Juan 13:1-38

  • Qatikuqninkunaq chakinta Jesuspa maqchisqanmanta (1-20)

  • Judas jap’ichiqnin kananta Jesús willakun (21-30)

  • Mosoq kamachikuymanta (31-35)

    • “Qankunapura munanakusqaykichispin lliupas yachanqaku” (35)

  • Jesusta Pedro negananmanta (36-38)

13  Pascua fiesta ñaupaqtaraqmi Jesusqa yacharanña kay pachamanta ripuspa Yayanman kutipunan horaña kasqanta. Payqa anchatan munakuran pikunachus paypa karan chaykunata, tukukuykamapas munakushallaranmi.  Paykunaqa cenasharankuñan, Saqrapas ñan Simonpa wawan Judas Iscarioteq sonqonpi yuyayta churasqaña Jesusta jap’ichinanpaq.  Jesusqa yacharanmi Yayaqa tukuy imatapas payman jap’ichisqanta, Diosmanta jamusqanta, Diosman kutipunanña kashasqantapas.  Chaymi payqa mijushasqanmanta jatarispa jawa p’achankunata ch’utikuspa juj ladoman churaran, jinaspa juj toallawan cinturanta k’uyukuran.  Chaymantataq juj puruñaman unuta jich’aykuspa discipulonkunaq chakinta maqchiyta qallariran, jinaspa cinturanta k’uyukusqan toallawan ch’akichiran.  Simón Pedroman achhuykuqtintaq, payqa niran: “Señor, ¿maypis chakiyta maqchiwankiman?”, nispa.  Jinan Jesusqa payta niran: “Imachus ruwasqaytaqa manan kunanqa entiendenkiraqchu, chaymantaqa entiendellankin”, nispa.  Pedrotaq ichaqa niran: “Qanqa manapunin chakiytaqa maqchiwankimanchu”, nispa. Chaymi Jesusqa niran: “Manachus maqchisayki chayqa, manañan noqawanchu purinki”, nispa.  Jinan Simón Pedroqa niran: “Señor, chhaynaqa ama chakillaytachu maqchiway, aswanpas makiytawan umaytawan maqchiway”, nispa. 10  Jesustaq payta niran: “Allin bañasqa kaqqa llapan cuerponpin limpioña kashan, chakillantañan maqchikunan. Qankunaqa limpioñan kashankichis, ichaqa manan llapaykichischu”, nispa. 11  Payqa yacharanñan pichus jap’ichinan karan chayta, chaymi niran: “Manan llapaykichischu limpio kashankichis”, nispa. 12  Chakinkuta maqchiyta tukuspataq jawa p’achankunawan churakuspa wajmanta mesapi tiyaykuran, jinaspa paykunata niran: “¿Entiendenkichischu imaraykuchus chay ruwasqayta? 13  Qankunaqa ‘yachachikuq’, ‘Señor’ niwankichismi ¿riki? Chaytaqa allintan ninkichis, chaypunin kani. 14  Noqaqa Señorña yachachikuqña kashaspapas maqchiraykichistaq chakiykichista chayqa, qankunapas maqchinakunaykichismi chakiykichistaqa. 15  Noqan ejemplota churashaykichis; chayrayku, imaynatachus ruwaraykichis, chhaynallatataqmi qankunapas ruwanaykichis. 16  Cheqaqtapunin niykichis: Kamachiqa manan patronninmantaqa kuraqchu, manallataqmi kachasqapas kachaqninmantaqa kuraqchu. 17  Yachankichistaq chaykunata chayqa, chayman jina ruwaspaykichisqa ancha kusisqan kankichis. 18  Manan llapaykichismantachu rimashani; noqaqa reqsinin ajllasqaykunataqa. Aswanpas kaytaqa nishaykichis Diospa simin qelqapi nisqan junt’akunanpaqmi, chaypin nishan: ‘T’anta mijuqmasiymi noqa contra jatarin’,* nispa. 19  Manaraq chaykuna pasashaqtinmi kunan nishaykichis, chhaynapi chaykuna pasaqtinqa noqamanta rimashasqanta creenaykichispaq. 