Hebreos 6:1-20

  • Iñiypi allin poqosqa kayman chayanamanta (1-3)

  • Iñiymanta t’aqakuqkunaqa wajmantan Diospa Churinta k’aspiman clavashanku (4-8)

  • Suyakuyninchisqa tukukuykaman allinpuni kanan (9-12)

  • Diospa promesan cheqaq kasqanmanta (13-20)

    • Diospa promesanpas juramento ruwasqanpas manan cambianchu (17, 18)

6  Ñataq Cristomanta qallariy yachachikuykunata yachanchisña chayqa, kallpachakusunyá iñiypi allin poqosqa kayman chayananchispaq. Amaña wajmantaqa kutisunchu qallariy yachachikuykunaman, arí, amaña kutisunchu yanqa ruwaykunamanta* pesapakuy yachachikuyman, Diospi iñiymanta yachachikuyman,  bautismokunamanta yachachikuyman, jujkunaman maki churanamanta yachachikuyman, wañusqakunaq kausarimpunanmanta yachachikuyman, wiñaypaq juzgasqa kaymanta yachachikuymanpas.  Ichaqa, Dios munallaqtinmi iñiypi allin poqosqa kaymanqa chayasunchis.  Pipas Diospa k’anchaykusqan kashaspa, janaq pachamanta jamuq regalota chaskishaspa, santo espirituta chaskishaspa,  Diospa sumaq siminta yachashaspa, jamuq tiempopi mosoq kausaywan tupaq bendicionkunatapas chaskishaspa  iñiymanta t’aqakuqtaqa manañan atikunmanchu juchanmanta pesapakunanpaq yuyayman kutichiytaqa; chhayna runakunaqa wajmantan paykuna kikinku Diospa Churinta k’aspiman clavashanku, jinaspa lliupa ñaupanpi p’enqayman churashanku.  Sapa kuti parasqanqa Diospa bendicionninmi allpapaqqa, chay parata ch’onqaspan allpaqa chajra llank’aqman allin cosechata qon.  Kiskakunata kisakunata wiñachiq allpan ichaqa mana imapaqpas valenchu, ñakasqa kananpaqñataqmi kashanpas; tukukuypiqa kanapusqan kanqa chay allpaqa.  Munakusqay wayqe-panaykuna, chhaynataña rimamushayku chaypas, allintan yachayku iñiymanta t’aqakuqkunamantaqa aswan allintapuni qankunaqa kausashasqaykichista, chhayna kausasqaykichismi apasunkichis salvasqa kayman. 10  Diosqa chaninpunin, payqa manapunin qonqanqachu imachus ruwasqaykichista sutinta munakusqaykichistapas, chaytan qankunaqa rikuchishankichis iñiqmasikunata kunankama servispa. 11  Ichaqa maytan munaykuman sapankaykichispas qallariypi jina llank’ashanaykichista, chhaynapi suyakuyniykichisqa tukukuykama allinpuni kananpaq, 12  ama qellaman tukunaykichispaqwan; munallaykumantaqmi iñiywan pacienciawan ima promesata chaskiqkuna jina kanaykichistapas. 13  Diospa sutinmantaqa manan ima sutipas aswan jatunqa kanchu, chaymi Abrahanman juj promesata ruwashaspaqa pay kikinpa sutinpi juraran: 14  “Bendiciontaqa churasaykipunin, mirayniykitapas askhayachisaqpunin”, nispa. 15  Chay promesataqa pacienciawan suyakusqan qhepatañan Abrahanqa chaskiran. 16  Pipas juj promesata ruwaspaqa aswan importante runaq sutinpin juran, chhaynapi ima nisqanpas cheqaq kasqanta rikuchinanpaq, chhaynapitaq ama ima jap’inakuypas kananpaq. 17  Chhaynatan Diospas ruwaran, imachus munasqan mana cambiaq kasqanta rikuchinanpaqmi promesa chaskiqkunaman juj juramentota ruwaran. 18  Diospa chay iskay ruwasqanqa* manapunin jayk’aqpas cambianmanchu, manataqmi Diosqa jayk’aqpas llullakunmanchu; chaykunan noqanchis Diospa pakaykusqanman ayqeqkunataqa allinta kallpachawanchis, chhaynapi ñaupanchispi kaq suyakuyman qaqatapuni jap’ipakunanchispaq. 19  Chay suyakuyqa ancla jinan noqanchispa vidanchispaq,* cheqaqpunitaqmi mana kuyuriqtaqmi kanpas; chay suyakuyninchismi cortina ukhumanpas jaykun 20  maymanchus ñaupaqta puriq noqanchisrayku jaykuran chayman, chay ñaupaqta puriqqa Jesusmi; paymi Melquisedec jina uma sacerdote kapun, wiñaypaqtaqmi kanqapas.

Uraypi willakuykuna

Griego rimaypiqa “wañusqa ruwaykunamanta” ninmi.
Chay iskay ruwayqa Diospa promesanwan juramento ruwasqanpiwanmi.
Chaypiqa “almanchispaq” nillanmantaqmi.