Juan 8:12-59

  • Jesús ch’ujlla ruway fiestapi kasqanmanta (1-13)

  • Jesús chay fiestapi yachachisqanmanta (14-24)

  • Pichus Cristo kasqanmanta runakunaq rimasqan (25-52)

  • Jesusmanta Yayaq willasqan (12-30)

    • Jesús ‘kay pachapaq k’anchay’ kasqanmanta (12)

  • Imaynachus Abrahanpa wawankuna kanankumanta (31-41)

    • ‘Cheqaq kaqmi kacharichisunkichis’ (32)

  • Pikunachus Saqraq wawankuna kasqankumanta (42-47)

  • Jesusmanta Abrahanmantawan (48-59)

8  12  Jesusqa runakunatan nillarantaq: “Noqan kay pachapaq k’anchayqa kani. Pipas qatikamuwaqqa manapunin tutayaqpi purinqachu, aswanmi kausayman apaq k’anchayta chaskinqa”, nispa. 13  Chaymi fariseokunaqa payta niranku: “Qanqa qanllamantamá rimashanki, ¿chaychu rimasqayki cheqaq kanman?”, nispa. 14  Jinan Jesusqa paykunata niran: “Noqallamantaña rimani chaypas, rimasqayqa cheqaqmi, noqaqa yachanin maymantachus jamuni chayta maymanchus rishani chaytapas. Qankunan ichaqa mana yachankichischu maymantachus jamuni chayta ni maymanchus rishani chaytapas. 15  Qankunaqa imachus rikusqaykichisman jinallan juzgankichis, noqan ichaqa mana pitapas juzganichu. 16  Juzgani chayqa chanintan juzgani, noqaqa manan sapallaychu kashani, aswanpas kachamuwaqniy Yayan noqawanqa kashan. 17  Kamachikuy simi chaskisqaykichispipas: ‘Iskay testigokunachus willanku chayqa, cheqaqmi chay willasqankuqa’, nispan nishan ¿riki? 18  Manan noqallachu noqamantaqa willani, kachamuwaqniy Yayapas willallantaqmi noqamantaqa”, nispa. 19  Jinan paykunaqa niranku: “¿Maypitaq kashan Yayaykiri?”, nispa. Jesustaq niran: “Qankunaqa manan reqsiwankichischu, manallataqmi Yayaytapas reqsinkichischu. Reqsiwankichismanchus chayqa, reqsiwaqchischá Yayaytapas”, nispa. 20  Chaykunataqa rimaran templopin qolqe churanakunaq kasqan partepi yachachishaspa. Ichaqa manan pipas jap’iranchu; manaraqmi wañunan tiempochu kasharan. 21  Wajmantan Jesusqa paykunata nillarantaq: “Noqaqa ripusaqmi, qankunataq maskhawankichis, chaywanpas juchaykichispin wañunkichis. Maymanchus risaq chaymanqa manan jamuyta atiwaqchischu”, nispa. 22  Chaymi judiokunaqa ninakuranku: “Kay runaqa wañuchikunqachu imaynataqri. ¿Imaraykutaq nishan: ‘Maymanchus risaq chaymanqa manan jamuyta atiwaqchischu’, nispari?”, nispa. 23  Jinan Jesusqa paykunata niran: “Qankunaqa uraymantan kankichis, noqan ichaqa wichaymanta kani. Qankunaqa kay pachamantan kankichis, noqan ichaqa mana kay pachamantachu kani. 24  Chayraykun noqaqa niraykichis: ‘Juchaykichispin wañunkichis’, nispa. Manachus creenkichis noqaqa jamunan karan chay kasqaypi chayqa, juchaykichispin wañunkichis”, nispa. 25  Jinan paykunaqa niranku: “¿Pitaq kankiri?”, nispa. Jinaqtinmi Jesusqa paykunata niran: “Imapaqñas qankunataqa rimapayaykichispas. 26  Imaymanakunatan qankunamanqa ninay kashan, imaymanakunatataqmi juzganaypas kashan. Kachamuwaqniyqa cheqaq rimaqpunin, imakunatachus paymanta uyarisqaytataqmi kay pachapiqa rimani”, nispa. 27  Paykunaqa manan entienderankuchu Yayamanta rimashasqanta. 28  Chaymi Jesusqa niran: “Maypachachus runaq Churinta warkunkichis chaypachañan yachankichis noqaqa jamunan karan chaypuni kasqayta, manataq imatapas noqallamantachu ruwasqayta, aswanpas Yayaq yachachiwasqanman jinapuni kaykunataqa rimasqayta. 29  Kachamuwaqniyqa noqawanmi kashan, manan sapallaytachu payqa saqerpariwan, imatapas sonqonpaq jinapuni tukuy tiempo ruwasqayrayku”, nispa. 30  Chaykunata niqtinmi askha runakuna paypi iñiranku. 31  Jinan Jesusqa paypi iñiq judiokunata niran: “Sichus yachachisqayta waqaychallankichispuni chayqa, cheqaqtapunin discipuloykuna kankichis, 32  reqsinkichistaqmi imachus cheqaq kasqantapas, chay cheqaq kaqtaqmi kacharichisunkichis”, nispa. 33  Jinan jujkunaqa payta niranku: “Noqaykuqa Abrahanpa wawankunan kayku, manataqmi jayk’aqpas noqaykuqa piqpa kamachinpaschu karayku. Chhaynaqa, ¿imaraykutaq qanri: ‘Kacharichisqan kankichis’, nishanki?”, nispa. 34  Jesustaq paykunata niran: “Cheqaqtapunin niykichis: Pipas juchata ruwaqqa juchaq kamachinmi. 