Hebreos 2:1-18

  • Tukuy yuyayta churanamanta (1-4)

  • Diosqa tukuy imatan Jesuspa chaki sarunanman churan (5-9)

  • Jesusmanta wayqenkunamantawan (10-18)

    • Umalli kaq Diospa wawankunata salvan (10)

    • Khuyapayakuq uma sacerdote (17)

2  Chaymi noqanchisqa tukuy yuyayninchista churananchis imakunatachus uyariranchis chaykunaman, chhaynapi ama jayk’aqpas allin ñanmanta pantanapaq.  Angelkunawan willachisqa simiqa cheqaqmi karan, llapa juchallikuqpas llapa mana kasukuqpas chanin kaqman jinan castigasqa karan.  Sichus noqanchispas chhayna jatun salvacionmanta willakuyman mana cuentatapas churasunchu chayqa, manan ayqekusunchu castigomantaqa. Salvasqa kanamanta willakuytaqa Señorninchismi ñaupaqtaqa willaran, chay willasqanta uyariqkunataq noqaykuman willawaranku.  Diospas llank’asharanmi chay willakuypiqa imaymana señalkunata ruwaspa, admirakunapaq kaqkunata ruwaspa, imaymana milagrokunata* ruwaspa, santo espirituta munayninman jina rakispa ima.  Payqa manan angelkunatachu churaran jamuq pachata kamachinanpaqqa, chay jamuq pachamantan noqaykuqa rimashaykupas.  Juj kutinmi juj testigo niran: “¿Pitaq runari payta yuyarinaykipaq? ¿Pitaq runaq churinpasri payta qhawarinaykipaq?  Paytaqa angelkunamanta juj chikan pisi atiyniyoqmanmi tukuchiranki, ichaqa qhapaq kaywan jatunchaywan iman coronawan jina churaranki, makiykiq llapa ima ruwasqanmanta encargakunanpaqtaqmi churarankipas.  Tukuy imatan paypa chaki sarunanman churaranki”, nispa. Arí, tukuy imatan Diosqa paypa chaki sarunanman churaran, manan imapas qheparanchu, chaywanpas manaraqmi payqa tukuy imatachu kamachishan.  Ichaqa angelkunamanta juj chikan pisi atiyniyoqman tukuchisqaña karan chaypas, qhapaq kaywan jatunchaywan iman Jesusqa coronawan jina churasqa kashan, chaytan payqa chaskiran ñak’arispa wañusqanrayku; arí, Diospa ancha sumaq sonqo kayninpin payqa llapa runarayku wañuran. 10  Tukuy imapas Diospa kamasqanmi, payta jatunchanapaqtaqmi kanpas. Payqa allinpaqmi rikuran umalli kaq ñak’arinanta, chhaynapi askha wawankuna jatunchasqa kananpaq. Chhaynapin chay umalli kaqqa preparasqa karan Diospa chay wawankunata salvacionman apananpaq. 11  Jesuspas paypa ch’uyanchasqan runakunapas juj taytallayoqmi kanku, chaymi payqa mana p’enqakunchu “wayqeykuna” niyta. 12  Paymi nin: “Wayqeykunamanmi sutiykita willasaq, juñunakuy ukhupin takikunawan jatunchasayki”, nispa. 13  Wajmantan nillantaq: “Paypin confiasaq”, nispa. Chaymantapas nillantaqmi: “¡Qhawariychis! Kaypin kashani Jehová Diospa qowasqan wawakunapiwan”, nispa. 14  Chhaynaqa, chay wawakuna aychayoq yawarniyoq kasqankuraykun paypas aychayoq yawarniyoq karan, chhaynapi wañusqanwan wañuchinanpaq atiyniyoq Saqrata ch’usaqyachinanpaq, 15  wañuyta manchakuqkunatapas llapankuta librananpaqwan, tukuy tiempon paykunaqa chay manchakuyman esclavo jina watasqa kasharanku. 16  Payqa manan angelkunatachu yanapashan, aswanpas Abrahanpa wawankunatan. 17  Chaymantapas payqa tukuy imapin “wayqenkuna” jina kanan karan, chhaynapi uma sacerdote kaspaqa Diospaq ruwaykunapi khuyapayakuq junt’aq ima kananpaq, runakunaq juchanrayku allipunachiy sacrificiota ruwananpaqwan. 18  Pay kikintaq pruebaman churasqa kaspa ñak’ariran chayqa, payqa preparasqan kashan pruebaman churasqa kaqkunata yanapananpaq.

Uraypi willakuykuna

Griego rimaypiqa “atiywan ruwaykunata” ninmi.