Hechos 14:1-28

  • Iconio llaqtapi iñiqkuna yapakusqanmanta, jark’asqa kasqankumantawan (1-7)

  • Listra llaqtapi dioskunapaq piensasqankumanta (8-18)

  • Pablota rumiwan ch’aqespa yaqa wañuchisqankumanta (19, 20)

  • Iñiq t’aqakunata kallpachasqankumanta (21-23)

  • Siriapi kaq Antioquiaman kutimpusqankumanta (24-28)

14  Iconio llaqtapin paykunaqa judiokunaq sinagoganman jaykuranku, chaypin allinta yachachiranku, jinan askha judiokuna griego* runakuna ima iñipuranku.  Mana iñiq judiokunan ichaqa waj nacionkunamanta runakunata tanqaranku Pablota Bernabetawan cheqnikunankupaq.  Chayraykun paykunaqa unayta chaypi qhepakuranku Jehová Diospa atiyninwan tukuy sonqo yachachispa. Paymi paykunaman atiyta qoran señalkunata admirakunapaq kaqkunatawan ruwanankupaq, chhaynapin Diosqa rikuchiran ancha sumaq sonqo kayninmanta paykunaq willasqankuqa cheqaq kasqanta.  Chay llaqtapi runakunan ichaqa t’aqanasqa kasharanku, wakinmi judiokunaq partenmanta kasharanku, wakintaq apostolkunaq partenmanta.  Chaymi judiokunaqa umallikunantin waj nacionmanta runakunapiwan paykunata maskhayta qallariranku mana allinta ruwanankupaq rumiwan ch’aqenankupaqwan.  Chayta yacharuspan paykunaqa ayqekuranku, jinaspa riranku Licaoniapi kaq Listra llaqtaman, Derbe llaqtaman, lliu muyuriqnintinmanwan.  Chaykunapin paykunaqa allin willakuykunata willasharanku.  Listra llaqtapin juj such’u runa tiyasharan, payqa such’uñan nacesqa, manapunin jayk’aqpas purisqachu.  Paymi Pabloq rimasqanta uyarisharan, jinan Pabloqa payta allinta qhawaykuran, qhaliyachisqa kananpaq iñiyniyoq kasqanta reparaspataq 10  fuerteta niran: “¡Sayariy!”, nispa. Jinan payqa p’itasparaq sayarispa puriyta qallariran. 11  Pabloq chay ruwasqanta rikuspan runakunaqa Licaonia rimaypi alto kunkawan niranku: “¡Dioskunan runaman tukuspa noqanchisman uraykamuwasqanchis!”, nispa. 12  Jinan Bernabeta Zeus* niranku, Pablotataq Hermes* niranku, pay masta rimasqanrayku. 13  Llaqta jaykunapin Zeus diospa templon kasharan. Jinan Zeuspa sacerdotenqa torokunata t’ika coronakunatawan llaqta punkuman apamuran, payqa runakunawan kuskan sacrificiota jaywayta munasharan. 14  Chayta yacharuspan apóstol Bernabewan apóstol Pablowanqa p’achankuta llik’ikuranku, jinaspa chay runakunaq kasqanman phawaykuspa fuerteta 15  niranku: “¿Imaraykun kayta ruwashankichis? Noqaykupas qankuna jina runakunallan kayku. Noqaykuqa allin willakuykunatan qankunaman willashaykichis, chhaynapi kay mana valeq kaqkunata saqespa kausaq Diosman kutirikunaykichispaq. Paymi ruwaran cielota, kay pachata, lamar-qochata, tukuy chaypi kaqkunatapas. 16  Ñaupa tiempopiqa manan runakunata jark’aranchu munasqankuman jinalla kausanankuta. 17  Chaywanpas payqa allinkunata ruwaspan reqsichikuran pichus kasqanta: parata parachimuspa, chajrakunata tiempollanpi ruruchispa, mijuytapas askhanpi qospa ima; chaykunawanmi sonqoykichistapas kusirichin”, nispa. 18  Chaykunata nispan paykunaqa ñak’ayta runakunata jark’aranku ama paykunaman sacrificiota jaywanankupaq. 19  Ichaqa Antioquía llaqtamanta Iconio llaqtamantawanmi judiokuna chayamuranku, paykunan runakunata kallpacharanku Pablo contra jatarinankupaq, jinan Pablota rumiwan ch’aqeykuranku, chaymantataq llaqta jawaman aysamuranku wañusqaña kananpaq piensaspanku. 20  Iñiqkuna payta muyuykuqtinmi ichaqa jatarispa llaqtaman jaykuran. Qhepantin p’unchaytaq Bernabewan kuska Derbe llaqtaman riranku. 21  Chay llaqtapin askha runakunata yanaparanku Jesuspa discipulon kanankupaq, chayta ruwaspataq kutipuranku Listra llaqtaman, Iconio llaqtaman, Antioquía llaqtamanwan. 22  Chay llaqtakunapi iñiqkunatan paykunaqa kallpacharanku iñiyninkupi qaqata sayanankupaq, khaynatan niranku: “Imaymanapi ñak’arispan Diospa gobiernonmanqa jaykusun”, nispa. 23  Chaymantapas umalliqkunatan* churaranku sapanka iñiq t’aqapi, ayunaspa mañakuspa imataq Jehová Diospa makinman jap’iykachiranku, paypi iñisqankurayku. 24  Chaymantataq Pisidia ladonta pasaspanku Panfilia provinciaman jaykuranku. 25  Perga llaqtapi Diospa siminta willaspankutaq Atalia llaqtaman jaykuranku. 26  Chaymantataq Antioquía llaqtaman barcopi kutipuranku, chaypin iñiqkunaqa paykunata Diosman jap’iykachisqaku sumaq sonqowan qhawarinanpaq, chhaynapi paypa qosqan llank’anata ruwanankupaq; chayta junt’aspan kunanqa kutipusharanku. 27  Antioquiaman chayaspan paykunaqa iñiq t’aqata juñuspa willaranku paykunawan Diospa lliu imaymana ruwasqanta, waj nacionkunamanta runakuna iñinankupaqpas punkuta kicharisqanmantawan. 28  Chaypin paykunaqa iñiqkunawan unayta tiyaranku.

Uraypi willakuykuna

Chaykunaqa griego rimaq mana judío runakunan kankuman karan.
Zeustaqa “Júpiter” nillaqkutaqmi.
Hermestaqa “Mercurio” nillaqkutaqmi.
Qhaway “explicasqa simikuna” nisqapi “umalliq” nisqata.