Juan 17:1-26

  • Apostolninkunawan Jesuspa último kutita mañakusqanmanta (1-26)

    • Diosta reqsiyqa wiñay kausaymanmi apan (3)

    • Cristianokunaqa manan kay pachamantachu kanku (14-16)

    • “Simiykin cheqaq kaqqa” (17)

    • ‘Sutiykitan reqsichini’ (26)

17  Chaykunata rimayta tukuspan Jesusqa cielota qhawarispa niran: “Yayáy, ñan hora chayaramunña. Churiykita jatunchay paypas qanta jatunchanasuykipaq,  chhaynapi lliu runata kamachinanpaq atiyta qosqaykiman jina, payman jap’ichisqayki lliu runakunaman wiñay kausayta qonanpaq.  Paykuna wiñay kausayta chaskinankupaqqa qan sapallan cheqaq Diostan reqsinanku,* reqsinallankutaqmi kachamusqayki Jesucristotapas.  Noqaqa ñan tukuniña qowasqayki llank’anataqa, chaywanmi kay pachapi jatunchaykiña.  Chhaynaqa, Yayáy, ladoykipi kachispa jatunchaway, manaraq kay pachapi runakuna kashaqtin jatunchasqa kasqay jatunchaywan.  ”Kay pachamanta qowasqayki runakunamanmi sutiykita reqsichiniña. Paykunaqa qanpan karan, ichaqa noqamanmi qopuwaranki, paykunaqa kasukunkun simiykitapas.  Kunanqa yachankuñan tukuy imaymana rimasqaypas ruwasqaypas qanmanta jamusqanta;  chaytaqa yachanku lliu ima niwasqaykikunata paykunaman willasqayraykun, chaykunata chaskikuspan paykunaqa yachanku sutiykipi jamusqayta, creenkutaq qanpuni kachamuwasqaykitapas.  Paykunapaqmi mañakamuyki, manan kay pachapaqchu, aswanpas qowasqaykikunapaqmi, paykuna qanpa kasqankurayku. 10  Llapa kaqniykunaqa qanpan, qanpa kaqniykikunapas noqaqmi; qowasqaykikunaqa noqatan jatunchawanku. 11  ”Noqaqa qanmanmi jamushani, chaymi manaña kay pachapichu kasaq, paykunan ichaqa kay pachapi kashanku. Yayáy, qanqa ch’uyan kanki, qowasqayki sutiykirayku paykunata cuiday, chhaynapi paykunapas noqanchis jina jujlla* kanankupaq. 12  Paykunawan kashaspayqa qowasqayki sutiykiraykun noqaqa paykunata qhawariq kani, noqan cuidaqpas kani; manan mayqenninkupas chinkanqachu, aswanmi jujlla; payllan chinkachisqaqa kanqa, chhaynapi simiyki qelqa junt’akunanpaq. 13  Kunanmi ichaqa qanman jamushani, chaymi kaykunataqa kay pachallapiraq kashaspay rimashani, chhaynapi paykunapas noqa jina ancha kusisqa kanankupaq. 14  Noqan simiykita paykunaman willarani, kay pacha runakunan ichaqa paykunata cheqnikunku, mana kay pacha runakuna jinachu kasqankurayku, noqapas manallataqmi kay pacha runakuna jinachu kani. 15  ”Noqaqa mañakamushayki manan kay pachamanta paykunata orqonaykipaqchu, aswanpas Satanasmanta* cuidanaykipaqmi. 16  Imaynan noqapas mana kay pacha runakuna jinachu kani, chhaynallataqmi paykunapas mana kay pacha runakuna jinachu kanku. 17  Cheqaq kaqwan paykunata ch’uyanchay;* simiykin cheqaq kaqqa. 18  Imaynan qanpas kay pachaman kachamuwaranki, chhaynatan noqapas paykunata kay pachaman kachashani. 19  Noqaqa paykunaraykun ch’uyalla kashani, chhaynapi paykunapas cheqaq kaqwan ch’uya kanankupaq. 20  ”Manan paykunallapaqchu noqaqa mañakamushayki, pikunachus paykunata uyarispa noqapi iñinqaku chaykunapaqwanmi mañakamushayki, 21  chhaynapi llapallanku jujlla kanankupaq; imaynan qanpas, Yayáy, noqawan jujlla kanki, noqapas qanwan jujlla kani, chhaynallataq paykunapas noqanchiswan jujlla kanankupaq, chhaynapi kay pacha runakuna qanpa kachamusqayki kasqayta creenankupaq. 22  Chaymantapas, noqaqa respetanin paykunataqa imaynan qanpas respetawanki jinata, chhaynapi paykunapas noqanchis jina jujlla kanankupaq. 23  Noqaqa paykunawan jujllachasqan kashani, qantaq noqawan jujllachasqa kashanki, chhaynapi paykuna allin jujllachasqa kanankupaq;* chhaynapin kay pacha runakunaqa yachanqaku qanpa kachamuwasqaykita, imaynan noqata munakuwanki chhaynata paykunatapas munakusqaykitawan. 24  Yayáy, qowasqayki runakunapaqmi mañakamuyki maypichus kasaq chaypi paykunapas noqawan kuska kanankupaq, chhaynapi qowasqayki qhapaq atiyta rikunankupaq, munakuwasqaykiraykun chaytaqa qowaranki manaraq runakuna kay pachapi mirayta qallarishaqtinku.* 25  Chanin Yayáy, kay pacha runakunaqa manapunin reqsisunkikuchu, noqan ichaqa reqsiyki, kay qowasqaykikunapas yachankuñan noqaqa qanpa kachamusqayki kasqayta. 26  Paykunamanmi noqaqa sutiykita reqsichini, reqsichishallasaqtaqmi kanpas, chhaynapi paykunapas munakuwasqayki munakuyta rikuchinankupaq, chhaynapin noqaqa paykunawan jujllachasqa kasaq”, nispa.

Uraypi willakuykuna

Chaypiqa “qanmantan yachashanallanku” nillanmantaqmi.
Chaypiqa “juj yuyaylla” nillanmantaqmi.
Griego rimaypiqa “millay kaqmanta” ninmi.
Chaypiqa “sapaqchay” otaq “ch’uyaman tukuchiy” nillanmantaqmi.
Chaypiqa “cheqaqtapuni juj yuyaylla kanankupaq” nillanmantaqmi.
Chayqa rimashan Adán Evaq wawankunamantan.