Hechos 1:1-26

  • Kay libro Teofiloman qelqasqa kasqanmanta (1-5)

  • Kay pachaq k’uchunkunakamaraq willakunanmanta (6-8)

  • Jesús cieloman oqarisqa kasqanmanta (9-11)

  • Discipulokuna juñukusqankumanta (12-14)

  • Judaspa rantinpi Matías ajllasqa kasqanmanta (15-26)

1  Teófilo, ñaupaq kaq libropin qelqamurayki qallariymantapacha janaq pachaman oqarisqa kasqan p’unchaykama Jesuspa imaymanakuna ruwasqanmanta yachachisqanmantawan;  manaraq janaq pachaman oqarisqa kashaspanmi ichaqa ajllasqan apostolkunata santo espirituq kallpachasqan kamachiran imakunatachus ruwanankupaq.  Ñak’arisqan qhepamanqa askha kutitan paykunaman rijuriran, chhaynapin sut’itapuni rikuchiran kausashasqanta. Tawa chunka p’unchay ukhupin askha kutita paykunaman rijuriran, jinaspa Diospa gobiernonmanta rimapayaran.  Paykunawan juñunasqa kashaspan Jesusqa kamachiran: “Aman Jerusalenmanta lloqsinkichischu, aswanpas Yayaq prometesqanta qankunaman willasqaytan suyashallankichis;  Juanqa unullawanmi bautizaran, qankunan ichaqa pisi p’unchaykunamanta santo espirituwan bautizasqa kankichis”, nispa.  Jesuswan wajmanta juñunakuspankun paykunaqa tapuranku: “¿Señor, wajmantachu Diospa gobiernonta Israelpi jatarichishanki?”, nispa.  Jinan Jesusqa paykunata niran: “Qankunaqa manan necesitankichischu chaykuna yachaytaqa, Yayallan ninman jayk’aqchus ima tiempopichus imapas kanantaqa.  Ichaqa atiytan chaskinkichis santo espíritu qankunaman chayamuqtin, jinan noqamanta willankichis Jerusalenpi, lliu Judeapi, Samariapi ima, jinallataq kay pachaq k’uchunkunakamaraq”, nispa.  Chaykunata nisqan qhepatataq discipulonkuna qhawashaqtin cieloman oqarisqa karan, chayllamanmi juj phuyu pakaruran, jinan paykunaqa manaña rikurankuñachu. 10  Jesús cieloman wichapushasqanta mana chinkachispa qhawashaqtinkun qonqaylla ladonkupi rijuriran yuraq p’achayoqkama iskay qharikuna. 11  Jinaspa paykunata niranku: “¿Galileamanta runakuna, imaraykun cielota qhawarayashankichis? Qankunamanta ripuspa cieloman oqarisqa Jesusqa imaynan ripushan chhaynallataqmi kutimunqa”, nispa. 12  Jinan paykunaqa Olivos orqo nisqamanta Jerusalén llaqtaman kutipuranku, chay orqoqa Jerusalén llaqta qayllallapin kasharan, juj sábado p’unchay purinapi jinalla.* 13  Chayman chayaspataq alojakusqanku cuartoman seqaranku. Chaypiqa kasharanku: Pedro, Juan, Santiago, Andrés, Felipe, Tomás, Bartolomé, Mateo, Alfeoq wawan Santiago, “tukuy sonqowan ruwaq” nisqa Simón, Santiagoq wawan Judas iman. 14  Llapankun juj sonqolla Diosmanta mañakusharanku, paykunawan kuskan mañakusharanku wakin warmikunapas, Jesuspa maman Mariapas, wayqenkunapas. 15  Chay p’unchaykunapi pachaj iskay chunka jina iñiqkuna juñunasqa kashaqtinkun Pedroqa sayarispa niran: 16  “Wayqeykuna, Diospa simin qelqapin Davidqa santo espirituq yuyaychasqan kaspa Judasmanta qelqaran. Chay Judasmi Jesús jap’iqkunata pusaran; chay qelqasqaqa junt’akunanpunin karan 17  chay Judas noqaykuwan yupasqa kasqanrayku, kay llank’aypi kasqanrayku ima. 18  (Pay kikinmi mana allin ruwasqanmanta pagasqanku qolqewan allpata rantiran, umachakimpanmanta urmaykuqtintaq lliu cuerpon phataran, jinan lliu wijsan tallikuran. 19  Chaytaqa Jerusalén llaqtapi lliu tiyaqkunan yachanku, chaymi chay allpata rimayninkupi ninku “Akeldama” nispa, chayqa “yawar pampa” ninantan nin.) 20  Salmos qelqapin qelqasqa kashan: ‘Alojakunan wasi ch’usaq kapuchun, amaña pipas chaypiqa tiyachunchu’, nispa. Chaypiqa nillantaqmi: ‘Jujkunata qhawarinanpaq churasqa kayninpi juj churasqa kachun’, nispa. 21  Chhaynaqa, Señor Jesús noqaykuwan kashaspa imachus ruwanankunata ruwasqan tiempopi mayqen qharikunachus puriysiwaranku, paykunamanta jujnin jaykuchun Judaspa rantinta, 22  chay qhariqa Jesuspa Juanwan bautizachikusqanmantapacha cieloman oqarisqa kasqan p’unchaykama noqaykuwan kuska puriqmi kanan; chay qhari noqaykuwan kuska testigo kachun Jesuspa kausarimpusqanmanta”, nispa. 23  Chaymi paykunaqa iskay qharikunata ajllaranku, jujninmi karan “Barsabás” nisqa José, paytan “Justo” nillaqkutaq; jujnintaq karan Matías. 24  Jinan Diosmanta mañakuranku: “Jehová Diosniyku, qanqa yachankin lliu runaq sonqonpi imachus kasqanta, chayrayku qanyá niy kay runakunamanta mayqentachus ajllakunki chayta, 25  chhaynapi Judaspa rantinta kay llank’aypi kananpaq apóstol kananpaqwan, chay ruwaymantan Judasqa t’aqakapuran munasqanman jina purinanpaq”, nispa. 26  Jinaspan paykunaqa sortearanku, jinan Matías ajllasqa karan, chaymi payqa chunka jujniyoq apostolkunawan yupasqa kapuran.

Uraypi willakuykuna

Sábado p’unchay purinaqa karan juj kilómetro jinallan, chhaynallatan judiokunaqa purinanku karan sábado p’unchaypiqa.