Juan 2:1-25

  • Caná llaqtapi casarakuy kasqanmanta, unuta vinoman tukuchikusqanmantawan (1-12)

  • Jesús templomanta runakunata qarqon (13-22)

  • Runaq sonqon imaynachus kasqanta Jesuspa yachasqanmanta (23-25)

2  Iskay p’unchay qhepamantaq Galileapi kaq Caná llaqtapi karan juj casarakuy fiesta, chaypin kasharan Jesuspa mamanpas.  Jesuspas discipulonkunapas invitasqan karanku chay fiestamanqa.  Vino pisirushaqtinmi Jesuspa mamanqa payta niran: “Manan vinonku kanñachu”, nispa.  Jinan Jesusqa niran: “¿Imanaqtintaq noqanchisri chaymanta llakikunanchis? Tiempoyqa manaraqmi chayamunchu”, nispa.  Mamantaq chaypi serviqkunata niran: “Ruwallankichis ima nisqasuykichistapas”, nispa.  Chaypin kasharan judío runakunaq kamachikusqanman jina ch’uyanchakunapaq rumimanta soqta rakikuna, sapankamanmi jaykuq chunka iskayniyoq jina otaq chunka qanchisniyoq jina galón.*  Jesusmi paykunata niran: “Chay rakikunaman unuta junt’achiychis”, nispa. Jinan paykunaqa junt’achiranku.  Chaymantataq niran: “Kunanqa juj chikanta orqospa apaychis casarakuy fiestamanta encargakuqman”, nispa. Jinan paykunaqa aparanku.  Casarakuy fiestamanta encargakuqtaq vinoman tukuchisqa unuta malliykuran, ichaqa manan yacharanchu maymantachus apamuranku chayta, unuta orqoq kamachikuna yacharankuña chaypas; chaymi casarakuy fiestamanta encargakuqqa noviota wajaspa 10  niran: “Lliu casarakuqpas ancha allin kaq vinotaraqmi ñaupaqtaqa jaywachin, runakuna machasqaña kaqtintaq mana allin vinollataña churan. Qanmi ichaqa ancha allin kaq vinota kunankama waqaychasqanki”, nispa. 11  Chay milagrotan Jesusqa ruwaran Galileapi kaq Caná llaqtapi, chaymi karan ñaupaq milagro ruwasqan, chhaynapin rikuchiran atiyninta; chaymi discipulonkunaqa paypi iñiyta qallariranku. 12  Chay qhepamantaq Jesusqa mamanwan, wayqenkunawan, discipulonkunapiwan Capernaum llaqtaman uraykuranku, ichaqa pisi tiempollan chaypi qhepakuranku. 13  Ñan judío runakunaq Pascua fiestan chayamusharanña, chaymi Jesusqa Jerusalén llaqtaman wicharan. 14  Chaypin payqa templopi tariran wakakuna, ovejakuna, palomakuna vendeqkunata, jinallataq qolqe cambiaqkunatapas tiyanankupi tiyashaqta. 15  Jinan Jesusqa waskhamanta jasut’ita ruwakuspa llapa ovejakunata wakakunatawan qarqomuran, vendeqkunataq uywankuq qhepanta phawaranku; qolqe cambiaqkunaq qolqenkutapas jich’arpariranmi, mesankutapas t’ijrarpariranmi. 16  Paloma vendeqkunatataq niran: “¡Orqoychis kaykunata! ¡Yayaypa wasinqa manan negocio ruwana wasichu!”, nispa. 17  Chaykunata rikuspan discipulonkunaqa yuyariranku: “Wasiykita mayta munakusqaymi nina jinaraq noqapi raurarinqa”, nisqa qelqasqata. 18  Chaymi judío runakunaqa Jesusta niranku: “Juj señaltayá rikuchiwayku, chhaynapi kaykunata ruwanaykipaq derechoyoqchus kanki icha manachus chayta yachanaykupaq”, nispa. 19  Jinan Jesusqa paykunata niran: “Kay templota thuniychis, noqataq kinsa p’unchayllapi jatarirachisaq”, nispa. 20  Chaywanmi judío runakunaqa niranku: “Kay templotaqa tawa chunka soqtayoq watapimá ruwakuran, ¿chaychu qanri kinsa p’unchayllapi ruwaruwaq?”, nispa. 21  “Templo” nispaqa cuerponmantan Jesusqa rimasharan. 22  Wañusqanmanta jatarichisqa kaqtinmi discipulonkunaqa yuyariranku chhaynatapuni Jesusqa niq kasqanta, jinan paykunaqa Diospa simin qelqapi chay qelqasqata Jesuspa chay nisqantawan creeranku. 23  Jerusalén llaqtapi Pascua fiestapi Jesús kashaqtinqa askhan sutinpi iñiranku imaymana milagrokuna ruwasqanta rikuspanku. 24  Jesusmi ichaqa mana tukuy sonqochu paykunapi confiaran imaynachus kasqankuta yachasqanrayku, 25  payqa manan necesitaranchu pipas runakunamanta imatapas willanantaqa, yacharanmi runaq sonqon imayna kasqanta.

Uraypi willakuykuna

Chayqa karan 44 litro jinan otaq 66 litro jina.