Hechos 5:1-42

  • Ananiasmanta Safiramantawan (1-11)

  • Apostolkunaq señalkuna ruwasqanmanta (12-16)

  • Carcelpi wisq’asqa kasqankumanta, lloqsimusqankumantawan (17-21a)

  • Wajmanta Jatun Juntaman apasqa kasqankumanta (21b-32)

    • “Diostan ñaupaqtaqa kasukunayku” (29)

  • Gamalielpa consejo qosqanmanta (33-40)

  • Wasin-wasinta predicasqankumanta (41, 42)

5  Juj runan karan Ananías sutiyoq, paymi esposan Safirapiwan allpankuta venderanku.  Ananiasqa vendesqan qolqemanta wakintan esposanpa yachashasqan pakaran, wakillanta apamuspataq apostolkunaman qoran.  Jinan Pedroqa payta niran: “Ananías, ¿imaraykun Satanaswan tanqachikuranki santo espirituta llullakunaykipaq, allpa vendesqaykimanta wakin qolqeta pakanaykipaqpas?  Chay allpaqa qanpan karan ¿riki? Vendesqayki qolqepas makiykipimá kasharan riki chaywan ima munasqaykita ruwanaykipaq. Chhaynaqa, ¿imaraykun sonqoykipi yuyaykuranki chhayna mana allinta ruwanaykipaq? Qanqa manan runakunatachu llullakushanki, aswanpas Diostan llullakushanki”, nispa.  Chayta uyarispan Ananiasqa wijch’ukuspa wañupuran. Chay pasasqanmanta llapa uyariqkunaqa sinchitan mancharikuranku.  Waynakunataq sayarispanku Ananiaspa cuerponta telakunawan k’uyuranku, jinaspa jawaman orqospa p’ampamuranku.  Kinsa horamanta jinataq Ananiaspa esposan jaykumuran, payqa manan imatapas yacharanchu imachus pasasqanmantaqa.  Jinan Pedroqa tapuran: ¿“Khayna preciopichu allpaykichista venderankichis?”, nispa. Paytaq niran: “Arí, chhaynapin”, nispa.  Jinan Pedroqa payta niran: “¿Imaraykun iskayniykichis yachachinakurankichis Jehová Diospa espiritunta pruebaman churanaykichispaq? Qosaykita p’ampamuqkunan punkupiña kashanku, kunanqa qantañataqmi orqosunkiku”, nispa. 10  Jinan payqa kaq rato wijch’ukuspa Pedroq ñaupanpi wañupuran. Chay waynakunataq jaykumuspanku wañusqataña tariranku, chaymi jawaman orqospa qosanpa ladonpi p’ampamuranku. 11  Jinan Jerusalenpi llapa iñiqkuna sinchita mancharikuranku, jinallataq chay pasasqanta llapa uyariqkunapas. 12  Apostolkunaqa ruwashallarankun runakunaq ñaupanpi señalkunata milagrokunata ima; paykunaqa juj sonqollan juñunakuqku “Salomonpa columnankuna”* nisqapi. 13  Wakinkunaqa manan iñiqkunaman juñukuyta munarankuchu. Llaqta runakunan ichaqa iñiqkunamanta allinta rimasharanku. 14  Chaymantapas askhan qharikunapas warmikunapas Señorpiqa iñipusharanku. 15  Paykunaqa onqosqakunatapas jatun callekunamanmi orqomuqku, jinaspa chayman churaqku juch’uy puñuna patakunapi camillakunapi ima, chhaynapi chayninta Pedro pasaqtin llanthullanpas paykunaman chayananpaq. 16  Jerusalén qayllapi kaq llaqtakunamantapas runakunaqa askhallañan jamuqku onqosqakunata millay espiritukunaq ñak’arichisqankunatawan apamuspa, jinan llapallanku qhaliyachisqa karanku. 17  Uma sacerdotewan paywan llapa kaqkunapiwanmi ichaqa sinchi phiñasqa jatariranku (paykunaqa saduceo t’aqamantan karanku), 18  jinaspa apostolkunata jap’ispa llaqtapi carcelman wisq’aranku. 19  Jehová Diospa angelninmi ichaqa tutapi carcelpa punkunkunata kicharan, jinaspa paykunata orqospa niran: 20  “Temploman rispa runakunaman rimapayamushallaychis wiñay kausaymanta”, nispa. 21  Chayta uyarispan paykunaqa illarimuyllata temploman jaykuranku, jinaspa yachachiyta qallariranku. Chaykamataq uma sacerdoteqa paywan kaqkunapiwan chayamuspanku Jatun Juntapi* kaqkunata Israelpi llapa kuraq runakunatawan juñuranku; guardiakunatataq carcelman kacharanku apostolkunata apamunankupaq, 22  carcelman chayaspankun ichaqa mana apostolkunata tarirankuchu, jinan kutimuspanku willakuranku: 23  “Carceltan tarimuyku allin wisq’asqata, guardiakunatapas punkukunapi sayashaqta, kichaqtiykun ichaqa mana pipas chay ukhupi kasqachu”, nispa. 