Juan 14:1-31

  • Jesuspa yanapaynillanwan Yayaman asuykunamanta (1-14)

    • “Noqan kani ñanpas, cheqaq kaqpas, kausaypas” (6)

  • Santo espirituta kachamunanpaq Jesuspa prometesqanmanta (15-31)

    • “Yayaqa noqamanta aswan atiyniyoqmi” (28)

14  Jesusqa nillarantaqmi: “Ama sonqoykichispi llakipakuychischu. Diospi iñiychis, noqapipas iñillaychistaq.  Yayaypa wasinpiqa askhan kashan maypichus tiyanaykichispaq; manachus chhayna kanman chayqa, manachá niykichismanchu; chaymanmi noqaqa rishani qankuna maypichus tiyanaykichispaq preparaq.  Maymanchus rinayman rispaqa maypichus tiyanaykichispaqmi preparamusaq, chaymantataq wajmanta qankunaman jamusaq, jinaspa wasiman pusapusaykichis, chhaynapi qankunapas maypichus kasqaypi kanaykichispaq.  Maymanchus risaq chayman riq ñantaqa ñan reqsinkichisña ¿riki?”, nispa.  Jinan Tomasqa niran: “Señor, manan maymanchus rishanki chaytapas yachaykuchu, ¿chaychu reqsiykuman chayman riq ñanta?”, nispa.  Jinan Jesusqa payta niran: “Noqan kani ñanpas, cheqaq kaqpas, kausaypas. Noqallantapunin pipas Yayamanqa chayanqa.  Qankunachus allinta reqsiwankichis chayqa, Yayaytapas reqsillankichistaqmi; kunanmantapachan paytaqa reqsinkichis, rikunkichistaq kanpas”, nispa.  Jinan Felipeqa niran: “Señor, Yayata rikuchiwayku, chayllatan noqaykuqa munayku”, nispa.  Jinan Jesusqa payta niran: “Felipe, ¿khaytukuy tiempoña qankunawan kashaqtiychu manaraq reqsiwanki? Pipas noqata rikuwaqqa Yayatapas rikullantaqmi. Chhaynaqa, ¿imaraykutaq qanri niwashanki: ‘Yayata rikuchiwayku’, nispa? 10  ¿Manachu creenki noqaqa Yayawan jujllachasqa kasqayta, Yayapas noqawan jujllachasqa kasqanta? Qankunaman imachus nisqaytaqa manan noqallamantachu rimani, aswanpas noqawan jujllachasqa kashaq Yayan kaykunataqa ruwashan. 11  Creeychisyá: ‘Noqaqa Yayawan jujllachasqan kashani, Yayapas noqawan jujllachasqan kashan’, nispa nisqaytaqa. Manachus chayrayku creenkichis chayqa, creeychisyá imaymanakuna ruwasqayraykullapas. 12  Cheqaqtapunin niykichis: Pipas noqapi iñiqqa, noqaq ruwasqaykunatan ruwanqa, chaykunamantapas aswantaraqmi ruwanqa; noqaqa Yayamanmi ripushani. 13  Imatapas sutiypi mañakuqtiykichisqa noqan ruwapusaykichis, chhaynapi Yayaqa Churirayku jatunchasqa kananpaq. 14  Imatapas sutiypi mañakuqtiykichisqa ruwapusaykichismi. 15  ”Munakuwankichischus chayqa, kamachikusqaykunatan kasukunkichis. 16  Noqan Yayamanta mañakusaq, jinan payqa juj yanapaqta* qosunkichis qankunawan wiñaypaq kananpaq, 17  chayqa cheqaq kaqta sut’iman orqoq espiritun, chaytaqa manan kay pacha runakunaqa chaskiyta atinkumanchu, paykunaqa manan chaytaqa rikunkuchu ni reqsinkupaschu. Qankunan ichaqa reqsinkichis, chay espirituqa qankunawanmi kashan, qankunapitaqmi kashanpas. 18  Noqaqa manan mana piniyoqtachu saqerparisaykichis, kutimusaqmi qankunamanqa. 19  Juj chikanmantaqa manañan runakunaqa rikuwanqakuñachu, qankunan ichaqa rikuwankichis; noqaqa kausashallasaqmi, qankunapas kausashallankichismi. 20  Chay p’unchaypin qankunaqa yachankichis Yayaywan jujllachasqa kasqayta, qankunapas noqawan jujllachasqa kasqaykichista, noqataq qankunawan jujllachasqa kasqayta. 21  Pipas kamachikuyniykunata jap’ikuspa chayman jina ruwaqmi munakuwaqniyqa, munakuwaqniytaq Yayaypa munakusqan kanqa, noqapas paytaqa munakusaqmi, sut’itataq paymanqa rikuchikusaqpas”, nispa. 22  Jinan juj kaq Judasqa (manan Judas Iscariotechu) Jesusta niran: “Señor, ¿imanaqtintaq noqaykumanri sut’ita rikuchikunki, manataq runakunamanqa?”, nispa. 23  Jinan Jesusqa payta niran: “Pipas munakuwaqniyqa kasukunqan simiyta, Yayaytaq payta munakunqa; paymanmi noqaykuqa jamusaqku, jinan payqa noqaykuwan tiyanqa. 24  Pipas mana munakuwaqqa manan kasukunchu simiyta; uyarisqaykichis simikunaqa manan noqaqchu, chayqa kachamuwaqniy Yayaqmi. 25  ”Qankunawanraq kashaspaymi tukuy chaykunataqa nishaykichis. 26  Chaymantaqa yanapaq santo espiritun tukuy imaymanata yachachisunkichis, tukuy imaymana nisqaytataq yuyarichisunkichispas, chay espiritutan Yayaqa sutiypi kachamunqa. 27  Noqaq qosqay thaj kaytan saqeshaykichis. Chay thaj kay qosqayqa manan kay pachaq qosqan thaj kay jinachu. Aman sonqoykichispi llakipakunkichischu, amataq manchapakunkichispaschu. 28  Uyarirankichismi riki: ‘Ripusaqmi, chaymantataq qankunaman kutimusaq’, nisqaytaqa. Munakuwankichisman chayqa, kusikuwaqchischá ‘Yayamanmi ripushani’ nisqaymantaqa, Yayaqa noqamanta aswan atiyniyoqmi. 29  Noqaqa manaraq chaykuna pasashaqtinmi chayta nishaykichis, chhaynapi chaykuna pasaqtinqa rimasqayta creenaykichispaq. 30  Kay pacha kamachikuqqa ñan jamushanña, chaymi noqaqa manaña nishutachu qankunawan rimasaq. Payqa manan imanaytapas atiwanmanchu; 31  ichaqa kay pacha runakuna Yayata munakusqayta yachanankupaqmi noqaqa Yayaq kamachiwasqanman jinapuni ruwashani. Jatariychis, jaku kaymanta”, nispa.

Uraypi willakuykuna

Chaypiqa “juj kallpachaqta” nillanmantaqmi.