Juan 3:1-36

  • Jesuswan Nicodemowan rimasqankumanta (1-21)

    • Wajmantan nacena (3-8)

    • Runakunata Diospa munakusqanmanta (16)

  • Jesusmanta Juanpa último willasqan (22-30)

  • Wichaymanta jamuq (31-36)

3  Juj runan karan Nicodemo sutiyoq, payqa fariseokunamanta jujninmi karan, judiokunaq jujnin umallintaq karanpas.  Paymi tutallapi Jesusman jamuspa niran: “Yachachikuq, yachaykun qanqa Diospa kachamusqan yachachiq kasqaykita; ruwasqayki señalkunataqa manan pipas ruwayta atinmanchu manachus Dios paywan kashanman chayqa”, nispa.  Jinan Jesusqa niran: “Cheqaqtapunin niyki: Pipas Diospa gobiernonta rikunanpaqqa wajmantan nacenan”,* nispa.  Nicodemotaq niran: “¿Imaynapitaq runari machuña kashaspa wajmanta nacenman? ¿Atinmanchu mamanpa wijsanman kutiykuyta, chhaynapi wajmanta nacenanpaq?”, nispa.  Jesustaq niran: “Cheqaqtapunin niyki: Pipas Diospa gobiernonman jaykunanpaqqa unumanta espiritumantawanmi nacenan.  Runamanta naceqqa runallataqmi, espiritumanta naceqpas espiritullataqmi.  Ama admirakuychu: ‘Qankunaqa wajmantan nacenaykichis’, nisqaywanqa.  Wayraqa maychus munasqanmantan wayramun ¿riki?, suenasqallanmi uyarikun, ichaqa manan yachakunchu maymantachus jamun chayta ni maymanchus rin chaytapas. Chhaynallataqmi pasan espiritumanta llapa naceqkunawanpas”, nispa.  Jinan Nicodemoqa niran: “¿Imaynataq chaykunari kanman?”, nispa. 10  Chaymi Jesusqa niran: “¿Israelpi yachachiq kashaspachu mana chaykunata yachanki? 11  Cheqaqtapunin niyki: Noqaykuqa imachus yachasqaykutan rimayku, imachus rikusqaykumantan willaykupas, qankunan ichaqa willasqaykuta mana creenkichischu. 12  Kay pachapi kaqkunamanta willasqaytataq mana creewankichischu chayqa, ¿imaynapitaq creewankichisman janaq pachapi kaqkunamanta willaqtiyri? 13  Jinaspapas manan pipas janaq pachamanqa wicharanchu, aswanmi runaq Churin janaq pachamanta uraykamuran. 14  Imaynan Moisespas ch’inneqpi kashaspa mach’aqwayta warkuran, chhaynallataqmi runaq Churinpas warkusqa kanqa, 15  chhaynapi pipas paypi creeqqa wiñay kausayniyoq kananpaq. 16  ”Diosqa anchatapunin runakunata munakuran, chaymi sapallan Churinta kachamuran, pipas paypi iñiqqa ama wañunanpaq aswanpas wiñay kausayniyoq kananpaq. 17  Diosqa Churinta kay pachaman kachamuran manan runakunata juchachananpaqchu, aswanpas kay pacha runakuna paywan salvasqa kanankupaqmi. 18  Pipas paypi iñiqqa manan juchachasqachu kanqa, mana iñiqmi ichaqa ña juchachasqaña kapun, Diospa sapallan Churinpa sutinpi mana iñisqanrayku. 19  K’anchaymi kay pachaman jamuran, runakunan ichaqa k’anchayta munakunankumantaqa tutayaqta munakunku ima ruwasqankupas mana allinpuni kasqanrayku, chayraykun paykunaqa juchachasqa kanku. 20  Pipas mana allin kaqkunata ruwaqqa cheqnikunmi k’anchayta, manataqmi k’anchaymanpas jamunchu, chhaynapi mana allin ruwasqankuna mana sut’iman orqosqa kananpaq. 21  Allin kaqkunata ruwaqmi ichaqa k’anchayman jamun, chhaynapi ima ruwasqankunapas Diospa munayninman jina kasqanta sut’ita reparakunanpaq”, nispa. 22  Chay qhepamanmi Jesusqa discipulonkunapiwan Judeapi jawa llaqtakunaman riran, chaypin payqa qatikuqninkunawan juj tiempo karan, runakunatapas bautizaranmi.* 23  Juanpas bautizasharanmi Salim qaylla Enón llaqtapi, chaypi askha unu kasqanrayku, runakunapas jamushallarankun bautizachikunankupaq. 24  Chay tiempopaqqa manaraqmi Juanqa carcelman wisq’asqachu karan. 25  Chaymantataq Juanpa discipulonkunaqa juj judío runawan ch’uyanchakuymanta discutiranku. 26  Jinan paykunaqa Juanman jamuspa niranku: “Yachachikuq, Jordán mayu chimpapi qanwan kasharan paymantapas willasharanki, chay runan kunanqa bautizashan, llapa runakunataqmi payman rishanku”, nispa. 27  Jinan Juanqa niran: “Runaqa manan imayoqpaschu kanman manachus janaq pachamanta chaskinman chayqa. 28  Qankuna kikiykichismá riki uyarirankichis: ‘Manan noqaqa Cristochu kani, aswanpas paypa ñaupanta kachamusqallan kani’, nispa nisqaytaqa. 29  Noviaq dueñonqa novion. Chaywanpas novioq amigonqa ladonpi sayaykuspan payta uyarin, jinaspa anchatapuni kusikun novioq kunkanta uyarisqanrayku. Chayraykun noqapas anchatapuni kusikuni. 30  Payqa yapakushallanqan, noqataq ichaqa pisiyapushallasaq”, nispa. 31  Wichaymanta jamuqqa lliumantapas aswan kuraqmi. Kay pachamanta kaqqa kay pachallamantan, kay pacha kaqkunallamantataqmi rimanpas. Janaq pachamanta jamuqqa lliumantapas aswan kuraqmi. 32  Payqa imachus rikusqanmanta imachus uyarisqanmantawanmi willan, ichaqa manan pipas chay willasqanta uyarinchu. 33  Willasqanta chaskikuqqa sut’itan yachan Diosqa cheqaq rimaq kasqanta. 34  Diospa kachamusqanqa Diospa nisqankunatan riman, espiritunta mana mich’akuspa payman qosqanrayku. 35  Yayaqa munakunmi Churita, chaymi tukuy imatapas payman jap’ichin. 36  Pipas Churipi iñiqqa wiñay kausayniyoqmi kanqa, pipas Churita mana kasukuqtaq ichaqa mana kausayta rikunqachu, aswanmi Diospa phiñakuynin paypi kashallanqa.

Uraypi willakuykuna

Chaytaqa “wichaymantan nacenan” nispapas t’ijrakullanmantaqmi.
Manan kikin Jesuspunichu bautizanman karan. Qhaway Jn 4:2 textota.