Hechos 17:1-34

  • Pablowan Silaswan Tesalónica llaqtapi kasqanku (1-9)

  • Pablowan Silaswan Berea llaqtapi kasqanku (10-15)

  • Pabloq Atenas llaqtapi kasqan (16-22a)

  • Pablo “Areópago” nisqapi yachachisqanmanta (22b-34)

17  Paykunaqa Anfípolis llaqtanta, Apolonia llaqtanta pasaspan chayaranku Tesalónica llaqtaman, chaypin kasqa judiokunaq sinagogan.  Jinan Pabloqa imaynachus ruwallaqpuni jinata sinagogaman jaykuspa kinsa sábado paykunata allinta piensachiran Diospa simin qelqakunamanta yachachispa.  Pabloqa chay qelqakunata explicaspan rikuchiran imaynas Cristoqa ñak’arinanpuni karan chayta, imaynas wañuymantapas kausarichisqapuni kanan karan chaytawan, nirantaq: “Jesusmi chay Cristoqa karan, paymantan noqaqa willashaykichis”, nispa.  Jinan wakinqa iñipuranku, jinaspa Pablowan Silaswan juñukuyta qallariranku, chhaynatan ruwaranku Diosta adoraq griego runakunapas, paykunaqa askhallañan karanku, kaqllatataqmi ruwaranku allin respetasqa warmikunapas.  Wakin judiokunan ichaqa envidiakuspa, mercado plazapi mana imata ruwaspa puriykachaq mana allin runakunata askhata juñuranku, jinaspa llaqtapi ch’aqwata jatarichiranku. Paykunan Jasonpa wasinta phawaykuspanku Pablota Silastawan maskharanku llapa runakunaman orqomunankupaq.  Mana tarispankutaq Jasonta wakin iñiqkunatawan aysaranku llaqtapi kamachikuqkunaman, jinaspa qapariranku: “Pachantinpi llaqtakunata ch’aqwachiq runakunan kaymanpas chayaramusqaku,  Jasonmi paykunata wasinpi chaskisqa. Llapan kay runakunaqa Roma reypa* kamachikuyninkuna contran kashanku, paykunaq nisqanman jinaqa Jesussi reyqa”, nispa.  Chayta uyarispan llapa runakunapas llaqtapi kamachikuqkunapas ch’aqwaranku.  Jasonmanta juj iñiqkunamantapas garantía qolqetan mañaranku, chayta qoqtinkuñan paykunataqa kacharipuranku. 10  Chay tutapachan iñiqkunaqa Pablota Silastawan Berea llaqtaman kachapuranku. Paykunaqa chay llaqtaman chayaspa jinan judiokunaq sinagoganman jaykuranku. 11  Chay llaqtapi judiokunaqa Tesalónica llaqtapi kaqkunamantaqa aswan sumaq uyarikuqmi karanku, chaymi tukuy yuyaywan Diospa siminta chaskikuranku. Chay yachasqanku cheqaqpunichus kashan icha manachus chayta yachanankupaqtaq sapa p’unchay Diospa simin qelqata allintapuni estudiaqku. 12  Paykunamanta askhan iñipuranku, griego runakuna ukhumantapas askhan iñipuranku allin reqsisqa warmikuna qharikuna ima. 13  Berea llaqtapipas Diospa siminta Pabloq willashasqanta yacharuspankun Tesalónica llaqtapi kaq judiokunaqa jamuranku, jinaspa runakunata kallpacharanku chaypipas ch’aqwata jatarichinankupaq. 14  Jinan iñiqkunaqa Pablota jujkunawan kuskata lamar-qocha pataman kacharpariranku; Silaswan Timoteopiwanmi ichaqa chayllapi qhepakuranku. 15  Pablota compañaqkunaqa Atenas llaqtakaman riysiranku, chaypin Pabloqa paykunata niran: “Silaswan Timoteowan usqhaylla jamuchunku”, nispa, jinan paykunaqa kutipuranku. 16  Atenas llaqtapi Silasta Timoteotawan suyashaspan Pabloqa chay llaqtata rikuran idolokunawan junt’aykusqata, jinan sonqonraq t’impuriran. 17  Chaymantataq payqa sinagogaman jaykuran, chaypin judiokunata Diosta serviq juj runakunatawan yachachiran allinta piensachispa; mercado plazapi purishaq runakunatapas chhaynatan sapa p’unchay piensachiq. 