Hebreos 7:1-28

  • Melquisedecqa paylla reypas sacerdotepas kasqanmanta (1-10)

  • Cristoqa aswan jatun uma sacerdote kasqanmanta (11-28)

    • Cristoqa atiyniyoqmi lliuta salvananpaq (25)

7  Chay Melquisedecqa Salem llaqtapin rey karan, ancha jatun Diospa sacerdotentaqmi karanpas; paymi Abrahanwan tupaq lloqsimuran Abrahán waj reykuna wañuchisqanmanta kutimpushaqtin, jinaspa payta bendeciran,  Abrahantaq maqanakuypi llapa qechumusqanmanta chunka kaq parteta payman qoran. Paypa sutinqa “chanin rey” ninantan nin, chaymantapas payqa Salem* llaqta reytaq karan chayqa, “thaj kayta qoq rey” nispan paytaqa nikullanmantaq.  Paymantaqa manan yachakunchu pichus taytan karan chayta ni pichus maman karan chaytapas, manallataqmi yachakunchu pikunachus ñaupa taytankuna karan chaytapas, chaymantapas paypaqa manan ni qallariyninpas ni tukukuyninpas kanchu; ichaqa Diospa Churin jina ruwasqa kaspan wiñaypaq sacerdote kapun.  May jatunpunin chay runaqa karan, chaychá Abrahanpas ñaupa taytanchisña karan chaypas, guerrapi qechumusqanmanta allichachaqkunata chunka kaq parteta payman qoran.  Kamachikuy simiq nisqanman jinaqa Levipa wawankunan sacerdote kanankupaqqa churasqa karanku, paykunataqmi llaqtamantaqa diezmota chaskinanku karan, arí, wayqenkunallamantataqmi chaskinanku karan, paykunapas Abrahanpa wawankunaña karanku chaypas.  Chay runan ichaqa manaña Leví ayllumantachu karan chaypas, promesakunata chaskiq Abrahanmanta diezmota chaskiran, chaymantataq payta bendeciran.  Yachasqanchis jinapas, kuraq kaqmi sullk’a kaqtaqa bendecin ¿riki?  Chaymantapas, diezmota chaskiq Leví runakunaqa wañuq runakunallan karanku, chay juj kaq runan ichaqa kausashallan, chaytan Diospa simin qelqa willan.  Chhaynaqa, Abrahanpa qosqan diezmoqa diezmota chaskiq Levipa qosqan diezmopas kanman jinan karan. 10  Ichaqa Melquisedec Abrahanwan tupaq lloqsimushaqtinqa manaraqmi Leviqa karanchu, chaywanpas ñaupa taytan Abrahanpin payqa kasharan. 11  Leví ayllullamanta sacerdotekuna kanantaqa kamachikuy simipin niran; ichaqa paykunawanchus runakuna juchankumanta limpiasqa kankuman karan chayqa, ¿necesitakunmanraqchu karan Melquisedec jina juj sacerdoteta? ¿Manachu Aarón jina sacerdotekunallawanña imapas ruwakunman karan? 12  Cambiakushantaq sacerdotekuna chayqa, cambiakunallantaqmi kamachikuy simipas. 13  Kay rimasqanchis runaqa waj ayllumantan jamuran, chay ayllumanta runakunaqqa manan ima ruwanankupas altarpiqa karanchu. 14  Arí, Señorninchisqa Judá ayllumantan karan, manataqmi Moisesqa willaranchu chay ayllumanta ima sacerdotepas kanantaqa. 15  Chaymi aswan allinta rikukun Melquisedec jina juj sacerdote jatarisqanwan. 16  Payqa chhayna sacerdote karan manan piqpa mirayninmantachus jamunan karan chay kamachikuykunaman jinachu, aswanpas mana tukukuq kausayta qoq atiywanmi. 17  Paymanta rimaspan juj partepi nin: “Melquisedec jina sacerdoten qanqa kanki, wiñaypaqtaqmi sacerdote kankipas”, nispa. 18  Chhaynapin ñaupa kamachikuyqa tukuchisqa kapun, chay kamachikuy pisi kallpa mana atiyniyoq kasqanrayku. 19  Kamachikuy simiqa manan Diospa tukuy ima munasqantachu junt’achiran; Diospa suyakuy apamusqanmi ichaqa aswan allin, chay suyakuymi Diosmanpas achhuykachiwanchis. 20  Juramentota ruwaspan Diosqa Jesusta churaran sacerdote kananpaq. 21  Wakin runakunaqa mana juramentollawanmi sacerdotekuna karanku, Jesusmantan ichaqa juj juramentota ruwakuran, arí, Diosmi paymanta niran: “Noqa Jehová Diosmi jurani, manan imachus piensasqaytaqa cambiasaqchu, ‘qanqa wiñaypaq sacerdoten kanki’”, nispa. 22  Chayraykun Jesusqa aswan allin rimanakuymanta* garantía karan. 23  Chay juj sacerdotekunaqa wañuq kasqankuraykun jujñataq-jujñataq jaykuranku sacerdote kanankupaq, 24  Jesusmi ichaqa wiñaypaq kausaq, chaymi payqa mana necesitanchu pipas rantinpi jaykuqta. 25  Chaymantapas payqa atiyniyoqmi llapa paypa sutinpi Diosmanta mañakuqkunata salvananpaq.* Jinaspapas, wiñaypaqtaq kausanqa chayqa, chaypipunin kashanqa paykunapaq Diosmanta rogapunanpaq. 26  Chhayna uma sacerdotetapunin noqanchisqa necesitasharanchis; payqa junt’aq sonqo, mana ima juchayoq, mana ima qhelliyoq iman, t’aqasqan kashan juchasapakunamantapas; cielomantapas aswan altomanraqmi jatunchasqapas kashan. 27  Chaymantapas chay uma sacerdotekunaqa sapa p’unchaymi sacrificiokunata jaywaqku, ñaupaqtan paykunaq juchankumanta jaywaqku, chaymantataq llaqtaq juchanmanta; Jesusmi ichaqa mana chaytaraqchu ruwan, aswanmi payqa ch’ulla kutillata pay kikin sacrificiopaq entregakuran, chhaynapi wiñaypaq runakunata yanapananpaq. 28  Kamachikuy simiq nisqanman jinaqa juchasapa runakunallan uma sacerdote kanankupaq churasqa karanku, kamachikuy simi qhepamanña juramento ruwakusqanman jinan ichaqa Diospa Churin uma sacerdotepaq churasqa karan, payqa wiñaypaq ch’uyanchasqan karan.

Uraypi willakuykuna

“Salem” sutiqa “thak kay” ninantan nin.
Chaypiqa “acuerdomanta” nillanmantaqmi.
Chaypiqa “junt’asqata salvananpaq” nillanmantaqmi.