Hechos 11:1-30

  • Pedro apostolkunaman imakunachus willasqanmanta (1-18)

  • Barnabewan Saulopiwan Siriapi kaq Antioquiata risqankumanta (19-26)

    • Discipulokuna “cristiano” nispa sutichasqa kanku (26)

  • Yarqay kananta profeta Agaboq willasqanmanta (27-30)

11  Judeapi kaq apostolkunawan iñiqkunapiwanmi uyariranku waj nacionkunamanta runakunapas Diospa siminta chaskisqankumanta.  Chaymi Jerusalén llaqtaman Pedro chayamuqtinqa, waj nacionmanta runakuna qhari kaynin qarachata kuchuchikunankuta munaqkunaqa payta phiñakuranku:  “¿Cheqachu waj nacionmanta runakunaq wasinman jaykuranki, jinaspa paykunawan mijuranki? ¿Imaraykun chayta ruwaranki?”, nispa.  Jinan Pedroqa lliu imachus pasasqanta paykunaman willaran:  “Jope llaqtapi kashaspaymi Diosmanta mañakusharani, chayllamanmi juj rijuriypi rikuni cielomanta juj jatun tela jina tawantin ch’ullpanmanta jap’isqa uraykamushaqta, chayqa noqamanpunin jamushasqa.  Chayta qhawaykuqtiymi chaypi kashasqa imaymana animalkuna: tawa chakiyoqkuna, salqakuna, pampanta suchuqkuna, altonta phawaqkuna ima.  Chayllamanmi juj kunkata uyarini: ‘¡Pedro, chay animalkunata nak’aspa mijuy!’, nimuqta.  Jinan noqaqa nini: ‘Señor, amapuni chaytaqa niwaychu, noqaqa manapunin mijuymanchu ima qhelli kaqtapas ni ima millakuna kaqtapas’, nispa.  Chaymantan chay kunkaqa nimuwallantaq: ‘Ama “qhelli” niychu Diospa ch’uyanchasqan kaqkunataqa’, nispa. 10  Chay kunkaqa kinsa kutikaman rimapayamuwan, chaymantataq chay rikusqayqa cieloman oqarisqa karan. 11  Chay ratopachan kinsa qharikuna alojakusqayku wasiman chayamusqaku, paykunataqa juj runan Cesarea llaqtamanta kachamusqa noqa maskhaqta. 12  Jinan Diospa espiritunqa niwan: ‘Ama iskayaspa paykunawan riy’, nispa. Chaymi kay soqta wayqenchiskunawan kuska rirayku, jinaspa chay runaq wasinman jaykurayku. 13  ”Paypa willawasqankuman jinaqa, juj angelsi wasinpi payman rijurisqa, jinaspa nisqa: ‘Jope llaqtaman runakunata kachaspa “Pedro” nisqa Simonta wajachimuy, 14  paymi willasunki imakunata ruwaspas qanpas wasiykipi kaqkunapas salvasqa kawaqchis chayta’, nispa. 15  Paykunata rimapayayta qallarishaqtiymi santo espíritu paykunaman chayamuran, imaynan noqanchismanpas qallariypi chayamuran jinata. 16  Chay raton noqaqa yuyariruni Señorpa nisqanta, paymi niq: ‘Juanqa unullawanmi bautizaran, qankunan ichaqa santo espirituwan bautizasqa kankichis’, nispa. 17  Chhaynaqa, Señor Jesucristopi creeqkunaman gratislla qowasqanchis qokuynintataq paykunamanpas Dios qoshanman chayqa, ¿imaraykutaq noqari payta jark’ayman karan?”, nispa. 18  Chaykunata uyarispan paykunaqa manaña Pedrota phiñakurankuchu, aswanmi Diosta jatunchaspa ninakuranku: “Chhaynaqa, Diosqa munashasqamá waj nacionniyoq runakunapas juchankumanta pesapakuspa kausayman aypanankutaqa”, nispa. 19  Estebanta wañuchisqanku qhepata qatikachay kaqtin ch’eqerichisqa kaqkunaqa Fenicia llaqtaman, Chipre islaman, Antioquía llaqtaman iman chayaranku, paykunaqa judiokunallamanmi predicaranku. 20  Antioquía llaqtaman chayaq wakin iñiqkunan ichaqa Chipremanta Cirene llaqtamantawan karanku, paykunamanta wakinmi griego rimaq runakunaman Señor Jesusmanta allin willakuykunata willayta qallariranku. 21  Chaymantapas paykunawanmi Jehová Diosqa kasharan, chaymi askha runakuna iñipuranku, jinaspa Señorpa discipulon kapuranku. 22  Chaykunamanta yachaspan Jerusalenpi kaq iñiq t’aqaqa Bernabeta Antioquía llaqtaman kacharan. 23  Chayman chayaspan Bernabeqa rikuran Diosqa iñiqkunata sumaq sonqowan qhawarisqanta. Chaymi anchata kusikuspa llapankuta kallpacharan tukuy sonqowan Señorman jap’ipakushanallankupaq. 24  Bernabeqa allin runa, allin iñiqmi karan, santo espirituwanpas junt’an kasharan. Chaymi askha runakuna Señorpi iñipuranku. 25  Chayraykun Bernabeqa Tarso llaqtata riran tarinankama Saulota maskhaq. 26  Tarispataq Antioquía llaqtaman pusamuran. Paykunaqa juj wata junt’an chay llaqtapi iñiq t’aqawan juñukuranku, askha runakunamanmi yachachirankupas. Chay llaqtapin ñaupaqtaqa Jesuspa discipulonkunata “cristiano” nispa sutichakuran Diospa nisqanman jina. 27  Chay p’unchaykunapin wakin profetakuna Jerusalén llaqtamanta Antioquía llaqtaman jamuranku. 28  Paykunamanta jujninmi karan Ágabo, paymi espirituq kallpachasqan kaspa jinantinpi yarqay kananmanta willaran (chay yarqayqa karan Claudioq kamachikusqan tiempopin). 29  Chaymi iñiqkunaqa rimanakuranku imankuchus kasqanman jina Judeapi tiyaq iñiqkunaman yanapayta apachinankupaq. 30  Jinan paykunaqa juñusqankuta umalliqkunaman* apachiranku Bernabewan Saulowan ima.

Uraypi willakuykuna

Qhaway “explicasqa simikuna” nisqapi “umalliq” nisqata.