18  Epicúreo* t’aqamanta yachayniyoqkunawan estoico* t’aqamanta yachayniyoqkunapiwanmi ichaqa paywan churanakuyta qallariranku, wakinmi nisharanku: “¿Imatataq kay laqlari rimayta munashan?”, nispa, jujkunataq nisharanku: “Waj dioskunamanta rimaq runachus jina”, nispa. Chaykunataqa niranku Jesusmanta kausarimpuymantawan allin willakuykunata willasqanraykun. 19  Jinan “Areópago”* nisqaman pusaranku, chaypin niranku: “¿Willawankikumanchu chay rimasqayki mosoq yachachikuymanta? 20  Noqaykuqa manan jayk’aqpas uyariraykuchu kay rimasqaykikunamantaqa. Chayraykun chaykunamanta yachayta munashayku”, nispa. 21  Llapa Atenas llaqtayoqkunapas waj llaqtakunamanta visitamuqkunapas mosoq yachachikuykunata willaspa uyarispa iman tiempota pasaqku. 22  Jinan Pabloqa Areópago chaupipi sayaykuspa niran: “Atenas llaqta runakuna, lliu imaymanapin reparani qankunaqa juj runakunamantapas astawanraq dioskunata manchakuq kasqaykichista. 23  Purishaspaymi imakunachus adorasqaykichiskunata allinta qhawasharani, chaypin rikumuni juj altarpi ‘mana reqsisqa Diospaq’ nisqa qelqasqata. Chay mana reqsispalla adorasqaykichis Diosmantan noqaqa willashaykichis. 24  Paymi kay pachata chaypi lliu kaqkunatapas ruwaq Diosqa, janaq pachaqpas kay pachaqpas Señorninqa; payqa manan runaq ruwasqan wasipichu tiyan, 25  nitaq runakunaq atiendenantapaschu suyan imatapas necesitanman jina, aswanmi pay runakunaman qon kausayta, samayta, tukuy imaymanatawan. 26  Paymi juj runallamanta llapa runatapas ruwaran kay pachantinpi tiyanankupaq, jinaspa imaymanapaq tiempota churaran, maypichus runakuna tiyananpaqpas señalaran. 27  Diosqa runakuna payta maskhanankutan munan, tutayaqpi llamikachakuspa jinaraq maskhanankuta, chhaynapi payta tarinankupaq, jinaspapas payqa manan sapankanchismantapas nishu karupichu kashan. 28  Pay kaqtinmi kausanchis, purinchis, kaypipas kashanchis; chaymantan wakin qelqaqkunapas niranku: ‘Paypa wawankunan noqanchispas kanchis’, nispa. 29  ”Chhaynaqa Diospa wawankunataq kanchis chayqa, manan Diosqa qorimanta, qolqemanta, rumimanta kananpaqchu piensananchis, payqa manan runaq ruwasqankuna jinachu. 30  Diosqa tukuy tiempon jinallata qhawaran runakuna mana yachaspa chaykuna ruwasqankuta, kunanmi ichaqa jinantinpi llapa runakunata nishan juchankumanta pesapakunankupaq. 31  Payqa ñan churanña juj p’unchayta kay pachantinta ajllasqan runawan chaninta juzgananpaq, chay juicio p’unchayqa chayamunqapunin ajllasqan runata kausarichimpusqanrayku”, nispa. 32  Wañusqakunaq kausarimpunanmanta uyarispan wakinqa burlakuyta qallariranku, wakintaq ichaqa niranku: “Chay nisqaykitaqa juj kutipiña uyarisaykiku”, nispa. 33  Jinan Pabloqa chaymanta ripuran, 34  wakin runakunan ichaqa payman juñukuranku, jinaspa iñipuranku. Paykunamanta wakinmi karan “Areópago” nisqapi kaq juez Dionisio, Dámaris sutiyoq warmi, juj runakuna ima.

Uraypi willakuykuna

Griego rimaypiqa “Cesarpa” ninmi. Chhaynatan sutichaqku Roma llaqtapi wakin reykunata.
Qhaway “explicasqa simikuna” nisqapi “epicúreo t’aqamanta yachayniyoqkuna” nisqata.
Qhaway “explicasqa simikuna” nisqapi “estoico t’aqamanta yachayniyoqkuna” nisqata.
“Areópago” nisqaqa Atenas llaqtapi juj moqon karan, chaypin umalli juezkunapas juñukuqku.