35  Jinaspapas kamachiqa manan wiñaypaqchu wasipi qhepakun, churin ichaqa wiñaypaq qhepakun. 36  Chayrayku, sichus Churi kacharichisunkichis chayqa, cheqaqtapunin kacharichisqa kankichis. 37  Noqaqa yachanin Abrahanpa wawankuna kasqaykichista, ichaqa wañuchiytan munawashankichis, yachachisqayta mana jap’ikusqaykichisrayku. 38  Yayaywan kashaspa imachus rikusqaykunamantan noqaqa rimani; qankunataq taytaykichismanta imachus uyarisqaykichista ruwankichis”, nispa. 39  Paykunataq niranku: “Taytaykuqa Abrahanmi”, nispa. Jinan Jesusqa paykunata niran: “Abrahanpa wawankunachus kawaqchis chayqa, Abrahanpa ruwasqankunatachá ruwawaqchis. 40  Noqaqa Diosmanta uyarisqay cheqaq kaqtan willaykichis, qankunataq ichaqa wañuchiyta munawashankichis. Abrahanqa manan jayk’aqpas chaytaqa ruwanmanchu karan. 41  Qankunaqa taytaykichispa ruwasqankunatan ruwashankichis”, nispa. Paykunataq niranku: “Noqaykuqa manan qhelli juchamantachu* naceyku, jujllan taytaykuqa, payqa Diosmi”, nispa. 42  Jinan Jesusqa paykunata niran: “Dioschus taytaykichis kanman chayqa, munakuwankichismanchá; noqaqa Diosmantan jamuni, chaymi kaypi kashani, manataqmi noqallamantachu jamuni, aswanpas paymi kachamuwan. 43  Qankunaqa manan yachachisqayta chaskikuyta munankichischu, chaymi rimasqaytaqa mana entiendenkichischu. 44  Qankunaqa taytaykichis Saqramantan jamunkichis, chay taytaykichispa munaynintataqmi ruwaytapas munankichis. Payqa llullakuyta qallarisqanmantapachan runa wañuchiq karan; t’aqakapuranmi cheqaq kaqmantapas, cheqaq kaq paypi mana kasqanrayku. Llullakuspaqa imaynachus kasqanman jinan riman llulla kasqanrayku, llullakunaq taytan kasqanrayku ima. 45  Noqan ichaqa cheqaqllata imatapas nishaykichis, qankunataq mana creewankichischu. 46  ¿Mayqenniykichistaq razonwan niwankichisman: ‘Qanqa juchasapan kanki’, nispa? Chhaynaqa, ¿imaraykutaq cheqaq kaqta rimashaqtiyri mana creewankichischu? 47  Pipas Diosmanta kaqqa uyarinmi Diospa nisqankunata. Qankunan ichaqa mana Diosmantachu kankichis, chaymi mana uyarinkichischu paypa nisqankunataqa”, nispa. 48  Jinan judiokunaqa Jesusta niranku: “Noqaykuqa sut’illantan nishayku: ‘Qanqa Samaria runan kanki, supayniyoqtaq kashankipas’, nispaqa ¿riki?”, nispa. 49  Jesustaq paykunata niran: “Noqaqa manan supayniyoqchu kashani, aswanpas noqaqa Yayaytan jatunchashani, qankunataq ichaqa noqata pisichawashankichis. 50  Manan noqachu jatunchasqa kaytaqa munani, jujmi jatunchasqa kanaytaqa munan, paytaqmi juezqa. 51  Cheqaqtapunin niykichis: Pipas simiyta kasukuqqa manapunin jayk’aqpas wañunqachu”, nispa. 52  Jinan judiokunaqa payta niranku: “Kunanqa allintan yachayku supayniyoqpuni kasqaykita. Abrahanpas profetakunapas wañurankumá riki; qantaq ichaqa nishanki: ‘Pipas simiyta kasukuqqa manan jayk’aqpas wañunqachu’, nispa. 53  Qanqa manamá riki ñaupa taytayku Abrahanmanta aswan allinchu kanki; payqa wañupuranmi profetakunapas wañupullarankutaqmi. Chhaynaqa, ¿pin kani ninkitaqri?”, nispa. 54  Jinan Jesusqa niran: “Noqachus jatunchakuyman chayqa, jatunchakusqayqa manan imapaschu kanman. ‘Diosniykun’ nisqaykichis Yayaymi noqataqa jatunchawan; 55  qankunaqa manan payta reqsinkichischu, noqan ichaqa reqsini. ‘Manan reqsinichu’ niymanchus chayqa, qankuna jinachá llulla kayman; ichaqa reqsinin paytaqa, kasukunitaqmi simintapas. 56  Taytaykichis Abrahanqa maytan munaran imakunatachus ruwanay karan chayta rikuyta, chaypi piensaspan payqa anchata kusikuran, rikurantaqmi kanpas, chaywanmi payqa anchata kusikuran”, nispa. 57  Chaymi judiokunaqa niranku: “Qanqa manamá pisqa chunka watallaykipipaschu kashanki, ¿chaychu Abrahanta rikuwaq karan?”, nispa. 58  Jinan Jesusqa paykunata niran: “Cheqaqtapunin niykichis: Manaraq Abrahán kashaqtinqa ñan noqaqa karaniña”, nispa. 59  Chayta niqtinmi runakunaqa rumikunata oqarikuranku Jesusta ch’aqenankupaq, Jesusmi ichaqa pakarukuran, jinaspa templomanta lloqsipuran.

Uraypi willakuykuna

Qhaway “explicasqa simikuna” nisqapi “qhelli jucha” nisqata.