20  Cheqaqtapunin niykichis: Pipas kachasqayta chaskiqqa noqatawanmi chaskiwashan, noqata chaskiwaqtaq kachamuwaqniytawan chaskishan”, nispa. 21  Chaykunata nisqan qhepamanmi Jesusqa sinchitapuni llakikuran, jinaspa sut’inta paykunata niran: “Cheqaqtapunin niykichis: Qankunamanta jujniykichismi enemigoykunaman jap’ichiwanqa”, nispa. 22  Jinan discipulonkunaqa admirasqa qhawarinakuranku pimantachus rimashasqanta mana yachasqankurayku. 23  Jesuspa munakusqan discipulonmi paypa ladonpi kasharan.* 24  Paytan Simón Pedroqa umallanwan wajarispa niran: “‘¿Pimantan rimashanki?’, nispa niy”, nispa. 25  Jinan payqa Jesuspa qhasqonman k’iraykuspa tapuran: “Señor, ¿pitaqri?”, nispa. 26  Jinan Jesusqa niran: “Pimanchus t’anta phasmi challpusqayta qosaq chaymi”, nispa. Jinaspan t’antata challpuspa Simón Iscarioteq wawan Judasman qoran. 27  Chay t’anta phasmita chaskikusqan qhepamanmi, Satanasqa Judaspa sonqonman jaykuran. Chaymi Jesusqa Judasta niran: “Imachus ruwanaykita usqhaylla ruwamuy”, nispa. 28  Ichaqa mesapi kashaqkunamantaqa manan mayqenninkupas yacharankuchu imaraykuchus chay nisqanta. 29  Wakinmi nisharanku: “‘Fiestapaq imakunachus faltawashanchis chayta rantimuy’, otaq ‘wajchakunaman imallatapas qomuy’ nispapaschá nishan”, nispanku; chaytaqa nisharanku Judas qolqe churana cajata jap’isqanraykun. 30  Jinan Judasqa t’antata chaskikuspa jina chaymanta lloqsiran, chay ratoqa tutañan kasharanpas. 31  Pay lloqsiqtinmi Jesusqa niran: “Kunanmi runaq Churinqa jatunchasqa kanqa, payraykun Diospas jatunchasqa kanqa. 32  Dios kikinmi paytaqa jatunchanqa, usqhayllataqmi jatunchanqapas. 33  Wawallaykuna, juj chikan tiempollatawanñan qankunawan kasaq. Qankunaqa maskhawankichismi, ichaqa imaynan wakin judiokunatapas nirani, chhaynatan qankunatapas kunan niykichis: ‘Maymanchus risaq chaymanqa manan jamuyta atiwaqchischu’, nispa. 34  Juj mosoq kamachikuytan qoykichis: Jujkuna-jujkunawanmi munanakunkichis; imaynan noqapas munakuykichis, chhaynallatataqmi qankunapas jujkuna-jujkunawan munanakunkichis. 35  Qankunapura munanakusqaykichispin lliupas yachanqaku discipuloykuna kasqaykichista”, nispa. 36  Jinan Simón Pedroqa payta niran: “Señor, ¿maytataq rinkiri?”, nispa. Jinan Jesusqa niran: “Maymanchus risaq chaymanqa manan qhepayta jamuyta atiwaqraqchu, chaymantañan ichaqa jamunki”, nispa. 37  Pedrotaq niran: “Señor, ¿imanaqtintaq kunanri mana qhepaykita jamuyta atiymanchu? Noqaqa wañuymanraqmi* qanraykuqa”, nispa. 38  Jinan Jesusqa niran: “¿Cheqaqtachu noqarayku wañuwaq?* Cheqaqtapunin niyki: Manapunin galloqa waqanqachu, kinsa kutita negawanaykikama”, nispa.

Uraypi willakuykuna

Griego rimaypiqa “talonninta noqa contra oqarin” ninmi.
Griego rimaypiqa “qhasqonpi [otaq pechonpi] kasharan” ninmi.
Chaypiqa “almaytaraqmi qoyman” nillanmantaqmi.
Chaypiqa “almaykita qowaq” nillanmantaqmi.