Hebreos 8:1-13

  • Diospa karpan janaq pacha kaqkunaq rijch’aynin kasqanmanta (1-6)

  • Ñaupa rimanakuymanta, mosoq rimanakuymantawan (7-13)

8  Chhaynaqa, tukuy chaykuna nimusqaykumanta aswan allinqa kaymi: Uma sacerdotenchisqa janaq pachapin jatun Diospa paña ladonpi tiyashan,  cheqaq karpapi kaq “ch’uya” nisqa partepitaqmi servishanpas,* chay karpataqa Jehová Dios kikinmi churaran, manan runachu.  Uma sacerdotekunaqa llapankun ofrendakunata sacrificiokunatawan jaywanankupaq churasqa kanku, chaymi chay uma sacerdotenchispas juj sacrificiota jaywanan karan.  Kay pachapichus pay kashanman chayqa, manachá payqa sacerdotechu kanman. Ñataq kay pachapi kamachikuy simiq nisqanman jina ofrendakunata jaywaq sacerdotekuna kashanmanña chayri, imapaqñataq payqa sacerdote kanman.  Chay runakunaq Diosta servisqankun ichaqa janaq pacha kaqkunaq rijch’aynillan, chaykunaq llanthun imalla; Moisespa ruwasqanpas chhaynan karan, paytan Diosqa juj karpata ruwananpaq kamachishaspa niran: “Lliu imatapas orqopi rikusqayki kikintapunin ruwanki”, nispa.  Jesusmi ichaqa chay uma sacerdotekunamanta aswan allin llank’anata chaskin, payqa aswan allin rimanakuy ruwakusqanpi yanapakuqmi karan, chay rimanakuyqa imatachus kamachikuypi nin chayman jinan aswan allin promesakunapi tajachisqa kashan.  Chay ñaupaq kaq rimanakuychus tukuy imapi junt’asqa kanman karan chayqa, manañachá kanmanchu karan iskay kaq rimanakuyqa.  Diosqa llaqtaq juchanta rikuspan simin qelqapi niran: “‘¡Qhawariychis! Tiempon chayamunqa’ ninmi Jehová Dios, ‘chaypachan noqaqa Israel llaqtawan Judá aylluwan ima mosoq acuerdota* ruwasaq.  Chay acuerdoqa manan imaynan ñaupa taytankuwan Egipto llaqtamanta makinkumanta pusamushaspay rimanakurani chhaynachu kanqa; paykunaqa manan junt’arankuchu paykunawan rimanakusqayta, chaymi noqaqa manaña paykunapi interesta churaranichu’, nispan nin Jehová Dios”, nispa. 10  Nillantaqmi: “‘Chay p’unchaykuna qhepatan noqaqa Israel llaqtawan rimanakusaq. Paykunaq yuyayninmanmi kamachikuyniykunata churasaq, sonqonkupin chaykunata qelqasaq. Noqan paykunaq Diosninku kasaq, paykunataq llaqtay kanqaku’ ninmi Jehová Diosqa”, nispa. 11  Nillantaqmi: “‘Paykunaqa manañan llaqtamasinkutapas ni wayqenkutapas ninqakuñachu: “¡Reqsiy Jehová Diosta!”, nispa. Llapankun paykunaqa juch’uypas kuraqpas reqsiwanqaku, 12  mana allin ruwasqankutapas perdonapusaqmi, manañataqmi juchankutapas yuyarisaqñachu’ ninmi Diosqa”, nispa. 13  “Mosoq acuerdo” nisqanwanmi payqa ñaupaq kaqta mauk’ayachipusharan. Imapas mauk’aman tukupuqqa thantayapunmi ¿riki? Chinkapunanpaqñataqmi kashanpas.

Uraypi willakuykuna

Chaypiqa “runakunarayku servishanpas” nillanmantaqmi.
Chaypiqa “mosoq rimanakuyta” nillanmantaqmi.