Juan 20:1-31

  • Sepultura ch’usaq kasqanmanta (1-10)

  • María Magdalenaman Jesuspa rijurisqanmanta (11-18)

  • Discipulonkunaman Jesuspa rijurisqanmanta (19-23)

  • Tomaspa mana creesqanmanta, creesqanmantawan (24-29)

  • Imapaqchus kay qelqa ruwakusqanmanta (30, 31)

20  Semana qallariy p’unchaytan* María Magdalenaqa rankhi-rankhillataraq sepulturaman riran, chaypin payqa sepultura wisq’asqanku rumita suchuchisqataña tariran.  Jinan payqa phawaran Simón Pedroman Jesuspa munakusqan discipulomanwan, jinaspa paykunata niran: “Señortan sepulturamanta orqorapusqaku, manan yachaykuchu maymanchus churarunku chayta”, nispa.  Chaymi Pedrowan juj kaq discipulowanqa sepulturaman riranku.  Iskayninkun phawaylla riranku, chay juj kaq discipulon ichaqa Pedromanta aswan usqhaylla phawaspa ñaupaqta sepulturaman chayaruran.  Jinan payqa k’umuykuspa qhawaykuran, jinaspa rikuran lino telakuna chaypi churarayashaqta, ichaqa manan sepultura ukhumanqa jaykuranchu.  Chayllamanmi qhepanta phawamuq Simón Pedropas chayamullarantaq, jinaspa sepulturaman jaykuran, jinan paypas rikullarantaq lino telakuna chaypi churarayashaqta.  Jesuspa umanpi kaq telaqa manan juj telakunawan kuskachu kasqa, aswanpas juj ladopin k’uyusqa churarayashasqa.  Ñaupaqta chayamuq juj kaq discipulopas jaykullarantaqmi sepultura ukhuman, chayta rikuspan payqa creeran.  Ichaqa manaraqmi entienderankuchu Diospa simin qelqapi Jesuspa kausarimpunanmanta willasqanta. 10  Chaymi paykunaqa wasinkuman kutipuranku. 11  Marian ichaqa sepultura t’oqo jawapi waqaspa sayasharan. Waqan-waqantaq k’umuykuspa sepultura t’oqota qhawaykuran. 12  Jinaspan maypichus Jesuspa cuerpon karan chaypi rikuran yuraq p’achayoqkama iskay angelkunata, jujninta maypichus uman kasharan chaypi tiyashaqta, jujnintataq maypichus chakin kasharan chaypi tiyashaqta. 13  Paykunan Mariata niranku: “¿Imaraykun waqashanki?” nispa. Jinan payqa niran: “Señorniytan orqorusqaku, manan yachanichu maymanchus churarunku chayta”, nispa. 14  Chayta nispan payqa kutirispa Jesusta chaypi sayashaqta rikuran, ichaqa manan repararanchu Jesús kasqanta. 15  Jesustaq payta niran: “¿Imaraykun waqashanki? ¿Pitan maskhashanki?”, nispa. Mariaqa huertapi llank’aq runapaqmi piensaran, chaymi payta niran: “Wiraqocha, qan aparanki chayqa, willaway maymanchus churamuranki chayta, chhaynapi apakapunaypaq”, nispa. 16  Jinan Jesusqa niran: “¡María!”, nispa. Paytaq kutirispa hebreo rimaypi niran: “¡Rabboni!”, nispa (chayqa “¡yachachikuq!” ninantan nin). 17  Jesustaq payta niran: “Ama jap’ipakuwaychu, manaraqmi Yayamanqa wichapuniraqchu. Ichaqa phaway wayqeykunaman nimuy: ‘Noqan wichapushani Yayayman, Yayaykichisman; Diosniyman, Diosniykichisman’”, nispa. 18  Jinan María Magdalenaqa rispa chayta Jesuspa discipulonkunaman willamuran: “¡Señortan rikuramuni!”, nispa. Willaranmi Jesuspa nisqantapas. 19  Semana qallariy p’unchay tardeyaykuqtintaq, Jesuspa discipulonkunaqa judiokunata manchakusqankurayku wasi punkuta allinta wisq’arukuspa kasharanku. Jinan Jesusqa qonqaylla paykuna chaupipi rijuriran, jinaspa paykunata niran: “Thaj kay kachun qankunapaq”, nispa. 20  Chayta nisqan qhepatan Jesusqa paykunaman rikuchiran makinta waqtannintawan. Jinan discipulonkunaqa kusikuranku Señorta rikusqankurayku. 21  Jesusqa wajmantan paykunata nillarantaq: “Thaj kay kachun qankunapaq. Imaynan Yayaqa noqata kachamuwaran, chhaynatan noqapas qankunata kachasaykichis”, nispa. 22  Chayta nisqan qhepatan paykunaman phukuykuspa niran: “Chaskiychis santo espirituta. 23  Piqpa juchantapas perdonankichis chayqa, chay juchaqa perdonasqañan kapun; manachus perdonankichis chayqa, chay juchaqa manan perdonasqachu kashan”, nispa. 24  Chunka iskayniyoq apostolkunamanta jujnin, “Mellizo” nisqa Tomasqa manan chaypichu kasharan Jesús jamuqtinqa. 25  Chaymi wakin discipulokunaqa payta niranku: “¡Señortan rikuruyku!”, nispa. Jinan Tomasqa niran: “Manachus clavokunaq t’oqosqanta makinpi rikusaq, dedoytapas clavokunaq t’oqosqanman mana winasaqchu, waqtan t’urpusqankumanpas mana makiyta winasaqchu chayqa, manapunin creesaqchu”, nispa. 26  Chaymanta pusaq p’unchay qhepamanmi Jesuspa discipulonkunaqa wajmanta wasi ukhupi kasharanku, Tomaspas paykunawanmi kasharan. Jinan allin wisq’asqaña punku kasharan chaypas, Jesusqa qonqaylla paykuna chaupipi rijuriran, jinaspa niran: “Thaj kay kachun qankunapaq”, nispa. 27  Chaymantataq Tomasta niran: “Qhawariy makiyta, dedoykita kayman winaykuy; makiykitapas waqtanniyman winaykuy, amaña iskayaychu, aswanpas creey”, nispa. 28  Jinan Tomasqa payta niran: “¡Señorníy, Diosníy!”, nispa. 29  Chaymi Jesusqa payta niran: “¿Rikuwasqaykiraykuchu creenki? Kusisqa kachunku mana rikuspalla creeqkunaqa”, nispa. 30  Cheqaqtapunin Jesusqa imaymana señalkunatawan ruwaran discipulonkunaq ñaupanpi, chaykunaqa manan kay qelqa k’uyupiqa qelqasqachu kashan. 31  Kaypi qelqasqakunan ichaqa kashan Jesusqa Diospa Churin Cristo kasqanpi iñinaykichispaq, paypi iñisqaykichisrayku sutinpi kausayniyoq kanaykichispaqwan.

Uraypi willakuykuna

Chayqa karan domingo p’unchaymi, judío runakunapaqqa chaymi karan semana qallariy p’unchay.