Hechos 8:1-40

  • Qatikachaq Saulomanta (1-3)

  • Felipeq Samariapi predicasqanmanta (4-13)

  • Pedrowan Juanpiwan Samariaman kachasqa kasqankumanta (14-17)

  • Simón santo espirituta rantiy munasqanmanta (18-25)

  • Etiopía llaqtayoq umalli runamanta (26-40)

8  Sauloqa allinpaqmi qhawariran Esteban wañuchisqankuta. Chay p’unchaymantapachan Jerusalenpi kaq iñiq t’aqata sinchita qatikachayta qallariranku; chaymi llapa iñiqkuna jinantin Judeaman Samariamanwan ch’eqerichisqa karanku, apostolkunallan manaqa.  Estebantataq Dios sonqo runakuna apaspa p’ampampuranku, khuyaytan paymantaqa waqaykuranku.  Sauloqa sinchi millaytan iñiqkunata tratayta qallariran. Payqa wasinkuta jaykuspan qharitapas warmitapas aysaspa orqomuq, jinaspa carcelman wisq’achiq.  Ch’eqerichisqa kaqkunaqa jinantinpin puriranku Diospa siminmanta allin willakuykunata willaspa.  Paykunamanta jujninmi karan Felipe, paymi Samaria llaqtaman* jaykuspa Cristomanta willayta qallariran.  Llapallan runakunan tukuy yuyayta churaspa Felipeq rimasqanta uyarisharanku, señalkuna ruwasqantapas qhawasharanku.  Askha runakunan millay espiritukunaq ñak’arichisqan kasharanku, chay espiritukunan qaparispa paykunamanta lloqsiranku, chaymantapas askha mana kuyuriy atiq runakuna wist’ukuna iman qhaliyachisqa karanku.  Chaymi chay llaqtapiqa ancha kusikuy karan.  Chay llaqtapin karan juj runa Simón sutiyoq, paymi supaykunaq yanapayninwan imaymanata ruwaq, chaywantaq Samaria runakunata admirachiq “noqaqa atiyniyoq runan kani” nispa. 10  Paykunaqa llapankun juch’uypas kuraqpas tukuy yuyaywan payta uyariqku, niqkutaq: “Kay runapiqa Diospa ancha atiyninpunin kashanman”, nispa. 11  Unayñan payqa supaykunaq yanapayninwan imaymanata ruwaspa paykunata admirachiq, chaymi paytaqa tukuy yuyaywan uyariqku. 12  Ichaqa Diospa gobiernonmanta Jesucristoq sutinmantawan allin willakuykunata Felipe willaqtinmi paykunaqa iñipuranku, jinaspa qharikunapas warmikunapas bautizakapuranku. 13  Kikin Simonpas iñipuranmi, bautizakapuspataq Felipewan kuska puriq, payqa anchatan admirakuq señalkunata jatun milagrokunatawan* ruwaqta rikuspa. 14  Samariapi runakuna Diospa siminta allinta chaskikushasqankuta yachaspan apostolkunaqa Jerusalenmanta kacharanku Pedrota Juantawan, 15  jinan paykunaqa Samariaman rispa Diosmanta mañakuranku iñipuqkuna santo espirituta chaskinankupaq. 16  Paykunaqa manaraqmi mayqenninkupas santo espirituta chaskisqakuchu, aswanpas Señor Jesuspa sutillanpiraqmi bautizasqa kasqaku. 17  Chaymi Pedrowan Juanwanqa paykunaman makinkuta churaykuranku, jinan paykunaqa santo espirituta chaskiyta qallariranku. 18  Chay apostolkuna makinkuta churaykuqtinku iñiqkuna espirituta chaskisqankuta rikuspan Simonqa qolqeta paykunaman jaywaran: 19  “Noqamanpas chay atiyta qowaychis, chhaynapi pimanpas makiyta churaykuqtiy santo espirituta chaskinanpaq”, nispa. 20  Jinan Pedroqa payta niran: “Chay qolqeyki qanwan kuska chinkachun, Diospa gratislla qokuyninta qolqewan rantiyta munasqaykirayku. 21  Manan qanpaqqa imapas kay ruwanapiqa kanchu, Diospa qhawarinanpaq sonqoyki mana allin kasqanrayku. 