Hechos 3:1-26

  • Mañapakuq such’u runata Pedroq qhaliyachisqanmanta (1-10)

  • Salomonpa columnankunapi Pedroq rimasqanmanta (11-26)

    • ‘Tukuy imapas mosoqyachisqan kanqa’ (21)

    • Moisés jina profeta (22)

3  Juj kutinmi Pedrowan Juanpiwan temploman wichasharanku Diosmanta mañakuna horapaq, chay mañakuyqa karan las tres* tardenta jinan,  chay raton runakuna apasharanku such’uña naceq runata. Paytaqa sapa p’unchaymi templopi “munaycha” nisqa punku qayllapi churaqku, chhaynapi temploman jaykuqkunamanta limosnata mañakunanpaq.  Chay runan Pedrota Juantawan temploman jaykushaqta rikuspa limosnata mañakuran.  Jinan Pedroqa Juanpiwan chay runata qhawaykuranku, Pedrotaq niran: “Qhawarimuwayku”, nispa.  Jinan chay runaqa paykunata qhawariran “imallatapas qowanqakuchá” nispa.  Jinan Pedro payta niran: “Manan qolqeypas qoriypas kanchu, ichaqa imachus kapuqniytan qosayki. Nazaret llaqtayoq Jesucristoq sutinpin niyki: Sayarispa puririy”, nispa.  Chayta nispataq paña makinmanta jap’ispa aysariran sayarichinanpaq. Jinan kaq rato chay runaq chakinqa allin kapuran,  chaymi payqa saltasparaq sayariruran, jinaspa puririran, paykunawan kuskataq temploman jaykuran purispa, salta-saltarispa, Diosta jatunchaspa ima.  Llapa runakunan paytaqa rikuranku purishaqta, Diosta jatunchashaqta ima. 10  Jinan paykunaqa ninakuranku: “Kayqa templopi ‘munaycha’ nisqa punkupi limosna mañapakuq runamá riki”, nispa, chaymi anchata admirakuspa mana creeytapas atirankuchu. 11  Chay runa Pedrota Juantawan jap’ishallaqtinraqmi runakunaqa llapanku ancha admirasqa paykunaman riranku “Salomonpa columnankuna”* nisqapi kashaqtinku. 12  Chayta rikuspan Pedroqa runakunata niran: “Israel runakuna, ¿imanaqtinmi ancha admirasqa kashankichis? ¿Imanaqtinmi qhawaykuwashankiku atiyniykuwanpas otaq Dios sonqo kayniykuwanpas kay runata puririchiykuman karan jinataraq? 13  Ñaupa taytanchis Abrahanpa, Isaacpa, Jacobpa Diosninmi serviqnin Jesusta jatuncharan; paytan qankunaqa pisicharankichis, jinaspa enemigonkunaman entregarankichis wañuchinankupaq, Pilatoña kacharipuyta munaran chaypas. 14  Qankunan chay ch’uya, chanin runataqa pisicharankichis, jinaspa Pilatota valekurankichis runa wañuchiqta kacharipunasuykichispaq, 15  kausayman apaqtataq wañuchirankichis. Diosmi ichaqa kausarichimpuran, chay pasasqanmantaqa noqaykun testigo kayku. 16  Paypa sutinraykun, sutinpi iñisqaykurayku iman kay rikusqaykichis reqsisqaykichis runaqa qhaliyapun. Payrayku iñiyniyku kaqtinmi kay ñaupaykichispi qhaliyachisqa runaqa qhaliy-qhali kashan. 17  Wayqeykuna, noqaqa yachanin qankunapas umalliykichiskunapas mana yachaspa chaykuna ruwasqaykichista. 18  Chhaynapin Diosqa junt’aran Cristoq ñak’arinanmanta ñaupaqmantaña llapa profetakunawan willachisqanta. 19  ”Chhaynaqa juchaykichismanta pesapakuychis, jinaspa Diosman kutirikuychis juchaykichiskuna pichasqa kananpaq, chhaynapi kikin Jehová Dios samakuy tiempota chayachimunasuykichispaq, 20  qankunapaq churasqan Cristota kachamunasuykichispaqwan, chayqa Jesusmi. 21  Payqa janaq pachapin kanan tukuy imapas mosoqyachisqa kanan tiempokama, chaytan Diosqa willachiran ñaupa tiempopi ch’uya profetankunawan. 22  Moisespas niranmi: ‘Jehová Diosniykichismi wayqeykichiskuna ukhumanta noqa jina profetata jatarichipusunkichis. Qankunaqa paypa lliu imaymana nisqasuykichistan uyarinaykichis. 23  Pipas* chay profetata mana uyariqqa jujpaqkama wañuchisqan kanqa’, nispa. 24  Cristomantaqa* llapa profetakunan Samuelpa tiemponmantapacha sut’itapuni willaranku. 25  Qankunan profetakunaq wawankunaqa kankichis, allinniykichispaqtaqmi Diosqa ñaupa taytaykichiskunawan rimanakuran, paymi Abrahanta niran: ‘Mirayniykiraykun kay pachapi llapa familiakuna bendecisqa kanqa’, nispa. 26  Diosqa serviqninta jatarichispan qankunamanraq ñaupaqta kachamurasunkichis allinniykichispaq, chhaynapi mana allin ruwayniykichiskunamanta sapankaykichis t’aqakunaykichispaq”, nispa.

Uraypi willakuykuna

Griego rimaypiqa “isqon kaq hora” ninmi, chaytaqa yupaqku intiq lloqsimusqanmantapachan.
Chay columnakunaqa chimpa-chimpankan sayasharan, techoyoqtaqmi karanpas, chaupinqa calle jinan karan.
Chaypiqa “pi almapas” nillanmantaqmi.
Griego rimaypiqa “chay p’unchaykunamantaqa” ninmi.