Hebreos 9:1-28

  • Kay pachapi Diospa karpanmanta (1-10)

  • Cristo yawarninwan janaq pachaman jaykusqanmanta (11-28)

    • Mosoq rimanakuypin yanapakuran (15)

9  Ñaupaq kaq rimanakuypiqa karanmi Diosta imaynata adoranapaq kamachikuykuna, payta adoranapaq ch’uya karpapas kay pachapin kasharan.  Chay karpataqa iskayman t’aqasqatan ruwakuran, ñaupaq kaq cuartotan nikuran “ch’uya parte” nispa; chaypin kasharan juj candelero,* juj mesa, Diosman jaywasqa t’antakunapas.  Iskay kaq cortinaq qhepanpitaq kasharan iskay kaq cuarto, chaytan nikuran “ch’uyay-ch’uya parte” nispa.  Chaypin kasharan qorimanta incienso ruphachina, qoriwan lliu forrasqa rimanakuy arca ima; chay arca ukhupitaq kasharan “maná” nisqa mijuyniyoq qori p’uyñucha, Aaronpa ch’ijchimuq varan, p’alta rumikunapi qelqasqa rimanakuy simipiwan;  chay arca patapitaq kasharan k’ancharishaq querubinkuna,* chay querubinkunan llanthuqku allipunachiq tapata. Ichaqa manan lliu chaykunamanta rimana tiempochu kunanqa.  Lliu chaykuna ruwasqaña kaqtinmi sacerdotekunaqa sapa kuti karpapi kaq ñaupaq kaq parteman jaykuqku Diospaq llank’anankuwan junt’aq;  iskay kaq partemanmi ichaqa uma sacerdotella watapi juj kutita jaykuq, chayman jaykuspaqa yawar apaykusqallapunin jaykuq, chay yawartan chaypi sut’uchiq paypa juchanmanta, runakuna mana yuyaypichu juchallikusqankumantawan.  Chaywanmi santo espirituqa sut’ita rikuchisharan chay ñaupaq kaq karpa kashaqtinqa ch’uyay-ch’uya parteman jaykunaqa manaraq kichasqachu kasqanta.  Chay karpaqa imakunachus kunan tiempopi kashanña chaykunaq rijch’aynillanmi karan. Kunankamapas jaywakushallanmi ofrendakunata sacrificiokunatapas, ichaqa manan chaykunaqa atinmanchu Diosta serviqkunaq conciencianta lliupi ch’uyaman tukuchiytaqa. 10  Jinaspapas chaykunaqa mijunamanta, ujanamanta, imaymana ch’uyanchanamanta imallan karan. Chaykunaqa cuerpopaq kamachikuykunallan karan, chaymantapas chaykunaqa tukuy imatapas allinyachinapaq chayamunan tiempokamallan kanan karan. 11  Criston ichaqa ima allinkunachus pasashanña chaykunamanta uma sacerdote kananpaq jamuspa aswan jatun aswan allin karpaman jaykuran, chay karpaqa manan runakunaq ruwasqanchu, manataqmi kay pachamantapaschu. 12  Chaymantapas ch’uyay-ch’uya parteman jaykuspaqa manan cabrakunaq ni malta torokunaq yawarninta apaykuspachu jaykuran, aswanmi jujpaqkama pay kikinpa yawarninwan jaykuran, chhaynapin wiñaypaq salvapuwaranchis. 13  Cabrakunaq torokunaq yawarninpas, malta waka usphapas qhelli kashaq runaman ch’aqchusqa kaqtinqa ch’uyanchaqtaq chay runata chayqa, 14  astawanraqchá riki Cristoq yawarninqa yanqa ruwaykunamanta conciencianchista ch’uyanchanqa, chhaynapi kausaq Diosta servinanchispaq. Chaymantapas wiñay-wiñaypaq espirituq pusasqanmi payqa mana ima qhelliyoq sacrificio jina Diosman entregakuran. 15  Chaymi payqa mosoq rimanakuypi yanapakuq kapuran, chhaynapi wajasqa kaqkuna wiñay herencia promesata chaskinankupaq. Wañusqanwanmi chaykunataqa ruwaran, wañusqanwanmi ñaupaq rimanakuypi juchallikuqkunatapas preciowan libraran. 16  Ima rimanakuypas kaqtinqa wañunanmi chay rimanakuyta ruwaq runaqa, 17  chay runa wañullaqtinmi chay rimanakuyqa valenman, mana chayqa mana valorniyoqmi kanman. 18  Ñaupa rimanakuypas yawar jich’akusqanwanmi valorniyoqqa karan.* 19  Chay pachan Moisesqa llapa llaqtantin runakunaman kamachikuy simipi lliu kamachikuykunata willaran, chaymantataq malta torokunaq yawarninta cabrakunaq yawarnintawan unuwan chaqruran, hisopo k’aspiman k’anchaq puka millmata k’uyuspataq, chaywan chay yawarta ch’aqchuran rimanakuy qelqaman llapa runakunaman ima. 20  Jinaspa niran: “Kay yawarqa Dioswan rimanakuyta valechiq yawarmi, payqa chay rimanakuywan junt’anaykichistan munan”, nispa. 21  Payqa ch’aqchullarantaqmi yawartaqa karpamanpas Diosta servinapaq serviciokunamanpas. 22  Kamachikuy simiq nisqanman jinaqa, yaqa llapanmi yawarwan limpiakuq; manachus yawar jich’akunman chayqa, manan ima juchapas perdonasqachu kanman. 23  Chhaynaqa, janaq pacha kaqkunaq rijch’ayninqa chay sacrificiokunawanmi ch’uyanchasqa kanan karan, janaq pacha kaqkunapaqmi ichaqa aswan allin sacrificiokuna ruwakunan karan. 24  Cristoqa manan runakunaq ruwasqan ch’uyay-ch’uya partemanchu jaykuran, chay parteqa janaq pacha kaqkunaq copiallanmi, aswanpas kikin janaq pachamanmi payqa jaykuran, chhaynapi noqanchisrayku Diospa ñaupanpi presentakunanpaq. 25  Chaymantapas uma sacerdoteqa sapa watanmi ch’uyay-ch’uya parteman jaykuq animalkunaq yawarnin apaykusqa; Criston ichaqa mana sapa kutichu sacrificiopi entregakuran, 26  mana chayqa, runakuna mirayta qallarisqanmantapachachá askha kutita ñak’arinan kanman karan. Aswanmi payqa kay tukukuy tiempopi juj kutillata rijurimuspa sacrificiopi entregakuran juchata chinkachinanpaq. 27  Imaynan runakunaqa ch’ulla kutillata wañunku, chay qhepamantaq juzgasqa kanku, 28  chhaynatan Cristopas juj kutillata wañuran askha runakunaq juchanta apapunanpaq; wajmanta rijurimuspaqa manañan juchata apapunanpaqchu rijurimunqa, aswanpas pikunachus tukuy sonqowan payta suyashanku chaykunata salvananpaqmi rijurimunqa.

Uraypi willakuykuna

Chay candeleroqa mechero churana qanchis makiyoqmi karan.
Querubinkunaqa allin puestoyoq angelkunan.
Griego rimaypiqa “inaugurakuran” ninmi.