22  Chayrayku pesapakuy kay mana allin ruwasqaykimanta, jinaspa Jehová Diosmanta rogakuy, ichapas sonqoykiq mana allin munasqanmanta perdonasunkiman. 23  Reparashaykin envidiosollaña kasqaykita mana allin ruwayllatapuni munaq kasqaykitapas”, nispa. 24  Jinan Simonqa paykunata niran: “Ama jinachu kaychis, qankuna Jehová Diosmanta rogapuwaychis llapa chay nisqaykichiskunamanta ama imapas chayamuwananpaq”, nispa. 25  Paykunaqa llapa chay ladokunapi allin willakuykunata willaruspanku Jehová Diospa simintapas willaruspankun Jerusalenman kutipuranku. Kutipushaspankuqa Samaria runakunaq tiyasqan ayllukunapi allin willakuykunata willan-willanmi kutipuranku. 26  Jehová Diospa angelninmi Felipeta niran: “Phaway uray ladoman riy Jerusalenmanta Gaza llaqtaman uraykuq ñanninta”, nispa. (Chay ñanqa ch’aki ch’inneqpin karan.) 27  Jinan Felipeqa riran, chayllamanmi rikuran Etiopía llaqtapi reinaq* kamachin jatun umallita, paymi reinaq llapa qhapaq kayninkunamanta encargasqa karan. Payqa Jerusalén llaqtatan risqa Diosta adoraq, 28  chaymantan carretanpi tiyaykuspa kutimpushasqa profeta Isaiaspa qelqasqanta alto kunkawan leespa. 29  Jinan santo espirituqa Felipeta niran: “Phaway, chay carretaman aypay”, nispa. 30  Chaymi Felipeqa carretaq ladonman phawaspa uyariran profeta Isaiaspa qelqasqanta leeshaqta, jinan tapuran: “¿Entiendeshankichu imachus leesqaykita?”, nispa. 31  Jinan payqa niran: “¿Imaynapitaq entiendeyman mana pipas yachachiwashaqtinri?”, nispa. Jinaspa Felipeta valekuran carretanman seqaspa ladonpi tiyaykunanpaq. 32  Diospa simin qelqapi leesqan profeciaqa khaynatan nin: “Payqa oveja jinan nak’anaman apasqa karan, millmanta rutuchikuq cordero jinan payqa ch’inlla karan. 33  Sarunchashaqtinkuqa manan chanintachu juzgaranku. Kay pachamanta chinkachisqataq kanqa chayqa, ¿pitaq willanqa piqpa mirayninmantachus jamusqantari?”, nispa. 34  Chay umalli runan Felipeta niran: “Ama jinachu kay, willariway: ¿Pimantan kayta profeta rimashan? ¿Pay kikinmantachu, icha juj runamantachu?”, nispa. 35  Jinan Felipeqa chay qelqamanta qallarispa willaran Jesusmanta allin willakuykunata. 36  Chay ñanninta rishaspankun chayaranku unuq kasqanman, jinan chay umalli runaqa niran: “¡Qhawariy! ¡Unu! ¿Atiymanñachu bautizasqa kayta, icha imatawanraqchu ruwanay?”, nispa. 37  *—— 38  Jinan chay umalli runaqa kamachikuran carreta sayachisqa kananpaq, jinaspa Felipewan kuska unuman uraykuranku, chaypin Felipeqa payta bautizaran. 39  Unumanta lloqsimuqtinkutaq Felipetaqa Jehová Diospa espiritun usqhaylla juj ladoman pusaran. Umalli runaqa ancha kusisqan ripuran, manañataq Felipeta rikuranñachu. 40  Felipeqa Asdod llaqtamanmi riran, jinaspa llapa llaqtakunapi allin willakuykunata willaspa puriran Cesarea llaqtaman chayanankama.

Uraypi willakuykuna

Chaytaqa “Samariapi juj llaqtaman jaykuspa” nispapas t’ijrakullanmantaqmi.
Griego rimaypiqa “atiywan ruwaykunatawan” ninmi.
Griego rimaypiqa “Candace reinaq” ninmi, chhaynatan niqku Etiopía llaqtapi wakin reinakunata.
Kay versiculoqa manan rijurinchu “Westcott, Hort” nisqa griego qelqakunapi, nitaq wakin allin reqsisqa qelqakunapipas.