Juan 15:1-27

  • Cheqaq uvas sach’amanta ejemplo (1-10)

  • Cristo jina munakuyta rikuchinapaq kamachikuymanta (11-17)

    • “Chaymanta aswan munakuqqa manan kanchu” (13)

  • Kay pacha runakuna Jesuspa discipulonkunata cheqninankumanta (18-27)

15  Jesusqa nillarantaqmi: “Noqan cheqaq uvas sach’aqa kani, Yayaytaq chajra llank’aq.  Noqapi kaq llapa mana ruruq k’allmakunataqa paymi wit’upunqa, llapa ruruqtataq kuchupaspa limpianqa, chhaynapi astawan rurunanpaq.  Qankunaqa limpiasqañan kashankichis qankunaman rimapayasqay simiwan.  Noqawan jujllachasqalla kashaychis, jinan noqapas qankunawan jujllachasqa kashasaq. Imaynan uvas k’allmaqa mana kikillanmantaqa rurunmanchu, aswanpas sach’api kaspalla, chhaynallataqmi qankunapas mana ruruyta atiwaqchischu manachus noqawan jujllachasqa kankichis chayqa.  Noqan uvas sach’aqa kani, qankunataq k’allmakuna kankichis. Pipas noqawan jujllachasqalla kashanqa chayqa, noqapas jujllachasqallan paywanqa kashasaq, chhaynapitaq askhata rurunqa. Noqamanta t’aqasqaqa manan imatapas ruwayta atiwaqchischu.  Pipas mana noqawan jujllachasqallachu kanqa chayqa, wit’usqa k’allma jinan wijch’usqa kanqa, jinaspa ch’akipunqa. Chhayna k’allmakunataqa juñuspan ninaman wijch’uykunku, chaypitaq ruphapun.  Sichus noqawan jujllachasqalla kankichis, simiykunapas qankunapi kashallanqa chayqa, tukuy ima mañakusqaykichismi ruwasqa kanqa.  Sichus askhata rurunkichis, rikuchinkichistaq discipuloykuna kasqaykichistapas chayqa, Yayaymi jatunchasqa kanqa.  Imaynan Yayaqa noqata munakuwan, chhaynatan noqapas qankunataqa munakuykichis; chhaynaqa qankunapas munakuynillaypi kashaychis. 10  Kamachikuyniykunatachus kasukunkichis chayqa, munakuynillaypin kashankichis, imaynan noqapas Yayaypa kamachikuyninkunata kasukuspa munakuynillanpi kashani jinata. 11  ”Chaykunataqa nishaykichis noqa jina kusikunaykichispaqmi, aswan kusisqaraq kanaykichispaqwan. 12  Kaymi kamachikuyniyqa: Jujkuna-jujkunawanmi munanakunkichis, imaynan noqapas qankunata munakuykichis jinata. 13  Amigonkunarayku vidanta* qoqmi aswan munakuqqa, chaymanta aswan munakuqqa manan kanchu. 14  Kamachikuyniykunatachus kasukunkichis chayqa, amigoykunan kankichis. 15  Noqaqa manañan ‘kamachi runakuna’ niykichisñachu, kamachiqa manan yachanchu patronninpa imachus ruwasqanta, noqan ichaqa Yayaymanta tukuy imaymana uyarisqayta qankunaman willaykichis, chaymi ‘amigoykuna’ niykichis. 16  Manan qankunachu ajllawarankichis, aswanpas noqan qankunata ajllakuraykichis rurushanallaykichispaq, rurusqaykichispas wiñaypaq kananpaq; chhaynapin Yayaqa sutiypi imatapas mañakuqtiykichisqa qosunkichis. 17  ”Chaykunatan kamachiykichis jujkuna-jujkunawan munanakunaykichispaq. 18  Kay pacha runakunachus cheqnikusunkichis chayqa, yuyariychis qankunamanta ñaupaqtaraq noqata cheqnikuwasqankuta. 19  Kay pacha runakuna jinachus kawaqchis chayqa, paykunaqa munakusunkichismanchá kaqninkutaqa. Qankunan ichaqa mana kay pacha runakuna jinachu kankichis noqa qankunata kay pachamanta ajllakusqayrayku, chaymi paykunaqa cheqnikusunkichis. 20  Aman qonqankichischu ‘kamachiqa manan patronninmantaqa kuraqchu’ nispa qankunaman nisqayta. Noqatataq qatikachawaranku chayqa, qankunatapas qatikachallasunkichistaqmi; simiytachus kasukuranku chayqa, simiykichistapas kasukullanqakutaqmi. 21  Sutiy jawan llapa chaykunataqa ruwasunkichis, pichus kachamuwaran chayta mana reqsisqankurayku. 22  Manachus noqa jamuyman karan, manataqchus paykunata rimapayayman karan chayqa, manan juchayoqchu kankuman karan; kunanmi ichaqa manaña ninkumanchu ‘manan juchayoqchu kani’ nispaqa. 23  Noqata cheqnikuwaqqa Yayaytapas cheqnikullantaqmi. 24  Manachus paykunaq ñaupanpi mana piqpa ruwasqan ruwaykunata ruwayman karan chayqa, manan juchayoqchu kankuman karan, kunanmi ichaqa rikunkuña, chaywanpas cheqniwankun noqatapas Yayaytapas. 25  Chaykunan ichaqa pasaran kamachikuy simipi: ‘Yanqapas qasin cheqnikuwaranku’, nisqa qelqasqa junt’akunanpaq. 26  Yayamantan qankunaman juj yanapaqta kachamusaq, chayqa cheqaq kaqta sut’iman orqoq espiritun, Yayamantataq jamunpas, chaymi chayamuspa noqamanta willanqa; 27  qankunapas noqamantaqa willanaykichismi, qallariymantapacha noqawan kasqaykichisrayku”, nispa.

Uraypi willakuykuna

Chaypiqa “almanta” nillanmantaqmi.