paymi”, nispa. Wakintaq nisharanku: “Paymanña rijch’akun chaypas, manan paychu”, nispa. Jinan payqa niq: “Noqan kani”, nispa. 10  Chaymi paykunaqa tapuranku: “¿Imaynapitaq ñawiykiri kicharukun?”, nispa. 11  Jinan payqa niran: “‘Jesús’ sutiyoq runan t’uruta ruwaruspa chaywan ñawiyta llunch’iruwan, jinaspa niwan: ‘Phaway Siloampi maqchirakamuy’, nispa. Chaymi noqaqa rispa maqchikamurani, jinan ñawiyqa kicharirukun”, nispa. 12  Jinaqtinmi niranku: “¿Maytaq chay runari?”, nispa. Paytaq niran: “Manan yachanichu”, nispa. 13  Jinan chay runataqa fariseokunaman pusaranku. 14  Sábado p’unchaypin Jesusqa t’uruta ruwaspa chay runaq ñawinta kicharan. 15  Fariseokunapas tapullarankutaqmi imaynapichus ñawin kicharikuran chayta, jinan payqa paykunata niran: “T’uruwanmi ñawiyta llunch’iruwan, maqchikamuqtiytaqmi ñawiyqa kicharakapun”, nispa. 16  Jinan wakin fariseokunaqa niranku: “Chay runaqa manan Diosmantachu kanman. Diosmanta kanman chayqa, waqaychanmanchá sábado p’unchayta”, nispa. Wakintaq niranku: “¿Imaynapitaq juj juchasapa runari milagrokunata ruwanman?”, nispa. Chhaynapin paykunaqa yuyayninkupi t’aqanasqa kasharanku. 17  Chaymi chay runata tapullarankutaq: “Ñawiykitataq kicharin chayqa, ¿ima ninkitaq qanri paymanta?”, nispa. Jinan chay runaqa niran: “Payqa profetapunin kanman”, nispa. 18  Judiokunaqa manan creesharankuchu ñausapunichus karan chayta, ni ñawin kicharisqa kasqantapas, chaymi tayta-mamanta wajachimuranku. 19  Jinaspa tapuranku: “¿Wawaykichischu kay runa? ¿Ñausachu pay naceran? ¿Imaynapitaq kunanri ñawin kichasqa kashan?”, nispa. 20  Jinan tayta-mamanqa niranku: “Arí, payqa wawaykun, ñausapunitaqmi naceranpas. 21  Ichaqa manan yachaykuchu imaynapichus ñawin kicharikuran chaytaqa, ni pitaqchus kicharan chaytapas. Paytayá tapuychis. Payqa machuñan, paymi chaytaqa willanasuykichis”, nispa. 22  Judío umallikunata manchakusqankuraykun tayta-mamanqa chhaynata niranku, chay judiokunaqa ñan rimanakusqakuña pipas Jesusta “Cristo” niqqa sinagogamanta* qarqosqa kananpaq. 23  Chaymi chay runaq tayta-mamanqa niranku: “Payqa machuñan, paytayá tapuychis”, nispa. 24  Jinaqtinmi paykunaqa chay runata wajmanta wajachimuranku, jinaspa niranku: “Cheqaqta willakuspa Diosta jatunchay; noqaykuqa allintan yachayku chay runaqa juchasapapuni kasqanta”, nispa. 25  Jinan payqa niran: “Noqaqa manan yachanichu juchasapachus imaynachus chaytaqa, ñausa kashaspay kunan qhawashasqallaytan yachani”, nispa. 26  Chaymi paykunaqa niranku: “¿Imanarasunkitaqri? ¿Imaynatan ñawiykita kicharasunki?”, nispa. 27  Jinan payqa paykunata niran: “Ñataq niykichisña, qankunataq ichaqa mana uyariqpas tukuwankichischu. ¿Imapaqñataq wajmantari uyariyta munashankichis? Icha ¿paypa discipulon kaytachu qankunapas munashankichis?”, nispa. 28  Jinan paykunaqa pisichaspa niranku: “Qanchá chay runaq discipulonqa kanki; noqaykuqa Moisespa discipulonkunan kayku. 29  Noqaykuqa yachaykun Diosqa Moisesman rimaykusqanta, pichus chay runata kachamuran chaytan ichaqa mana yachaykuchu”, nispa. 30  Chaymi chay runaqa paykunata niran: “Admirakunapaqmá kayqa, maypis mana yachawaqchischu pichus kachamuran chayta, ¿manachu chayta reparankichis ñawiyta kichawasqanpi? 31  Yachanchismá riki Diosqa juchasapakunata mana uyarisqanta, pichus payta manchakuspa munayninta ruwaqtan ichaqa uyarin. 32  Manamá riki jayk’aqpas ñausapuni naceqpa ñawintaqa pipas kichariranchu. 33  Manachus kay runa Diosmanta kanman chayqa, manachá ima ruwaytapas atinmanchu”, nispa. 34  Jinan paykunaqa niranku: “¿Qan juchasapapuni naceq kashaspaykichu noqaykuta yachachiwankikuman?”, nispa. Jinaspa qarqopuranku. 35  Jesusqa chay runata qarqomusqankuta yachaspan, paywan tupaspa tapuran: “¿Iñinkichu runaq Churinpi?”, nispa. 36  Jinaqtinmi payqa niran: “Wiraqocha, willaway pichus pay kasqanta, chhaynapi paypi iñinaypaq”, nispa. 37  Jesustaq payta niran: “Paytaqa ñan rikurankiña. Noqa rimapayaqniykin chayqa kashani”, nispa. 38  Jinan chay runaqa niran: “Iñinin, Señor”, nispa. Jinaspataq payman k’umuykuran. 39  Jesustaq niran: “Noqaqa kay pachaman jamurani runakuna juzgasqa kananpaqmi, chhaynapi mana rikuqkuna rikunankupaq, rikuqkunataq ñausa kapunankupaq”, nispa. 40  Chayta uyarispan chaypi kashaq fariseokunaqa niranku: “Chhaynaqa, ¿noqaykupas ñausachu kayku?”, nispa. 41  Jinan Jesusqa paykunata niran: “Ñausa kawaqchis chayqa, manachá juchayoqchu kawaqchis. Qankunan ichaqa ‘rikuykun’ ninkichis, chayraykun juchallayoqpuni kashankichis”, nispa.

Uraypi willakuykuna

Qhaway “explicasqa simikuna” nisqapi “sinagoga” nisqata.