Hebreos 4:1-16

  • Manan imawanpas jark’achikunachu Diospa samanan p’unchayman jaykunapaqqa (1-10)

  • Diospa samanan p’unchayman jaykunapaq kallpachakusun (11-13)

    • Diospa siminqa kausashaqmi (12)

  • Jesús ancha jatun uma sacerdote kasqanmanta (14-16)

4  Chhaynaqa, kanraqtaq Diospa samanan p’unchayman jaykunapaq promesa chayqa, allinta cuidakuychis, chaytaq mayqenniykichispas mana chayman jaykunaykichispaq jinachu kawaqchis.  Imaynan paykunamanpas allin willakuykuna willasqa karan, chhaynan noqanchismanpas allin willakuykuna willasqa kallarantaq; ichaqa paykunaq iñiyninqa manan pikunachus kasukuq karanku chaykunaq iñiynin jinachu karan, chaymi paykunapaqqa yanqapaq karan chay willakuykunaqa.  Noqanchis iñiqkunaqa jaykusunmanmi chay samana p’unchayman; paykunamantan ichaqa Dios nin: “Chaymi renegaypi jurarani: ‘Paykunaqa manan samanay p’unchayman jaykunqakuchu’, nispay”, nispa. Diosqa ruwananta tukuspan runaq qallariyninmantapacha* samashan.  Juj partepin qanchiskaq p’unchaymanta pay niran: “Diosqa qanchis kaq p’unchaypin tukuy ima ruwasqanmanta samaran”, nispa.  Chaymantapas nillarantaqmi: “Paykunaqa manan samanay p’unchayman jaykunqakuchu”, nispa.  Chhaynaqa, ñaupaqpi allin willakuykunata uyariqkunaqa mana kasukuq kasqankuraykun mana jaykurankuchu chay samana p’unchayman, chaywanpas wakinqa atinmanraqmi chayman jaykuyta.  Chaymi unay tiempo qhepaman, ñaupaqpi nimusqay jina, Diosqa Davidpa salmo takinpi wajmanta niran: “Kunanchus kunkayta uyarinkichis chayqa, ama sonqoykichista k’ulluyachiychischu”, nispa; chaypi “kunan” nisqanwanmi payqa juj samana p’unchaymanta rimasharan.  Josuechus paykunata chay samayman pusanman karan chayqa, manachá Diosqa juj p’unchaymantaqa rimanmanñachu karan.  Chhaynaqa, Diospa llaqtanpaqqa kanraqmi samanapaq juj sábado p’unchay. 10  Pipas Diospa samanan p’unchayman jaykuqqa, tukuy ima ruwananmantan samanan, imaynan Diospas llank’ananmanta samaran jinata. 11  Chayrayku, tukuy atisqanchista kallpachakusun chay samana p’unchayman jaykunanchispaq, mana chayqa paqtapas paykuna jina mana kasukuqman tukusunman. 12  Diospa siminqa kausashaqmi, atiyniyoqtaqmi kanpas, iskay filoyoq espadamantapas aswan filollañan; ukhukaman jaykun almatawan espiritutawan t’aqarparinankamaraq, moqo-moqotapas chilinatapas t’aqarparinankamaraq; sonqoq ima munasqantapas ima piensasqantapas allintan reparan. 13  Diospa ñawinpaqqa manan ima kamasqapas pakasqachu kashan, aswanpas llapanmi cuenta qonanchis Diospa ñawinpaqqa alayrillapi kashan, sut’i rikuyllataqmi kashanpas. 14  Ancha jatun uma sacerdotenchisqa Diospa Churin Jesusmi, payqa janaq pachamanmi jaykun; chayrayku rimashallasun paypi iñisqanchismanta. 15  Chay uma sacerdotenchisqa allintan yachan mayninpi pisipananchista, chaymi khuyapayakuq noqanchiswan; chaymantapas pay kikinmi noqanchis jina imaymana pruebakunata pasaran, ichaqa manan jayk’aqpas juchallikuranchu. 16  Chayrayku achhuykusun* ancha sumaq sonqowan qhawariq Diospa trononman, jinaspa ama manchakuspa paymanta mañakusun, chhaynapi yanapanata necesitashaqtinchis pay khuyapayawananchispaq ancha sumaq sonqowan qhawariwananchispaqwan.

Uraypi willakuykuna

Chaypiqa rimashan Adán Evaq wawankunamantan.
“Achhuykuy” simitaqa “asuykuy, qayllaykuy otaq chimpaykuy” nillankutaqmi.