24  Chayta uyarispan templota qhawaq umalliwan, umalli sacerdotekunapiwanqa ninakuranku: “Imachá kunanqa pasanqa”, nispa. 25  Chayllamanmi juj runa chayamuran, jinaspa paykunata niran: “Carcelman wisq’amusqaykichis runakunaqa templopin kashanku, chaypin runakunaman yachachishanku”, nispa. 26  Jinan templota qhawaq umalliqa guardiankunapiwan rispa paykunata pusamuranku, ichaqa sumaqllatan pusamuranku runakuna rumiwan ch’aqenankuta manchakusqankurayku. 27  Pusamuspankutaq Jatun Juntaq ñaupanpi sayaykachiranku, jinan uma sacerdoteqa paykunata 28  niran: “¿Manachu noqaykuqa kamachiraykichis amaña Jesuspa sutinpi yachachinaykichispaq? Chhaynaqa, ¿imaraykutaq qankunari Jerusalén llaqtaman yachachikuyniykichista junt’aykachishankichis? ¿Imaraykun chay runaq wañusqanmantapas noqaykuta juchachayta munawashankiku?”, nispa. 29  Jinan Pedroqa wakin apostolkunapiwan niranku: “Noqaykuqa kamachikuq Diostan ñaupaqtaqa kasukunayku, runakunata kasukunaykumantaqa. 30  K’aspipi* warkuspa wañuchisqaykichis Jesustan ñaupa taytanchiskunaq Diosnin kausarichipun. 31  Paytan Diosqa jatunchan paña ladonpi tiyachispa, paytan churan kausayman apaq kananpaq, salvaq kananpaqwan, chhaynapi Israel runakuna juchankumanta pesapakuqtinku Dios paykunata perdonananpaq. 32  Noqaykun chaykunamanta testigo kayku, kasukuqninkunaman Diospa qosqan santo espiritupas yanapawankun chaykunamanta willanaykupaq”, nispa. 33  Chayta uyarispan paykunaqa sinchita phiñakuranku, jinaspa wañuchiyta munaranku. 34  Chayllamanmi Jatun Junta ukhumanta juj runa sayariran, payqa fariseon karan, sutinmi karan Gamaliel, payqa kamachikuy simita yachachiqmi karan, lliu runaq respetasqantaqmi karanpas; paymi kamachikuran apostolkunata juj ratolla jawaman orqonankupaq. 35  Jinaspa paykunata niran: “Israel runakuna, kay runakunata imatapas ruwanaykichispaqqa allintaraq piensaychis. 36  Yuyashankichispaschá ñaupa watakunapi Teudas runawan imachus pasasqanta, payqa jatarispan umalli churakuran, jinaspa t’aqanman juñukuranku tawa pachaj jina qharikuna. Wañuchisqa kaqtintaq ichaqa payta qatikuq llapa runakuna ch’eqeripuranku, jinaspa mana imapi tukupuranku. 37  Chay qhepamanmi jatarillarantaq censo kashasqan p’unchaykunapi Galilea llaqtayoq Judas, paytapas askha runakunan qatikullarankutaq, wañupuqtinmi ichaqa payta qatikuq runakunapas ch’eqeripullarankutaq. 38  Chaymi niykichis: Ama imanaychispaschu chay runakunataqa. Imachus yachachisqanku imachus ruwasqankupas runakunallamanta jamushan chayqa, chinkapullanqan; 39  Diosmantachus jamushan chayqa, manan chinkachiyta atinkichischu. Sichus imanankichispas chayqa, yaqapaschá qankuna Diospa contranpi jatarishawaqchis”, nispa. 40  Jinan paykunaqa chay yuyaychayta uyarikuranku, chaymi apostolkunata wajachimuspa waqtaykullarankuña, kamachirankutaq amaña Jesuspa sutinpi rimanankupaq, jinaspa kacharipuranku. 41  Jinan paykunaqa Jatun Juntaq ñaupanmanta kusisqa ripuranku, Jesuspa sutinpi p’enqayta ñak’arisqankumanta Diospa allin qhawarisqan kasqankurayku. 42  Sapa p’unchaymi paykunaqa templopi, wasin-wasinta rispa ima Cristo Jesusmanta allin willakuykunata mana samaspa yachachisharanku willasharanku ima.

Uraypi willakuykuna

Chay columnakunaqa chimpa-chimpankan sayasharan, techoyoqtaqmi karanpas, chaupinqa calle jinan karan.
Qhaway “explicasqa simikuna” nisqapi “Jatun Junta” nisqata.
Chaypiqa “sach’api” nillanmantaqmi.